دەوڵەتو تورکی ئەرەگیری ماوەو یەرۍ ساڵان جە ۋەران ۋەرو مدرامانو گەریلاینە نەتاۋانش جە زاپەنە بۍ وەڵۍ. بەڵام بە هامکاری پەدەکەی هێزەکۍ ۋېش جە ھەرێمەکەنە بنە وستۍ. سەرەڕاو ناڕەزاییەکایچ، ئی حۊڵۍ پەدەکەی ۋەردەوامېنۍ.
بە پاو ئا زانیارییا دەسکۊتېنۍ، هێزەکۍ پەدەکەی بە شۆفڵ و حەفارە جاڎە سەرو کەشەکەیۊ مڎاونە و بەرەو قوڵایی زاپی ملا.
ھێزەکۍ پەدەکەی جە بەرەکا پانیستوو زاپیچ نوقتېوە سەروازیەشا ۋەشکەرڎېنە و حۊڵ مڎا ڕېوە تازۍ پۍ دەوڵەتو تورکی ئەرەگیری ۋەش کەرا.
جە گرتە ڤیدیۆییەکانە بەرگنۊ، کە شۆفڵ و حەفارۍ پەدەکەی جە دامېنو پانیشتوو زاپی ڕا ۋەش کەرا. ھێزەکېشا جە نوقتۍ جیاجیانە بنە وزا و نیازشا هەن ھێزێوە گۊرەی سەروازی جە ھەرێمەکەنە بنە وزا.
پەدەکە وەڵۍ ٢ۍ ئابی، هێزێوە گۊرەی سەروازیش جە قەزاو ئامێدیی پانیشتوو کوردسانینە بنە وستەبۍ و چایچۊ هێزەکېشا پۍ مېڎانەکا گەریلای فاڕېوە.
هێزەکۍ پەدەکەی ماۋېوە فرەن ڕاسەوخۆ پاڵپەشتی هجومەکا دەوڵەتو تورکی ئەرەگیری کەرا و بانۍ بە هامبەشو هجومە ئەرەگیریەکا. دەوڵەتو تورکی جە فرېوە جە مېڎانەکا مدرامانینە پۍ ئانەی بتاۋۊ دژوو گەریلای چن هەنگامۍ بلۊ ۋەڵۍ بە پاڵپەشتی پەدەکەی جمۊوە. بەپاو زانیارییەکا، هێزەکۍ تورکی بە تایبەتی جە زاپ بە ئشناسنامەو پێشمەرگەیۊ ئاماو لۋای کەرا و جە بنکەکا خانەواڎەو بارزانینە مەیا بەر و هجوم کەرا سەرو گەریلای.
جە ٢٩-٣٠ی تەمووزینە پەدەکە پەشتیوانیش جە ئۆپەراسیۆنەکا دەوڵەتو تورکی پۍ سەرو مېڎانو مدرامانو کەشو ئۆرتۍ جە مەنتیقەو مەتینای کەرڎ. جە ئەرەیاۋناکەو هەپەگەینە ئامابۍ، ئا ئەرەگیرۍ کە چا مېڎانەنە سزا دریېنۍ، بە هامکاری هێزەکا پەدەکەی جە ڕای زەمینییۊ جە ھەرێمەکەنە فاڕیېنېوە.
جە ئەرەیاۋنېوە تەرو هەپەگەینە جە ٣٠ی تەمووزینە ئامابۍ، "سوپاو تورکی کە جە ۋەران ۋەر بە مدرامانو هێزەکامانە ئەنجامش بەدەس نارڎ، بە هامکاریی پەدەکەی هجومش کەرڎ سەرو ھێزەکاما جە مېڎانو مدرامانو کەشو ئۆرتۍ جە مەتینا و حۊڵ مڎۊ چا مېڎانەنە بنە وزۊ.
هـ . ش
