بۆنەو ٩ ەمین ساڵوەگەڕو ئازادکەردەی شەنگالیوە شارەوانی ۋێڕاوەبەری گەلوو شەنگالی ئەرەیاۋنێوەش وەڵا کەردۆ و ئەرەیاۋناش؛ پەنەوازا عێراق و هێزە جەهانیەکۍ جە ۋەرا ۋەرو هرووژمەکا دۆڵەتو تورکینە بێدەنگۍ نەبا.
ئیدارەو ۋێڕاوەبەری شارەوانی گەلوو شەنگالی بۆنەو ٩ ەمین ساڵوەگەڕو ئازادکەردەی شەنگالیوە بەیاننامێوەش وەڵاکەرڎۆ.
بەیاننامەکە پی جۆرەنە:
"جە ٩ ەمین ساڵوەگەڕو ئازادکەردەی شەنگالینە، فاڕیای و پێشئامایۍ فرۍ هەم شەنگالەنە وهەم جە جەهانەنە ڕووەشا دا. چی ٩ ساڵەنە سیاسەتو دلێنەبەردەی گەلوو ئێمەی ئێزیدی هەڵای بەردەواما. فرێوە جە وڵاتا ئۆروپای ئی فەرمانێشا بە قڕکەردەی ئشناسا. بەڵام هیچ ڕاوجایێشا پەی پارێزنای و هەڕەشۍ قڕکەردەی جە دژو گەلەکەیما نەگێرتەن ۋەر. ڕوانە فڕۆکە بێفڕۆکەوانەکۍ تورکیای هرووژم مکەرا سەرو هەرێمەکاو شەنگالی و جوانەکاما کوشا. حکوومەتو عێراقی سنوورەکێش ڕوەو هرووژمەکارە کەردێنۍ، واتە هامبەشو هرووژمەکان، ئەرنا حکومەتو عێراقی بە ئاسانی متاوۆ ڕا جە هرووژمەکا تورکیای بگێرۆ. داواکاری ئێمە جە حکومەتو عێراقی ئانەنە کە جە ۋەرا ۋەرو ئی هرووژمانە بێدەنگ نەبۆ و خاوەن هەڵوێسۍ جددی بۆ.
ئنڎەو گرڎ فەرمانێوە کە کاولکاری، وڕای و دلێنەبەردەی ژیۋاین؛ ئاڼنەیچ ئازادیی ئاوەدانی و گەشەپنەدای ژیۋاین. جە حەقەتینەنە هەرمانوکارو ئێمە پېسە شارەوانی بریتییا جە ڕازنایۆ، پاککەردەیۆ و ڕەخسنای ژیۋای ئازادی و ئارامین بەپاو دەرفەتەکا. ئازادی شەنگالی بی بە مەڵامەتوو هیوا و باوەڕی گەلەکەیما بە گێڵایۆیشا پەی شەنگالی. ئینەیچ جە سەیەو مڎرامانی و ئەرەکۊشای گەریلاکا ئازادی، یەژەشە-یەبەشەی جە دژو چەتەکا داعشی ئامان بەرهەم. هەرپاسە پېسە شارەوانی گەلی پەشتیوانی و خزمەتگوزاری پێشکەش پا بنەیانا مکەرمۍ کە گێڵاوە پەی سەرو ماڵ و حاڵو ۋێشا. ڕاسا شەنگال ئازاڎ کریان، ئی ڕووە ڕوێوە پیرۆز و بەقیمەتا؛ بەڵام گرنگ ئانەنە کە خاوەنداریش ۋنەبکەرمۍ، ئاڎیچ بە یۆبیەی و بەڕێکوستە کەردەیماوە مکریۆ.
ئێمە پېسە شارەوانی ۋێڕاوەبەری گەلی دیسان ٩ ەمین ساڵوەگەڕو ئازادیی شەنگالی جە گرڎو گلێرگەی کۆششکاری و قارەمانی ئێزیدی پیرۆز مکەرمۍ. جە کەسایەتی هەڤاڵ عەگید جڤیانینە فەرماندەو ئازادی شەنگالی بەڕێزو حورمەتۆ یاڎو گەشمەرڎە دڵشێر هەرەکوڵی و گرڎو گەشمەرڎا ئی بەدەسئامایە گۆرا بەرز نرخنمۍ و قەول مڎەیمۍ بە ڕێکوستەی ۋێڕاوەبەریۆ درێژە بە ئەرەکۆشایشا مڎەیمۍ.
