بە پاو هەواڵە وەڵا بییەیوەکا، قەرار پاسەن، ڕۊدیاروو پەنجشەممەی-سەعات ۱٦ تا ۱٨ - ۱٦و مانگەو ئاوەوەرەی ۱٤۰۲ک، قەدر گیریۊ وەنەو شاعیری وەشزەوق و ناسکخەیاڵوو هەورامانی فەرەیدوونی بەهرامی ئشناسییا بە" شرام هەورامی" جە شاروو سەڵواواینە جە ساڵۊنەو ئێدارەو ئێرشادوو سەڵواواینە.

یاگۍ واتەینە شاعیرۍ نامۍ بریا یۊن جە شاعیرە ئشناسییایەکاو هەورامانی دیموو وەرکەوتی و پانیشتینە، وەرڎەنگۍ و گۊشگێرۍ تایبەتۍ وێش هەنێش و دەنگش پەڕا یادگاریۍ هەورامییەکا جە دەگا و شارنە، سەرڎەموو ڕادوێنی و نامای تەکنۊلۊجیاینە پی قەرەباڵخییەو ئیسەیۊ شاعیر یۊ جە دەنگە جوانە تایبەتە هەورامییەکا بۍ کە بەرڎەوام زوان و کولتووروو هەورامانی دۍ گۊشێمارە.

فرەتەرینوو دلێنەو شێعرەکاش باسوو عەشقی و ئەدۍ و مەرڎەی و وەشسیایی پەی خاکی و تەبیعەتوو هەورامانینۍ، شاعیر بە زوانۍ سفتوسۊڵی هەورامییانە خەمەکاش و وەشییەکاش چەنی گلێرگەکەیش بەش کەرۊ و فرەتەرینوو شیعرەکاش بە قاڵبی هیجایی "بڕگەیی" نویستێنۍ و شارەزۍ بواروو فەرهەنگی ماچا سەرڎەموو نەوارۍ و سیدی و سەیرانەکاو کەشوکۊو هەورامییەکانە شاعیر شادیی وێش چەنی هەورامانەکەیش بەش کەرڎەن و دایمە قەڵەمەکەش خزمەتوو زوانی هەورامینە بییەن.

ئینە و قەردزانییەکە ئینا وەختێوەنە کە وەشبەختانە شاعیر وێش ئینا ژیواینە و ئانەش پەی بەرکەوتەن کە هامزوانەکێش زیندەکوشۍ و مەرڎەپەرسۍ نییەنۍ و تا وێش هەن، قەدرش گێرا.

س.ز