دەسەڵاتداری (ئاکەپە/ ئەردۆغان)ی بییەن بە بەڵا پەی خەڵکی و سات بەسات تورکیای و گەلەکەیش ڕووبەڕوو نەهامەتی و بەدبەختی زیاتەری مەکەرۆنەوە.
فاروق فاتح ئوزەر، ئەرەمەرزنەرو کۆمپانیاو "ثۆديكس" (Thodex)ی کەسێوی نزیک جە ئاکەپە و ئەردۆغان-یەن، پوڵ و سەرمایەو سەدان هەزار کەسێ خاوەن پشکێ کۆمپانیاکەیش بەردەن و تورکیاش ئاستەن جیا.
"ثۆديكس" (Thodex)ی نزیک بە ٤٠٠ هەزارێ پشکدارێش هەنێ و سەرمایەکەش لانی کەم ٢ ملیار دۆلارێ ئەمەریکین.
سەرچەمەکێ هەواڵی باس جە هەماهەنگی فاروق فاتح ئوزەری چەنی ڕژێمەکەو ئەردۆغانی مەکەرانێ پەی دزیە ئا پوڵ و سەرمایە فرەیە و ئاشکراشان کەردەن: دزیەی ٢ ملیار دۆلارێ ئاسان نییەن ئەگەر دەسەڵات پەشتیشەوە نەبۆنە.
شارەزێ تورکیای باس جە ئانەی مەکەرانێ کە ڕژێمەکەو ئەردۆغانی بارودۆخێوی فرە خراپی ئابوری و داراییەنە بەسەرمەبەرۆنە و پنەوازیش بە پوڵی و سەرچەمەی دارایی هەن تا جە بارودۆخەکەی قوتارش ببۆنە. پەوکەی فاروق فاتح ئوزەر ئامرازێن پەی یاوای بە ئا مەبەستەیە.
باس جە ئانەی مەکریۆن: فاروق فاتح ئوزەر چەند ڕوێ جەی وەڵتەر جە باڵەپڕگەو ئەستەنبوڵیەوە گەشت پەی تایلەندی کەردەن و تورکیاش ئاستەن جیا. بەڵام ئاستەم تاوابۆنەش٢ ملیار دۆلارێ چەنی وێش ببەرۆنە. چونکە ئەوەفاڕای و بەردەی ئا گردە پوڵییە هەو جەڕاو بانکی و هەڕاو باڵەپڕیەوە زەحمەتەن، ئەگەر دەوڵەت و دەسەڵات پەشتیشەوە نەبانێ. هەرپاسە باس جە ئانەی مەکریۆن؛ کە ٢ ملیارەکە هەر ئینا تورکیانە و ئاکەپە دەستش گێرتەن سەرەرە و ڕەمای فاروق فاتح ئوزەری سیناریۆن و ئەگەریچ هەن جە ئایندەی نزیکەنە نامبریا بکریۆنە بەقوربانی و تەسفیە بکریۆنە.