چالاکی "دادپەروەری و یاسای بەدی باردێ" بە سەرمەشقایەتی بنەیانەو زیندانیا بە ئامانجوو ئازادیی جەستەیی ڕابەروو گەلو کوردی عەبدوڵا ئۆجالانی بەردەواما، یەرێ حەفتێ سەرەمڕە لووێ پەی ئەنقەرەی پەی کۆبیەیۆ چنی وەزیروو دادی بەڵام ڕاشا ونە گیریا و بە پاساوی جیاجیا داواکێشا ڕەت کریێوە. ئارۆ بە پاساو ئانەی وەزیر تونچ ئینا کۆبیەیۆ تایبەتەنە، ڕاوەبەرەو نووسینگەی تایبەتی وەزارەتی بوشرا سەلەکە و وەرپرسوو ئەوەکۆڵیاکا وەزارەتی عیرفان یەڵماز چنی بنەیانەکا کۆبیێوە.

دماو کۆبیەیۆکەی قۆمێ زیندانیا جە ناوەندوو گردیی پارتوو یەکسانی و دیموکراسیی گەلا (دەم پارتی) ئەرەیاونێوەشا وەناوە. ئەداو ئاشتی حەنیفە گولموشە ئەرەیاوناش دماو ئانەی پەرلەمانتاراو دەم پارتی چنی وەزیروو دادی کۆبیێنێوە، داواکێشا قبووڵکریێنە، بەڵام چنی ڕاوەبەروو نووسینگەو تایبەتی وەزیری کۆبیێنێوە و وەزیر تەرسان چانەی چنیشا کۆبۆوە، واتشا: "ئێمە واتما شمە ڕۆڵەکاما وزدێنە گۆشەی تاکەکەسیۆ. ئەگەر ڕۆڵەو وێتا چا ڕەوشەنە بیێ چێش کەرێندێ، واتما دادپەروەری و یاسا و ویژدان نییا. ڕۆڵەکێما پەی ئازادیی جەستەیی ڕابەروو گەلو کوردی عەبدوڵا ئۆجالانی ئینێ چالاکینە و ئیساتێ دیدارشا بایکۆت کەردەن".

ئەداو ئاشتی بەهیە یاڵچینە واتش وەزارەت کۆبیەیۆکەش قبووڵکەردەن بەڵام وەزیر نامان وەروودەم و ئەدایا، واتش: "هەتا داواو گردوو ئەدایا جابەجێ نەکریۆ، درێژە بە چالاکی مدانە. ئێمە چنی زیندانیا بیمێ. ئێمە هەمیشە پەشتیوانێشا بیمێ".

ئەداو ئاشتی پەیروزە کورتە واتش: "داوا مکەرمێ ئی ستەمە دمایش بێ. نەفرەت چی ستەمیە مکەرمێ".