قەیومو شارەوانی ئاکدەنیزی کە وەڵتەر دۆسییەش پەی 'ئا موڵکێ پەی ورەتەی نییەنه' کەردەبێوە و جەلایەنو دادگایۆ ورەتەیشا ڕاگیریان، دماو سەپناو قەیومی ئینا هەوڵو ورەتەو ئا موڵکانە کە وەڵێ وێش ڕاگیر بێ جە ورەتەیشا و جە ئیسەنە هەم دۆسییەدارا و هەم فرۆشیارا.
قەیومو شارەوانی ئاکدەنیزی، زیاد شەنەری ئاکاتەی شارەوانی دەسو دەم پارتییۆ بێ، بە واتەو "بوارەکێ خزمەتو شارەوانی مەورەشیانە' دۆسیێوەش کەردەبێوە، جە ئیسەنە دماو ئانەی وێش سەپنا سەرو شارەوانینە، وێش دەسش کەردەن بەورەتەو موڵکەکا شارەوانی. قەیوم پا تەندەرە ٦٨٠ ملیۆنیۆ جە ١٦و نیسانینە ئەنجامش دا، هەم بۆنە دۆسییەدار هەم بۆنە فرۆشیار.
جە ١٣و کانوونو دووەمی ٢٠٢٥ ئاکەپە جە ڕاو سەپناو قەیومیۆ دەسش سەرو شارەوانی ئاکدەنیزینە گێرت، کە بە دەنگو گەلی دەسو دەم پارتییۆ بێ. دماو دەس سەرەرەگێرتەو شارەوانی ئاکدەنیزی، ئیتر سەربەخۆیانە دەسش بە فاڕیا و خراپکەردەو خزمەتاکا شارەوانیش کەرد.
یاگێ هەرمانەو ١٥٠ کرێکاراش فاڕاوە. ئینەیچ ڕاش پەی ئاستەنگکەردەو بەرهەمئاردەی کەردەۆ. سایەقە بە ئەزموونەکێ تڕۆمبێلی بار هورگێر، پسپۆرە کۆمەڵناسەکێ، دەرووئشناس و ئەندازیارێش فاڕێوە و گیانێش بوار و ناوچە جیاوازەکێ.
ورەتەو موڵکە نەورەشیێکێ
قەیوم چنی وێ سەپنایش پەنچ موڵکێ گرانبەهێ کە ورەتەیشا جە لایەن دادگایۆ مدرابێ، جە ١٦و نیسانینە وسۆنە تەندەرۆ. جە تەندەرەکەنە ٢٧ هەزارێ و ٤٧٧ مەتر چوارگۆشە زەمین بە بەهاو ٦٨٠ ملیۆن لیرێ ورەشیۆنە. زیاد شەنەری قەیومی سەپیا ئاکدەنیز کە وەڵتەر پەی ئا موڵکا نەورەشیێنێ دۆسییەش کەردەبێوە. کەچی جە ئیسەنە شەنەر هەمان موڵکێ چێرو نامێ قویومینە وستێنێش تەندەرۆ پەی ورەتەی. شەنەر کە دۆسییەو "مەبۆنە ورەشیۆ"یش کەردەبێوە، دماتەر کە بییەن بە قەیومی سەپیا، رای فرتوفێڵی یاسایش پەی ورەتەو ئا موڵکا جە ئەنجوومەنی شارەوانییۆ ئێزتۆ. پی جۆرە ئیسە هەم دۆسدارا و هەمیچ فرۆشیار؛ هەم قەدەغەکارا و هەم فرۆشیار.
جە بارەو بابەتەکەیۆ پەرلەمانتارو مێرسینی دەم پارتی عەلی بۆزان ئاماژەش پانەیەدا ئا ناکۆکیێ جە بەڵگەکانە هەنێ ڕاش پەی بێ یاسایی کەردەنۆ و ئینەش وات: "هەمان کەس هەم پێسە و قایمقامی و هەمیچ پێسەو قەیومی، کە وێش ڕاش وەردەمو ورەتەو ئا موڵکا شارەوانی کەردەبێوە، جە ئیسەنە ماچۆنە 'من ورەشوشا'. پەنەوازا جە رووەو یاسای و ئیدار و یاسایی سزادایشۆ ئەوەکۆڵییایۆ چی دۆخەنە کریۆنە.
ئی تەندەرێ بە تەنیا بابەتو ورەتەو چن بینا و موڵکێوە گرانبەهای نییا. ئینە مامەڵەکەردەین بە ورەتەو جەمە موڵکێوە کە جە لایەنو دادگایۆ ورەتەیشا مدریان، وە جە دۆخێنە ئەنجام دریۆنە کە ئەنجوومەنو شارەوانی دلێشنە هورشنریانۆ. پەنەوازا گەلوو مێرسینی ئی دۆخە جە ڕوانگەو دیموکراسی، دادگایی و ئایندەو سەرچەمەکا گەلی هورسەنگیۆنە."
