هیزی وێرەگا بە بەشداریی چالاکا، بنەیانەو گەشمەردا و وەڵاتپارێزنا، بناروو قەندیلینە هجووم و ئەرەگیرکارییەکاو دەوڵەتوو تورکیسا بە ڕاپیماێوە جەماوەری شەرمەزارێ کەردێ. ڕاپیمایەکەینە پەیاموو "بە دەیان هەزار گەشمەردێ تەرێچ بدەیمێ، سەرەما مەکۆمنمێرە و دەس جە پارێزنای خاکی و وەڵاتوو وێما وەر مەدەیمێ" دریا. ڕاپیمایەکەی دەگاو ماریوە دەسش پەنە کەرد و تا قەبرسانوو گەشمەردە گۆلان و سمکۆی بەردەوام بی.

دماتەر قەبرسانوو گەشمەردە گۆلانی و گەشمەردە سمکۆی بە نامێ ئەنجوومەنوو گەلوو بناروو قەندیلی حەمەد ئەمین خدر قسێش کەردێ و واتش: "ئەرەگیرێ داواشانە هەرچوار پارچەو کوردستانی دلێنە بەرا، حکومەتوو هەرێموو کوردستانیچ وەراوەروو ئی هەرمانێ ئەرەگیرا بێدەنگا. ساڵانێوەن زارۆڵەکێما با قوربانیی ئی هجووما. پارتە سیاسییەکاو هەرێموو کوردستانی وەراوەروو ئی قڕکەردەیەو ئەرەگیرا بێدەنگێنێ. بەڵام گەلما گرد وەخت قارەمان و خەباتکارا. بە دەیان هەزار گەشمەردێ تەرێچ بدەیمێ، دەس جە پارێزنای خاکی و وەڵاتیما وەر مەدەیمێ."

حەمید ئەمین ئاخروو قسەکاشنە واتش: "هیچ وەختێوە دەس جە خەباتیما وەرنمەدەیمێ و وەڵاتیما دەسوو دوژمنی و خیانەتکاراوە ڕزگار کەرمێ. بەڵام بڕێ لایەنێ بیێنێ بە خزمەتکاروو دوژمنا. ئێمە سایێ ونەو گەشمەرداماوە ئینایمێ چێگە."

ڕاپیمایەکەی بە نیایرەی ولا سەروو مەزاروو گەشمەردا و واتەیۆ دروشموو "گەشمەردێ مەمرا" دماییش ئاما.