پارتو دیمۆکراتیکو گەلان ئەشناسیا بە (هەدەپە/ HDP)، جە ڕۆدیارو  تشرینو یەکەمو ساڵەو ٢٠١٢ی جە شارو ئانکارا-و پایتەختو تورکیا ئەرەمەرزیای وێش ئاشکرا کەرد.
هەدەپە هەر جە ئا وەختەوە تا بە ئەی ساتە کریان و مکریۆنە ئامانج و فشار، یورش، گێرتەی و زیندانیکەردەی نەمەندەن دژش پەیڕەو نەکریۆن. سەرەڕاو سەرجەم ئانەیچە، پارتەکە تا بە ئارۆ پەنج (۵) کۆنگرێ و چەنڎین کۆنفڕانسێش پیرۆزاە و سەرئەفرازانە بەستێنۍٚ و جە میانشانە سەرجەنۊ وێش نۆژەن کەردەنەوە و پەی هەر قۆناغێ جە قۆناغەکان کارنامە و چارەسەرنامە و ئەڵتەرناتیڤیش پەی گرفتەکان و ڕووبەڕووبەییەی فشار، یورش، گێرتەی و زیندانیکەردەی هەزاران جە ڕاوەبەرۍٚ، ئەندامۍٚ وهەوادارانێش وستەن ڕووە.
بە تایبەتی کۆنگرەی (۵) پەنجمین کە ئارۆ جە ساڵۆنو وەرزشی شارو ئانکارایەنە بەشداری ٥٠ هەزار كەسان و  ١٠٠ کیاستۍٚ کوردستانیٚ، تورکیایۍٚ، ئەوروپاۍٚ و جیهانیۍٚ کە سەدان کەسۍٚ بێنۍٚ ساز کریا، خوتان واتا و گرنگییەن.
چونکە پەنجەمین کۆنگرە جە بارودۆخێنە ساز کریا فرە سەخت و دژوار بۍٚ و سەرجەم دەربازەکۍٚ سەرو (هەدەپە)یەرە وزیێبێنێرە و سەرجەم دەرفەتۍٚ و ئامرازەکۍٚ کۆشای ئازادانە و دیمۆکراتیانەی پەی هەدەپەی دلێنەبریێبێنۍٚ و هامتەریب چەنی ئانەی هەزاران ڕاوەبەرۍٚ، ئەندامۍٚ وهەوادارێٚش دۆسیەشان پەی کریانەوە و یان زیندانیۍٚ کریێنۍٚ.
هەر پەوکەی شارەزێ و چەمدارۍٚ سیاسۍٚ، پەنجەمین کۆنگرەی بەسەرکەوتەی فرەگەورە بەنامێ مکەرانۍٚ و چوون ئاڵنگاریێوی مەزن موینانێش.

کۆنگرە سەرەتانە بە دەیەقێوە مدرای و ڕێزنیای جە گیان بەختکەردانو ڕاو ئازادی دەستش پنەکەرد.
دماتەر دیوانو ڕاوەبەری کۆنگرەی کە جە ٣ ژەنا و ٢ پیایا پێئامابۍٚ، هۆروچنیا.
دماتەر جە گۆنگرەنە هه‌زار و ٥٠ نمایندۍٚ کە مافو دەنگدایشان بۍٚ،  ٨٠٦شان دەنگشان بەکاربەرد و به‌  ٧٩٧ ده‌نگۍٚ په‌روین بوڵدان و میتحات سانجار چوون هامسەرۆکۍٚ و ئه‌نجومه‌نێوی ١٠٠ ئەندامی پارتەکەی کە ٥٠ هاریکارێشان هەنۍٚ و هەرپاسە لیژنه‌کۍٚ دیسپلینی ناوه‌ندی و هه‌ماهه‌نگی بەشێوازی دیمۆکراتیانە هۆروچنیۍٚ.
هەرپاسە جە کۆنگرەنە پەی یوەمین جاری ئەنجومەنێوی ڕاوێژکاری کە جە ٤٣ نۋیسەرۍٚ، ئەکادیمیسیەنۍٚ، ڕۆچنامەنۋیسۍٚ و هونەرمەندۍٚ پێک مەیۆنە، هۆروچنیا.

هەر جە کۆنگرەنە ڕاپۆرتۍٚ پەیوەست بە ویەردە و ئایندەو پارتەکەی و هەرپاسە کوردستانی و تورکیای و چارەسەری گرفتەکان، وانیێوە و چەنڎین وتارۍٚ پێشکەشۍٚ کریۍٚ. دیسان بە شایی و ئاهەنگ و گۆرانیۍٚ و سرودۍٚ و دروشمدای و هۆرپڕای و سەماکەردەی هازی و تینی بە کۆنگرەی دریا و سەرئەنجام پەنجەمین کۆنگرە پیرۆزانە و سەرئەفرازانە دماییش ئاما.
سەرنج کێشەن هەر جە دمای تەمامیای کۆنگرەکەی، پەیجۆری سیاسی و بەنامۍٚ دادگەری دژش دەستش پنەکەرد. داواکارو گردیی کۆماری تورکیای بانگەشەش کەرد: جە کۆنگرەنە بانگەشە پەی ڕێکوستەی قەدەغەکریای واتە پەی پەکەکەی کریان و سەرو ئانەی بڕیاشدان تا ونەپەرسای جە هەدەپەی دەست پنە بکەرۆنە.