قوربانیاو کۊکوشی سێواسی جە مه‌راسیمێوەنە ۋڵاتو سویسراینە یاڎشا کریاۋە، هامسه‌رۆكو جه‌ده‌كه‌یچ جە میانو مه‌راسیمه‌كه‌ینە داواو به‌شڎاریكەرڎەیش جە ڕاپیماو ناوه‌نڎو شارو لۆزانی کەرڎ، كه قەرارا بۊنەو ١٠٠ه‌مین ساڵەو په‌یماننامه‌و لۆزان-یوە بلۊڕاۋە.
جە مه‌راسیمێۋەنە كه جە شاره‌كا بێرنی و ژنێڤو سویسرای لۋاڕاۋە، حه‌ر یۊ جە زیلانۍ (زه‌ینه‌ب كناجی) جە كادره سەرمەشقەکا په‌كه‌كەی، كه جە ٣٠ حوزه‌یرانو ساڵەو ١٩٩٦ی جە دێرسیم چالاكی گیانبازیش ئه‌نجام دا و حەرپاسە ٣٣ هونه‌رمه‌نڎۍ و ڕۆشنۋیرۍ كه جە ئوتېل مادیماكینە جە شارو سێواسی تیرۆر کریۍ، یاڎشا کریاۋە.
یاڎکەرڎەیۊکەی جە ژنێف به دەیەقېوە ڕێزگېرتەی جە یاڎو گەشمەرڎە زیلانۍ و قوربانیاو کۊکوشی سێواسی ده‌سش پنەکەرڎ.
لا ۋېشۊ ره‌زا چه‌تینكایا به‌نامۍ جەمەو خانەواڎاو گەشمەرڎاوە (كۆماو) قسېش کەرڎۍ و ئەرەیاۋناش، زیلانە جە دژوو هێزه پیلانگێڵیەکا هه‌ڵۋێسېوە گیانبازیش ئه‌نجامدا.
حەرپاسە محه‌مه‌ڎ له‌تیف چه‌له‌بی، هامسه‌رۆكو گلېرگەو دیموكراتیكی كورڎی جە جنێڤ ئەرەیاۋناش، ئا کۊکوشیۍ حەتا ئیسە ئه‌نجامدریېنۍ جە په‌یماننامه‌و لۆزانی نەبڕیېنێرە. حەرپېسە چنی ۋەڵۍ په‌یماننامه‌و لۆزانی ئه‌رمه‌نییه‌كۍ کۊکوش کریۍ ، دماو په‌یماننامه‌كه‌یچ گه‌لۍ مەنتیقەکەی بیۍ بە ئامانجو ئا کۊکوشیا، سەرو گرڎیچۊ كورڎ، عه‌له‌وی، ئه‌رمه‌نی، ئاشووری-سوریانی و چه‌ركه‌سه‌كۍ کۊکوش کریۍ.
چه‌له‌بی سەرەڕاو ۋیرئارڎەیۊ کۊکوشیەکا دێرسیم، ئاگری، مه‌ڕه‌ش و سێواسی، ۋاتیچش: جە حه‌فتاكا سه‌ڎه‌ی ۋیەرڎەینە، چنی دەسپنەکەرڎەو کۊشیای ئازاڎیی كورڎی، كوشتەی بكه‌ر نادیاریچ دەسشپنەکەرڎ و حۊڵشا دا کۊشیای گه‌لی پەی ئازاڎیی مرڎنانە.
هامسه‌رۆكو گلېرگەی دیموكراتیكی كورڎی جە جنێڤ ئاماژه‌ش پۍ ئانەی کەرڎ، ١٠٠ه‌مین ساڵەو په‌یماننامه‌و لۆزانی نزیكبیەنۊ و ئەرەیاۋناش، پۍ ئانەی سه‌ڎېوە تەر به کۊکوشی گه‌لارە نە ۋیەرۊ، مشۊم ڕا به واوەی بیەیۊ په‌یماننامه‌و لۆزانی نەڎریۊ. چا چۋارچێوه‌یچەنە داواو به‌شڎاریكەرڎەیش چا ڕاپیماینە کەرڎ، كه قەرارا ڕۊو ٢٢ۍ ته‌مووزی جە شارو لۆزانینە بلۊڕاۋە.
مه‌راسیمو یاڎکەرڎەیۊکەی دماو نمایشكەرڎەو فیلمێوە به دروشمو "گەشمەرڎۍ مەمرا" دمایش پنە ئاما.
بێرن
هاموەخت جە شارو لانگێنتهالی سویسرای به سەرمەشقی فیدراسیۆنی دیموكراتیكی عه‌له‌وییه‌كا مه‌راسیمێوە یاڎکەرڎەیۊ پۍ ٣٣ هونه‌رمه‌نڎا و ڕۆشنۋیرا كه جە ٢ۍ ته‌مووزو ساڵەو ١٩٩٣ ۍ جە ئوتێل مادیماک-ینە تیرۆر كریۍ، لۋا ڕاۋە.
مه‌راسیمه‌كه به دەیەقېوە ڕێزگېرتەی دەسشپنەکەرڎ و دماتەر فیلمێوە نمایشكریا، دماتەر مه‌راسیمه‌كه به وتارەو حەریۊ جە پیر ئه‌ردۆغان ئه‌رگونی و زاكیر عه‌لی ماتووری دمایش پنەئاما.
هـ . ش
