ئۆزگور ئۆزەل دماو ئانەی سەردانو ئەکرەم ئیمام ئۆغلووی سەرۆک شارەوانی گۆرەوئەستەمبوڵیش کەرد، دەربارەو گلێرۆبییەو شاندو ئیمراڵی و ئەردۆغانی واتش: "کاتێ کورد ماچۆنە پەرسەو کوردی هەنە، ئانە کەواتە پەرسەکێ بییەیش هەن و چارەسەرکەردەیش ئەرکو گرڏیمانە."
ئۆزگور ئۆزەل، سەرۆکو گرڏی پارتو کۆمارو گەلوو (جەهەپە)ی، دماو ئانەی سەردانو ئەکرەم ئیمامئۆغڵو، سەرۆکو گۆرەو شارەوانی ئەستەنبوڵی، جە زجنی وسیارەو مەرمەرەی کە گنۆنە ناوچەو سیلیڤرو ئەستەنبوڵی، کۆنگرێوە ڕۆنامەوانیش ئەنجامدا.
ئۆزەل جەکۆنگرە ڕۆنامەنوویسییەکەینە وەردەمو بەرەو زجنینە، ئاماژەش بە گلێرۆبییەو شاندو ئیمراڵیی پارتو یەکسانیی و دیموکراسیی گەلا (دەم پارتی) تەیب ئەردۆغانی سەرۆکو گرڏی ئاکەپەی کەرد و ئەرەیاوناش، هەڵوێسو جەهەپەی سەبارەت بە پرسو کوردی فرە ڕۆشنا، ئەر کوردەکێ ماچانە 'پەرسێ هەنە' ئانە کێشە هەن و چارەسەرکەردەیش ئەرکو گرڏیمانە.
هەرپاسە جەختش سەرو ئانەی کەردۆ کە مشۆم پرۆسێوە شەفاف جە پەرلەمانەنە پەی چارەسەرو ئی پەرسێ پەیڕەو کریۆنە و واتش: گرنگا جە پەرلەمانەنە بیمێ پەی پرۆسێوە کە گرڏ قوربانییێ گێرۆ وێش.
سەرۆکو گرڏی جەهەپەی ئۆزگور ئۆزەل واتیشش: ئامادێنمێ پەشتگیری هەر هەنگامێوە کەرمێنە کە جە پەرلەمانەنە زەمینەش پەی ڕەخسنریۆ.
هەرپاسە، ئۆزەل یاڏش وستیمێ کە ئەکرەم ئیمام ئۆغلو تۆمەتبار کریان و باڵبەسکریان بەمەڵامەتو پێشنیارکەردەو پۆستی پەی کوردەکا جە ئەنجوومەنو شارەوانینە و واتش: "ئا عەقڵییەتەی کە کوردەکا بە شایستەو ئەنجوومەنو شارەوانی نمەزانۆ، نمەتاوۆنە ئی پرسەیە چارەسەر بکەرۆ."
