جە ئەرەیاۋنېوە هامبەشەنە پەژاک و کۊدار داواکەرا ڕۊو ٢٥ خەرمانانی جە ساڵیاڎوو دەسپنەکەرڎەو سەرهۊردای "ژەنی، ژیای، ئازاڎیی"نە مانگرتەی سەرانسەری جە ۋەرکەوتوو کورڎسانینە بلۊڕاوە و گەل چا ڕووەنە بلا سەروو زیارەتگاو گەشمەرڎا ئا ئاخېزیە.
حەریۊ جە پارتوو ژیۋای ئازاڎیی کورڎسانی(پەژاک) و گلېرگەو دیموکراتیک و ئازاڎیی ۋەرکەوتوو کورڎسانی (کۊدار) جە ئەرەیاۋنېوەنە داواشا کەرڎەن، ڕۊو ٢٥ خەرمانانی جە ساڵیاڎوو دەسپنەکەرڎەو سەرهۊردای "ژەنی، ژیای، ئازاڎیی"نە مانگرتەی سەرانسەری جە ۋەرکەوتوو کورڎسانینە بلۊڕاوە، نەتەوەکۍ تەروو ئېرانیچ هامشان و گەلوو کورڎی پۍ پەشتیوانی ۋەرفراوانی، بەشڎاری چا مانگېرتە گرڎینە و هەمەلایەنەینە کەرا.
حەرپاسە داواشا کەرڎەن:"گرڎوو گەلاو بەتایبەت گەلوو کورڎی خوڵقەکەرمۍ کە جە ٢٥ و خەرمانانینە و هاموەخت جە ساڵوەگەروو گرڎوو گەشمەرڎەکانە جە شارەکانە و جە یاگۍ گەشمەرڎەبیەیشانە ، سەرو زیارەتگاو ئا گەشمەرڎاوە ئاماڎۍ با''.
دەقوو ئەرەیاۋنا هامبەشەکە و پەژاکی و کۊداری پی جۊرەنە:
دەسپنەکەرڎەو ئاخېزوو "ژەنی، ژیای، ئازاڎیی"
دەسپنەکەرڎەو سەرهۊردای ئاخېزوو"ژەنی، ژیای، ئازاڎیی" جە ٢٥ خەرمانان و ١٤٠١ ی بە مەڵامەتوو شەرمەسارکەرڎەی گەشمەرڎەکەرڎەی "ژینا ئەمینیۍ" جە لاو دەوڵەتیۊ، ئاخېزېوە گۊرەی کولتوری بە گرڎوو ڕەهەندە سیاسی، کۊمەڵایەتی، ئابوری، پۍ داواکەرڎەی دیموکراتیکی و ئازاڎیی وازیا. ئا ئاخېزە بەئامی گەلەکەیما پۍ سەروو جاڎەی سەروو بنەماو دروشمەو"ژەنی، ژیای، ئازاڎیی" یاۋا قولەپۊپەو بی بە تاریخی. ئارۊ ئینایمۍ سەروبەنڎو یۋەمین ساڵیاڎوو ئاخېزوو"ژەنی، ژیای، ئازاڎیی"نە. جە ماوەو ساڵېوە سەرهوردای شۊڕشگېڵنینە، جەمۍ جوانۍ پۍ یاۋای بە ئامانجەکا ئاخېزی، گیان و ۋېشا بەخشا و بەشېوە فرە جە ۋېنیشاندەرا سەرو جاڎەکاوە جە لاو دۊڵەتیۊ زامڎارۍ کریۍ، بەشېوە فرۍ گیریۍ، ئەشکەنجەو جە قەنارەدای و جەمۍ خانەواڎۍ بیۍ بە شیوەن گېڵ و ڕۊڵەکاشا. ئېمە پېسە پەژاکی و کۊداری، سەروو پیرۊزی دەسکۊتە قەڎردارەکا ئاخېزی، ساڵیاڎوو یۋەمین و ئی ئاخېزیە جە گرڎوو گەلاو نەتەوکا ئېرانی، خانەواڎەو گەشمەرڎا و زامڎارەکا و ئازاڎییوازوو دیموکراسی وازا بەتایبەتی ژەناو پیایا کە شۊڵە چراوەو ئاخېزیشا بە ڕۊشنی ئاستۊ پیرۊز کەرمۍ و بەڕېزۊ یاڎوو گەشمەرڎا کەرمېوە.
