ڕۊو ٢٢ۍ حوزەیرانی (١ی پوووشپەڕ)ی پێشمەرگەکاو کۊمەڵەو زەحمەتکێشا و کۊمەڵەی شۊڕشگێڵنوو زەحمەتکێشاو کورڎسانوو ئێرانی داشا یۊترینی و دووۍ پێشمەرگۍ کۊمەڵەو زەحمەتکێشاو کورڎسانی گیانشا جەدەس دا. چا بارەوە پارتوو ژیوای ئازاڎوو کورڎسانی (پەژاک) ئەرەیاوناێوەش وەڵا کەرڎۊ جگە جە بەروستەی نیگەرانی و پەژارەو وێش جە ڕووەدایەکەی، ئامادەیی وێش پەی میانگیری و میانجی پەی چارەسەروو ناکۊکییەکە بەروست، جە ڕاو گفتوگۊی وسازکەرڎەی کەشێوە ئارامی و دۊسانەیۊ بەینوو ڕیزەکاو پێشمەرگەکاو کۊمەڵەینە.

دەقوو ئەرەیاوناکەو پەژاکی پێسنەن:

وەشبییەی ماڵاییۊیرەی چەکڎاری بەینوو پێشمەرگەکاو کۊمەڵەی ڕۊو ٢٢ۍ حوزەیرانی ٢٠٢٣ (١وو پووشپەڕی ٢٧٢٣) و گیانجەدەسدای دووۍ پێشمەرگا مایۍ داخی و پەژارەینە.

جە قۊناغۍ هەستیار و ئارۊیی وەرکەوتوو کورڎسانینە و جە دۊخێوە چانەینە کە دوژمناو گەلوو کورڎی جە بەشە جیاجیاکاو کورڎسانینە ئینۍ شۊنەو فرسەتێوە پەی پیلانگێڵنای و دەسشانای، هەر نۊعە ناکۊکیێوە سەروازی بەینوو لایەنەکاو پێشمەرگەو کۊمەڵەی بە زەرەر ملوو گەلوو کورڎی و کۊشیای گەلیرە مەڕیۊوە. ئانە کە بییەن بە مایۍ ناکۊکیی بەینوو  پێشمەرگەکا، بێگومان بە پەنابەرڎەی پەی شێوازی تندوتیژانەی چارەسەر مەکریۊ و پەنەوازا لایەنەکاۍ بە دڎانگێرتەیوێرەی زیاڎتەری، هەستکەرڎەی بە وەرپەرسبییەی و نەفەسدرێژی جە ڕاو لۊژیکوو گفتوگۊی و سازیایۊ هەوڵەکاشا پەی چارەسەرکەرڎەی پەرسەکا وزا هەرمانە. وێدوورگێرتەی چا ڕایا کە با بە مایۍ وەشحاڵیی دوژمناو گەلوو کورڎی، پەنەوازیێوە شۊڕشین. 

چی ڕێوە "پارتوو ژیوای ئازاڎوو کورڎسانی (پەژاک)" جگە بەروستەی داخۍ و پەژارەو وێش بۊنەو ڕووەدای دۊخەکەیۊ و گیانبەختکەرڎەی دووۍ پێشمەرگاوە، داواو گفتوگۊی و دانگێرتەیوێرەی و سازیای کەرۊ جە لایەنەکا.  ڕووەدایۍ دڵتەزن و نەوازیای چینە قابلوو گەلوو کورڎی نییا، کە ڕۊڵەکاش پەی بەدەسئاورڎەی ئازاڎی و دیموکراسی پێشکەش بە شۊڕشی کەرۊ و بۊ بە مایۍ شاڎبییەی ڕژێموو ئێرانی و مەجالە پەی پیلانگێڵنای زیاڎتەروو دوژمناو گەلەکەیما ڕەخسنۊ. پەوکای پەژاک ئاماڎەن  پەی حەلوو ناکۊکییەکا جە ڕاو قساوە و دەسەبەروو دۊخێوە ئارامی و دۊسانەی، بەینوو لایەنەکا و پێشمەرگەکا و ڕیزەکاو کۊمەڵەینە میانجی کەرۊ. "

س.ز