سەرنیشت و وەرکەوتوو سووریاینە جەژنەو ژیوایۊ مەبارەکە کریا
جە چنڎ مەنتێقێوە سەرنیشت و وەرکەوتوو سووریاینە ٣٩مین ساڵیاڎوو هەڵمەتەو ١٥و ئابی مەبارەکە کریا.
چنڎ شارێوە سەرنیشت و وەرکەوتوو سووریاینە ٣٩مین ساڵیاڎوو ١٥و ئابی بە ئاهەنگێوە جەماوەری مەبارەک کریا.
قامیشلۊ
بە هەزاران ئەرەنیشتۍ قامیشلۊی، کورد و عەرەب و سریان و ئەرمەنۍ پەی مەبارەککەرڎەی ٣٩مین ساڵیاڎوو ١٥و ئابی، ئاهەنگێوەشا ساز کەرد بە دروشموو "ئێمە هەڵمەتەو ١٥و ئابی جە ڕابەر ئاپۊی مەبارەک کەرمێ".
ئاهەنگەکە جە ساحەو ١٢و ئادارینە کریا، بە نامۍ مەجلیسوو بنەیانەو گەشمەرڎاوە ئەڎاو گەشمەرڎە محێدین گەلۊی، شەمسەخان گەلۊوە، ساڵیاڎوو هەڵمەتەو ١٥و ئابیش مەبارەک کەرد.
دماتەر هامسەرۊکوو مەجلیسوو بنەیانەو گەشمەرڎاو قامیشلۊی، مەعسوم حەسەن، واتش: "ئێمە پەی بەدەسئاورڎەی ئازادی سەروو ڕاو فەرماندە عەگیدی و هامڕایەکاشۊ ویەرمۍ. هەڵمەتەو ١٥و ئابی، تاواش گەلوو سەرنیشت و وەرکەوتوو سووریای وزۊ یۊ و سایۍ ئا فەرمانداوە، بیێوە یۊ و بیۍ بە ساعیبوو دۊزوو وێپارێزنای".
عامودا
سەدان ئەرەنیشتۍ مەنتێقەو عامودای کانتۊنوو قامیشلۊینە ساڵیاڎوو هەڵمەتەو ١٥و ئابیشا جە هۊڵوو بێلیسانینە مەبارەک کرد. ئاهەنگەکە بە درووشموو "ساڵیاڎوو هەڵمەتەو ١٥و ئابی جە ڕابەر ئاپۊی مەبارەک کەرمێ" ڕێک وزیا.
مەیدانەکە بە ڕسمۍ ڕابەروو گەلوو کوردی عەبدوڵڵا ئۊجالانی و فەرماندە عەگیدی و ژەنە گەشمەرڎە سەرمەشقا ڕازییاوە.
ئاهەنگەکەنە هامسەرۊکەو مەجلیسوو بنەیانەو گەشمەرڎاو عامودای، زیوار سلێمانە ١٥و ئابیش وەنەو گەلوو کوردی و گەلە بندەسا مەبارەک کەرد و واتش: "فیشەکی یوەمینوو هەڵمەتەو ١٥و ئابی وەراوەروو سیاسەتوو قڕکەرڎەی و نکۊڵی و ستەموو سەروو گەلاو وەرکەوتوو دلێڕاسەینە تەقیا.
زیوار سلێمانە واتش، هەڵمەتەو ١٥و ئابی پەی گەلوو کوردی ژیوایۊ و پەی گەلاو هەرێمەکەی هومێدوو ژیواێوە ئازادیش زیندە کەرڎۊ. سلێمانە واتش، شۊڕشوو ١٩و تەمووزی بەرهەموو هەڵمەتەو ١٥و ئابین.
هەرپاسە داواش کەرڎە درێژە بە کۊشیای بدا و دەسکەوتەکاو شۊڕشی بپارێزنا.
ئاهەنگەکە بە گۊرانیۍ و ورپڕای دماییش ئاما.
ڕەقە
پەیەدە و ئەرەنیشتاو ڕەقەی ١٥و ئابیشا جە گەڕەکەو ئەکرادوو سەرنیشتوو ڕەقەی مەبارەک کەرڎە.
ئاهەنگەکەنە ئەنداماو پەیەدەی و مەجیلسوو بنەیانەو گەشمەرڎا و ڕێکوزیایە مەدەنیۍ و سەروازییەکۍ و ئەنداماو ئیدارەو وێڕاوەبەری بەشدارۍ بێنۍ.
ئاهەنگەکەنە ئەڎایاو گەشمەرڎا مەشخەڵەو جەژنەو ژیوایۊشا گیسنانە.
دماتەر، هامسەرۊکوو دەسەو هەرمانوکاروو جڤاکیی ئیدارەو وێڕاوەبەریی سەرنیشت و وەرکەوتوو سووریای، جیهاد حەسەن واتش: "هەڵمەتەو ١٥و ئابی، ڕوێوە تارێخیین، گەلوو کوردی وەراوەروو دەوڵەتی ئەرەگیر و فاشیستوو تورکیوە سەرەش ورڎا".
حەسەن دماتەر واتش: "وەختۍ یاڎوو ئی ڕووەیە کەرمێوە، مشۊم بزانمۍ میراتێوە شارستانیین. میراتوو پارێزنای بەهاکاو وەرکەوتوو دلێڕاسەین. میراتوو مدرامانین وەراوەروو کۊیلایەتی و ستەمیوە".
بە نامۍ پەیەدەیۊ، ئەنداموو پارتەکەی، ئێزدان شێخی، هەڵمەتەکێش مەبارەکە کەرڎە و واتش: "تەقنای فیشەکی یوەمینی بە دەسوو گەشمەرڎە مەعسوم کۊرکمازی، خەڵکوو هەرێمەکەیش ژیوناوە".
ئاهەنگەکەنە چنڎ هۊنیێوە بە زوانی کوردی و عەرەبی ونیێوە، هەرپاسە بەشدارۍ بە گۊرانییەکاوە ورپڕۍ. س.ز
