هێزەکاو سوریای دیموکرات (قەسەدە)ی، دەگایەکاو دێرەزۊرینە و وەرکەوتوو فوراتینە بە نامۍ 'قەوەتکەرڎەی ئاسایشی' ئۊپەراسیۊنێوە وەرفراوانشا دەس پەنە کەرڎەن، سەروو ئۊپەراسیۊنەکاو ٢ مانگی ویەرڎەینە زانیارییش وست ڕووە.

بە پاو ئاژانسوو هەواڵوو هاواری(ANHA)  ماوەو ٢ مانگانە ٨ ئۊپەراسیۊنۍ دژوو داعشی کریێنۍ و ئەنجامنە ٤ ئەندامۍ چەتەکا  کوشیێنۍ، کە یۊشا سەرچەتە بییەن و ١٢ کەسێشا گیریێنۍ.

بڕۍ چا ئۊپەراسیۊنا، کە لاو (قەسەدە)یۊ کریێنۍ پێسنێنێ:

* یەکینەکاو دژە تیرۊری(YAT) سەر بە هێزەکاو (قەسەدە)ی جە ١٩وو تەمووزوو ٢٠٢٣، بە پاڵپەشتیی هێزەکاو دژەتیرۊروو پانیشتوو کوردستانی  (CTG)و هامپەیمانیی میاننەتەوەیی، شارۊچکەو دەشیشەو سەر بە شەدادینە، دژوو شانە نهێنییەکاو داعشی ئۊپەراسیۊنێوە تایبەتیشا کەرد. جە ئەنجامنە شانێوە داعشی بێکاریگەر کریا و ٢ ئەندامۍ چەتەکا کوشیۍ و ئەندامۍ تەروو چەتەکایچ گیریا. هەرپاسە ٢ چەکۍ ئەی کەی- ٤٧ ، ٢ مۊبایلۍ، دەمانچێوە، بۊمبێوە،٣ مەخزەنۍ گولـلاو دەمانچەی، ڕەختێوە و چەکێوە ڕاوکەرڎەی گیریۍ.

* ٢٠وو تەمووزوو ٢٠٢٣ هێزه کاو (قەسەدە) به پاڵپەشتیی هێزەکاو کۊماندۊی و تیموو ڕێکوستەی ئۊپەڕاسیۊنێوە هامبەششا دەگاو ئەلمەنسورەو سەڕ بە شاروو ڕەقەی دژوو شانه شاریاوەکاو داعشی کەرد، پەوکای ٣ۍ چەتۍ گیریۍ بە موبایلەکاشاوە.

*ڕۊو ٤وو ئابوو ٢٠٢٣ هێزەکاو کۊماندۊی بە پاڵپەشتیی هێزەکاو (قەسەدە) ئۊپەراسیۊنێوەشا پەی سەروو شانێوە نهێنی جە دێرەزۊرنە کەرڎا. ئە نجاموو ئۊپەراسیۊنەکەینە چەتێوە گیریا و دەس ملوو چندین بەڵگەناماەرە گیریا.

*ڕۊو ١٦وو ئابوو ٢٠٢٣، هێزەکاو (YAT) بە بەشداریی هێزەکاو هامپەیمانیی میاننەتەوەیی و هێزەکاو دژەتیرۊروو پانیشتوو کوردستانی(CTG) جە ناوەندوو شاروو ڕەقەینە دژوو سەرچەتێوە گردینوو مەنتێقەو وەرکەوتوو داعشی بە نامۍ ئیبراهیم ئەلعەلی (ئەبو موجاهید) ئۊپەراسیۊنێوەشا کەرد. ئۊپەراسیۊنەکەنە سەرچەتەکە کوشیا، چەکێوە ئەی کەی-٤٧ و ٧ مەغزەن و فیشەکەکێش و ٤ مۊبایلۍ و کۊمپیوتەرێوە و ئامێرێوە وای فای و بەڵگەنامە کەسی دەسش ملەرە گیریا.  

*ڕۊو ١٦ ئابوو ٢٠٢٣، هێزەکاو کۊماندۊی (قەسەدە) ئۊپەراسیۊنێوەشا دژوو چەتێوە شانەی نهێنی داعشینە کەرد. جە ئۊپراسیۊنەکەنە، چەتەکە گیریا و دەس ملوو چەکێوە کڵاشینکۊفۍ و ٥  مەخزەنا و ڕەختێوە و ڕەختێوە دەمانچەی و٣ مۊبایلا و بەڵگەنامێوە کەسی ملەرە گیریا. 

*ڕۊو  ١٨و ئابوو ٢٠٢٣، هێزەکاو (قەسەدە)ی دەگاو ئەزبێ-نە، کە گنۊ وەرکەوتوو دێرەزۊریوە ئۊپەراسیۊنێوەشا دژوو چەتێوە کەرد. ئی سەرچەتەیە دەورێوە گەورەش بۍ جە فاڕایۊ تەقەمەنین و دابینکەرڎەی بەڵگەنامە و بەرکەرڎەی خێزانەکاو داعشینە جە کەمپوو هۊڵینە. چندین بەڵگەنامۍ و تۊمارۍ دەنگیۍ دەسشا ملەرە گیریا، کە پەیوەندییەکاو داعشی جە مەنتێقە ئەرەگیریایەکاو سەرێکانیینە سەلەمنا. جە میانەو ئۊپەراسیۊنەکەینە چەتەکە گیریا و دەس ملوو چندین بەڵگەنامارە گیریا.

* ڕۊو ٢٤وو ئابوو ٢٠٢٣، ئەنداماو شانێوە داعشی، کە خەریکۍ کۊکەرڎەیۊ زەڕی بێنۍ پەی چەتەکاو داعشی، لاو هێزەکاو (قەسەدە)یۊ جە ئۊپەراسیۊنێوە تایبەتنە گیریۍ.

س.ز