شەپۊلېوە شۊڕشگېڵنی کولتوری و زیهنیەتی کە جە ئاکاموو سەرهۊردای "ژەنی، ژیای، ئازاڎیی" وە ئاما ئاراوە، سەروو بنەماو ئازاڎیی ژەنېن. یەکسانی مافوو ژەن و پیای و کۊشیای دژ بە ڕەگەزپەرسی، بەتایبەت کۊشیای دژوو سیاسەتەکا دەسەڵاتوو دژە ژەن و ئېرانی جە پڕەنسیپە بنەڕەتیەکا ئاخېزین. قسۍ ئا جمیەرە شۊڕشگېڵنیە ئانېنە کە ئازاڎیی گلېرگەی جە ڕاو ئازاڎیی ژەنېوە بە دی مۍ، پۊکەی مەتاۋۊ هورگیرو ۋیروو دژە ژەنۍ و کۊنە پارېزەکا بۊ. جە گرڎ یاگۍ جاڎەکانە هاواروو یەکسانی ژەن وپیای پېسە مافېوە بنەڕەتی و سروشتی مۍ و سەرەتاو فەصڵی ئەساسی ئاخېزوو زیهنیەتی-کولتورین. پەنەوازەن بیەو پەرس و ژەنۍ پېسە دیاردېوە بە گرڎ ڕەهەندە سیاسی، کۊمەڵایەتی، کولتوری، زیهنیەتی، ئابوری، ڕاوەبەریۊ... چەمش ۋنەکریۊ و جە گرڎ بوارەکانە، ڕېز جە ئیراڎەو سەربەخۊیی ژەنا گیریۊ. ئاخېزوو "ژەنی، ژیای، ئازاڎیی" بە ئیراڎەو هېزوو فاڕیای ژەنا، ڕېنسانسی زیهنیەتی-کولتوری پەشتیش قایمەنە، پۊکاتی جە گرڎوو مېڎانەکا ژیۋاینە فاڕیای بنەڕەتیش وەشکەرڎەن و گلېرگەیچ باوشیش پۍ ئانەی کەرڎېنۊ چونکەی دەسەڵاتوازیش قبوڵ نیا و پەسەنڎش مەکەرۊ. ژەنا سەلەمنانشا کە گرڎوو گەلی و توېژە جیاجیاکا ئېرانی یۊگېرتەکەرا پۊکەی بیېنۍ بە مەڵامەتوو ڕۊشن بیەیۊ ئامانجەکاو پارېزنای جە دەسکۊتەکا ئاخېزوو"ژەنی، ژیای، ئازاڎیی". بۍ گوومان، بە سەرمەشقی ژەنا ئازاڎییوازی، ئا ئاخېزە سەرگنۊ و بە ئامانجەکاش میاۊ.
بەدڵنیایوە، یۊ جە پڕەنسیپ و دەسکۊتەکا ئاخېزوو"ژەنی، ژیای، ئازاڎیی"پېکئارڎەی و بەستەیۊو نزیک بیەیۊ یۊبیەی بەینوو گەلان. جاڎە ئانەش سەلەمنا کە نزیکی گرڎوو گەلا واتە کورڎ، فارس، بەلوچ، ئازەری، عەرەب، گیلەک، مازەنی و گەلا تەری جە پەنەوازییە حاشا هورنەگیریەکا ئاخېزین. نزیکیۍ کە دلۍ سەرهۊرداکەینە ئاما ئاراوە، سەلەمناش کە متاۋۊ بۊ بە ئامیانی ئەساسی پۍ یاۋای بە ئامانجەکا ئاخېزی و فاڕیای پېکئامایی بە ئامانجوو دیموکراتیزەکەرڎەی ئېرانی. جە ئارۊنە، ئا تایبەتمەنڎیە جمیەریە بەبەشڎاری وەرفراوان و گرڎوو چین و توېژەکا نەتەوە فرە ڕەنگەکا، کامڵ بیەن و ۋەردەوام بەبەشڎاری ڕېکوزیاو ژەنا، گەنجا، ڕېکوزیا پیشەییەکا مامۊسایا، کرېکارا و تەقاویتا، ڕاپیماو ڕوان و جومعە و شاروو زاهیدانی، حۊڵدای ڕۊشنەکەرڎەیۊ نۋیسەرا، ڕۊشنۋیرا و مامۊسایا زانشتگەی و ۋەننگەکا و بەتایبەت حۊڵدای خوڵقنەروو هونەرمەنڎا و مدرامانوو زینڎانیا سیاسی و مەڎەنی سەرچەمەکەو ئاڎیشا بە زینڎەیی ئاستەنۊ. ئەدیان و ئاینەکۍ پېسە یارسانیچ بەشی گۊرەشا هەن. جاڎە پوچ کەرڎەیۊ دژە ژەنی، دژەنەتەوەیی، دژە ئیکۊلۊژیی و دژە گلېرگەبیەیش ئەرەیاۋنا و ئا فکرە ئازاڎە پېسە مانیفېستی ئاخېزوو دیموکراتیکی گەلا پەسەنڎ کریان و پەنەوازەن پارېزنایش ۋنە کریۊ. بۍ گوومان ئېرانېوە دیموکراتیک و کورڎسانېوە ئازاڎ جە سېبەرەو یۊبیەی گەلانە پېکمۍ و سەرگنۊ.
