قەیوم سەروو بودجەو شارەوانی ٧٠ هەزار کەسېش بەردېنۍ پۍ سەیرانی و گېڵای
جە وەختېنە گەلا تورکیای و کوردسانی دەسوو قەیرانەو ئابووریوە مناڵنا، قەیوم و وانی جە ماوەو ٩ مانگانە ٧٠ هەزار تەرەفڎارۍ ئاکەپە و مەهەپەیش بەردېنۍ پۍ گەشت و گېڵی.
قەیومەکۍ ئاکەپە-مەهەپەی جە شارەکا کوردسانینە دەسشا سەروو توانا و بودجە و شارەوانیرە گېرتەن و حۊڵ مڎا پەی مەسڵەحەتوو ئاکەپە-مەهەپەی بەکارش بارا. کارنامە و نۆ مانگا ۋیەردەیشا جە شاروو وانی ڕۊشنتەرین بەڵگەن سەروو ئانەی.
جە دما نمونەنە بە پاو نۋیستەیۍ ڕەسمی شارەوانی گۊرە شاروو وانی نزیک بە ٥٠ کەسا بە مەبەسوو گېڵای و سەیرانی سەروو خەرجی و بودجە و شارەوانی بریېنۍ پۍ سێرتی. شیەینەو مەنەیۊ و واردەی ئا ٥٠ ژەنا ئاکەپەی جە گېڵاکەیشانە پۍ سێرتی بە تەمامی سەروو بودجە و شارەوانی مەیسەر کریان.
لقوو ژەنا ئاکەپە-مەهەپەی جە وانیچ چی حەفتەنە پۍ گېڵای و سەیرانی لۋۍ پۍ بەحری سیاوی و ئا گەشت و گېڵەیچە سەروو بودجە و شارەوانی بۍ. رێکوستەکۍ ئاکەپە-مەهەپەی جە وان گەرەکشانە جە ڕاو ئا گەشت و سەیراناوە ۋەڵۍ هۊرچنیە هەرێمییەکانە ورە پۍ ئەنڎاما و لایەنگراشا گېڵناوە.
تەنیا جە ساڵەو ٢٠٢٣ېنە ٧٠ هەزار کەسۍ چېروو نامۍ گەشت و گېڵینە سەردای شارە جیاجیاکاشا کەرڎەن. تەنیا کرۍ فاڕایۊ حەر پاسێوە ٢٥٠ هەزار لیرۍ بیەن. بەڵگەکۍ ئا بەفیڕۊدایە موڵکی گرڎینەی چن ڕووۍ چېوەڵتەر دلېنە بریۍ.
