سەرەڕاو ڕاگیریەکا پەدەکەیچ، شەنگالیەکۍ گێڵاوە پەی ماواو ۋێشا
مەردموو شەنگالی جە کەمپەکا پانیشتوو کوردسانی سەرەڕاو ڕاگیریەکا پەدەکەیچ گێڵاوە پەی ماواو ۋێشا. تەنیا جە حەفتەی ۋییەردەنە ٢٠ بنەیانۍ گێڵێنۍ پەی شەنگالی و دەسشا بە بنیاڎنیایۆ ژیۋایشا کەردەن.
تا ٣٠ حوزەیرانی ماوێوە کەم ۋەروو دەسانە مەنە، کە قەرارا چا ڕووەنە گرڎوو کەمپەکا پەنابەرا جە پانیشتوو کوردسانینە وزیارە.
پەدەکە ۋەرا ۋەر پا قەراریە مردۆوە، بەڵام حکومەتوو عێراقیچ سوورا سەروو جابەجێکەردەی قەرارەکەی.
چا چوارچێوەنە چی دماییەنە قەراردریا کە گرڎوو ۋەننگەکا جە کەمپەکانە وزیارە.
حەرپۊکەی چنی دمایی ئامای ۋەنای و دەسپنەکەردەو ئیسراحەت و ساڵەو ۋەنای، شەنگالیەکۍ جە کەمپەکا پانیشتینە زیاتەر کەوتێنۍ هەوڵوو گێڵایۆ پەی ماواو ۋێشا.
تەنیا جە حەفتەی ۋییەردەنە زیاتەر جە ٢٠ بنەیانا گێڵێنێوە سەروو یانە و مەنزڵ و ۋێشا و جە دەگا و گلێرگەکا شەنگالینە ئەرەنیشتۍ بیێنێوە.
جە کۆو ئا کەسا کە حەفتەی ۋییەردە گێڵێنێوە، ١٣ بنەیانۍ گێڵێنێوە پەی سیبا شێخ خدری.
ژیۋای جە کەمپەکانە ڕۆ دماو ڕۆی دژوارتەر بۆ.
بەپاو زانیارییەکا سەرەڕاو بەشوو پەروەردەی، حەرپاسە ژمارێوە فرە دەزگۍ خزمەتگوزاری و تەندروسیچ پېسە پێویسی جە کەمپەکانە درێژە بە کارکەردەی مەڎا.
کاربەدەسا عێراقی و وەزارەتوو کۆچ و کۆجبەرا عێراقی ئەرەیاۋنانشا، کە تا ئیساتۍ زیاڎ جە ١١ هەزار کەسا نامۍ ۋێشا تۆمارە کەردێنە پەی ئانەی گێڵاوە پەی ماواو ۋێشا.
حەرپاسە تۆمارکەردەی نامۍ پەی گێڵایۆ پەی شەنگالیچ بەردەواما.
جە ماوەی ۋییەردەیچەنە بە تایبەتی جە ١٢و ئایارینە ١٨٠ بنەیانۍ داواو گێڵایۆیشا پەی شەنگالی پێشکەش کەرد و دەسشا بە ئاماڎەکاری کەرد، بەڵام بەمەڵامەتوو ڕاگیریەکا پەدەکەیۆ نەتاوانسا گێڵاوە.
ئاستەنگیەکاو پەدەکەی ۋەروودەم و گێڵایۆ کۆچبەرانە جە کەمپەکانە حەرپاسە بی بە مەڵامەتوو ئانەی وەزارەتوو کۆج و کۆچبەرا عێراقی جە دادگاو فیدڕاڵی عێراقینە شەکوا سەروو بنەیانەو بارزانی تۆمار بکەرا.
ئەرەنیشتەو دادگای سەروو مژارەکەی جە ڕۊو ٣٠ حوزەیرانی واتە هەمان ڕۊو وستەیرەو کەمپەکانە ملۊڕاوە.
پەدەکە پەی ئانەی ڕا نەڎۆ ئاوارەکۍ شەنگالی گێڵاوە سەروو یانەو مەنزڵ و ۋێشا پەنا پەی فرەو ڕاو رێبازی بەرا.
چی دماییەنە پەرلەمانتارەو پەدەکەی ڤیان دەخیلە پاسە قسێش کەردۍ و گێڵایۆ پەی شەنگالیش پێسە و قڕکەردەی وەسف کەرد.
خەڵکوو شەنگالی پاسەش پەیلوایشا پاسەن کە حۊڵەکۍ پەدەکەی پەی ڕاگێرتەی جە گێڵایۆ ئاوارە و کۆچبەرا بەشێوەن جە قڕکەردەو ٢٠١٤ و بەهیچ جۆرێوە جیا نیا چانەی.
