یوەمین سەمپۆزیوموو زوانی کوردی کە لاو سەندیکاو کادراو پەروەردەی و زانستیوە (Egîtîm Sen) واننە مکریۆ، ڕۆی دووەموو چالاکیەکاشنە بەردەواما، جە ئەرەنیشتەی سەمپۆزیوموو ئارۆینە بابەتوو "دەرفەت و قۆرتەکا پەرەوەردەو زوانی کوردیی ئەدێنە' گفتوگۆشا بارەوە کریا.

ئەنداماو کۆمەڵەو ڕۆناهی و نویسەرا خایلازا ڕەشید، شوان ئەرتیسی، کە  بواروو زمانەوانیینە مکۆڵیاوە و ئەنداموو لەقوو سەندیکاو پەرەوەردەو وانی ئەحمەد یاشار ئەرەنیشتەکەیەنە بەشدارێ بێنێ.

خایلازا رەشید سەرنجەش وستە سەروو سیاسەتوو گۆشەگیرکەردەی زوانی کوردی قەفقازیانە و واتش: " حەر گەلێو هاگاداروو زوانی ئەدایی وێش نەبۆ ئانە دلێنە مشۆ. گەلوو کوردی ماوەو ٣٠٠ ساڵانە قەفقازیانە مژیوۆ. وەرموو کوردا پارێزنای زوانەکەیشانە. پەوکای پێویسا گەلوو کوردی یانەکاشا بفاڕانێ پەی پەرەوەردەی و پاریزنای زوانی کوردی."

هەرپاسە ئەوەکۆڵەری زوانەوان ئەحمەد یاشار باسش جە گرنگیی زوانی ئەدایی کەرد و واتش: "سەدێوەن، کە نکۆڵی وەنەو زوانی کوردی مکریۆنێ. چندین سیاسەتێ ئەوەتاونایسا وستێ میراتییوە و ئیسەیچەنە بەردەواما. ساڵەو ٢٠١٣ێنە دەوڵەت ڕاش پانەیە دا مەکتەبەکانە پێسەو وانەی بوچیۆوە. بەڵام حەروەخت گەرەکش بۆ مدرنۆش، پەوکای متاومێ بواچمێ ئا پەرەوەردەو زوانی کوردییە، کە مەکتەبەکانە موچیۆوە پێسەو قاچاخی پاسنەنە. پەوکای تا کە مەکتەبەکانە وانەو پەرەوەردەو زوانی کوردی بونییۆ، پێویسا گر ڕاێو گێڕمێنە وەر."