بۍ گوومان جە بناغەو ئاخېزوو ئېرانینە، گرنگی پەرسوو گەلە چەوەسیاکا و زوڵم ۋنەکریاکا، بەتایبەت پەرسوو کورڎی ئینا ڕیزی یۋەمەنە. یۊ جە مەڵامەتە ئەساسیەکا سەرهۊردای قەیرانە یانە کاولکەرەکا ئېرانی، مژاری ستمکارین ۋەران ۋەروو نەتەوەکا، گەلوو کورڎی یۊ چا نەتەوانە کە بەشی فرەش چا ستەمیە وەرکۊتەن، پۊکەی بەبۍ چارەسەری پەرسوو کورڎی، دیموکراتیزەکەرڎەی ئېرانی و ئازاڎیی گەلا تەریچ بەدی نمۍ. کۊڵەکۍ ئەساسیەو ئاخېزوو"ژەنی، ژیای، ئازاڎیی" جە ئېرانەنە گەلوو کورڎین، کە بەسەرمەشقی ۋېش چا ئاخېزەنە، خزمەتش بە گرڎوو ئېرانی کەرڎەن. قبوڵ کەرڎەی گرڎوو مافەکا گەلی سەروو بنەماو پڕەنسیپەکا ئازاڎیی و دیموکراسی جە پەنەوازیە ئەساسیەکا ئاخېزین و پۍ دژایەتی فاشیزمی و شۊوەنیزمی کۊشیایۍ سەرەمڕە زەرورا. بېگوومان هامشان و ئاخېزی، هېزەکۍ گەریلای بە ڕېکوستەی سەرمەشقی ۋېشا جە قەوارەو 'پژاکی و کۊداری'نە هېزوو پارېزنای ڕەواو گەلی وئاخېزوو گەلەکەیمانە و جە حیچ فیداکاری و فیدایی بیەیۍ مەسڵەمۊوە.
جە ۋەردەوامی ئاخېزینە، ڕېکوزیایی و ڕېکوستەبیەی گلېرگەی جە پەنەوازیە بنەڕەتیەکا خەباتی کۊمەڵایەتین. ئاخېز تاۋانش بناغەو بیەو ئا سیستمە پۊڵسنەرەیە بارۊ لەرزە، پۊکەی سیاسەتە سەرکوتکەرەکا ئا دەسەڵاتەیە بە ڕېبازە ساختەییەکاش پېسە گېرتەی، ئەشکەنجەدای، قەنارەدای، حیچ ئەنجامېوەش مەبۊ. بۊنەو یۋەمین ساڵیاڎوو ئاخېزوو"ژەنی، ژیای، ئازاڎیی"و ۋەردەوامی دای پا ئاخېزیە جە لاو گرڎ چین و توېژەکا گلېرگەیۊ و بەبەشڎاری گرڎ لایۍ، ئەرکېوە ئەخلاقی، سیاسی و ڕۊشنۋیرانەن. ئېمە پېسە پەژاکی و کۊداری، بۊنەو ٢٥ خەرمانان و ١٤٠٢، یۋەمین ساڵیاڎوو ئاخېزی و پەی بانگەشەو پارتەکا ۋەرکەوتوو کورڎسانی کە جە ١٢ و خەرمانان و ١٤٠٢ بەبەشڎاری نوېنەرو ئا پارتا بەگرڎیی سەرش ڕېکۍ کۊتیمۍ و جە ڕۊو چوارشەممەی، ١٥ و خەرمانان و ١٤٠٢ پۍ ڕای گرڎیی ئەرەیاۋیا. گرڎوو گەلاو نەتەوەکا ئېرانی و ۋەرکەوتوو کورڎسانی پۍ ئا هەڵمەتۍ کە وارۊ ئاماژەش پنەکەرمۍ خوڵقەکەرمۍ:
١. گەلەکەیما جە ۋەرکەوتوو کورڎسانی پۍ مانگرتەی گرڎیی و هەمەلایەن و وستەیرەو تەمامو بازاڕی و شۊنەکا هەرمانۍ، خوڵقەکەرمۍ و چا چوارچېوەنە خوڵقەو گرڎوو گەلاو نەتەوەکا ئېرانی کەرمۍ کە هامشان و گەلوو کورڎی و پۍ پەشتیوانیۍ ۋەرفراوانی، بەشڎاری چا مانگرتە گرڎییەینە کەرا.
