باسم عەوادی، قسەکەروو سەرۊک وەزیرانوو عېراقی، جە بەیاننامېوەنە ئەرەیاۋنانش،''دماو تەئکیدکەرڎەیۊ شۊنیرەلوای ۋەردەوامی جە لایەنوو سەرۊک وەزیرانیۊ پۍ دۊسیەو گەندەڵی ئانەی پەیۋەنڎیش بە تاوانەو بەقاچاخ بەرڎەی نەوتېوە هەن، جە مانگەکا ۋیەرڎەینە، تاوانما گۊرەتەرین تۊڕەی قاچاخی هۊرشېونمۍ و دەیان قاچاخچیېچ گیریېنۍ".

عەوادی جە بەیاننامەکەنە بانامۍ محەمەڎ شیاع سودانی، سەرۊک وەزیرانوو عېراقیۊ ستایشوو دەوروو ئەنجومەنوو باڵای داڎوەری و داڎگا تایبەتەکاش کەرڎەن، کە سزای تنەشا سەرو ئا قاچاخچیارە سەپنان، حەرپاسە ستایشوو دەزگاو ئاشایسی نیشتیمانی کەرڎەن، کە دەوری ئەساسیشا جە ئاشکراکەرڎەی ئا دۊسیانە، کە تایبەتېنۍ بە ئابوری نیشتیمانیۊ بیەن.

قسەکەروو سەرۊک وەزیرانوو عېراقی ئاماژەش پانەیچ کەرڎەن،"حکومەت ملۊوە گژۍ ئانیشارە کە گەمە بە سامانوو گەلوو عېراقی کەرا، قاچاخچیۍ با یا ئانۍ دەس پۍ سامانی گرڎیی بەرا، بەپاو یاسای و داڎگای مامەڵەشا چنی کریۊ حکومەت سورا سەرو نیایرەی سنورېوە یەکجاری پۍ ئا دۊسیە گەندەڵیا کەساڵانېوەن پەشتگۊش وزیېنۍ.

هـ.ش