٢. گرڎوو گەلاو بەتایبەت گەلوو کورڎی خوڵقەکەرمۍ کە جە ٢٥ خەرمانانینە و هاموەخت چنی ساڵیاڎوو گەشمەرڎەکا جە شارەکا و یاگۍ گەشمەرڎەبیەی کۊششکارا ئاخېزینە، سەرو زیارەتگاو ئا گەشمەرڎاوە ئاماڎۍ با.
جە یۋەمین ساڵیاڎوو ئاخېزوو"ژەنی، ژیای، ئازاڎیی"نە حوکمو کوشتەی گەشمەرڎۍ 'ژینا ئەمینیۍ' و سەڎان گەشمەرڎۍ ئا ئاخېزیە جە لایەن و سیستمە فاشیست و دژە ژەن و قڕکەرەیۊ بە تنی شەرمەزار کەرمۍ و یاڎشا بەرز نرخنمۍ و بەڕېزۊ ۋیرشا مارمېوە. بە دڵنیایوە ئازاڎیی و دیموکراسی پۍ گرڎوو گلېرگەو ئېرانی و ۋەرکەوتوو کورڎسانی بە ئامای مەیڎانەکاوەو دەنگ هۊربڕیەی پەی هۊرگېرتەی مەفەکاشا مۍ دی. ئېمە پاڵپەشتی ۋېما پۍ خەباتکارا گلېرگەی مەڎەنی و ڕېکوزیا ئازاڎیوازەکا ئەرەیاۋنمۍ. پا بۊنۊ داوا جە گرڎوو ژەنا، جوانا، ڕۊشنۋیرا، مامۊسایا، کرېکارا، خۊنکارا، ڕېکوزیا پیشەیی و مەڎەنیەکا، ڕېکوزیاکا ماف و مرۊڤی و ژیۋگە پارېزی، نۋیسەراو هونەرمەنڎاو گرڎوو چین و توېژەکا دلېینەو ئېرانی و ۋەرکەوتوو کورڎسانی و حەرپاسە جە بەروو ۋڵاتیچ بەتایبەت جە ئۊرووپای کەرمۍ جە ڕۊوو ٢٥ خەرمانانی، یۋەمین ساڵیاڎوو ئاخېزینە، پۍ پارېزنای جە یاڎوو ۋیروەریەکا گەسمەرڎاو ڕېزگېرتەی جە زامڎار و خانەواڎەکاشا و پەی ئازاڎیی و ڕزگاری گرڎوو گەلە چەوەسیاکا، جە مېڎانەکا خەباتینە ئاماڎۍ بیدۍ. ئاخېزوو"ژەنی، ژیای، ئازاڎیی" ئاخېزوو کولتوری-زیهنیەتی هامبەشوو گرڎوو گلېرگەو ئېرانین. خەباتو کۊشیای ۋەران ۋەر بە سیستمی سەرکوتکارو فاشیستی ئېرانی، ئەرکو گرڎ لایېن و ئاماڎەبیەی مېڎانەکانە، ڕاو ئازاڎیی و دیموکراسی واڵا کەرۊ. ئازاڎیی گەلوو کورڎی و ئازاڎیی ڕابەر ئاپۊی لکە دریاو یۊینۍ. بژتۋۊ خەبات و کۊشیای پۍ ئازاڎیی و دیموکراسی.
پارتوو ژیۋای ئازاڎیی کورڎسانی(پەژاک)
گلېرگەو دیموکراتیک و ئازاڎیی ۋەرکەوتوو کورڎسانی (کۊدار)
چوارشەممە، ١٥ و خەرمانان و ١٤٠٢ ۋەران ۋەر بە ٦ و سېپتامبەر و ٢٠٢٣ .
