ئەحمەد شەرع کەسوکارو ۋێش پەی پۆستە گرنگەکا دەسەڵاتداریەکەیش منیۆرە، ئەحمەد دەروێشی براو هامژینەکێش پېسە سکرتێرو گرڎینو بانکی مېیانی دەسنیشان کەرڎ. ئی ئەرەمەرزنایۍ کە زیاتەر جە بنەیانە و کەسوکارەکەیشۆ ڕووە مڎا نیگەرانییەکا زیاتەر مکەرا.
ئەحمەد شەرع سەرۆکی کاتی سوریای کەسانۍ نزیک جە ۋێش و ئەنداماو بنەیانەکەیش پەی پۆستە گرنگەکا حکومەتی دیاری مکەرۆ. ئی ئەرەمەرزنایۍ ئا نیگەرانیێشە چنەکۊتێنۍ کە ئایا جارێوەتەر جە سوریانە حوکمڕانی بنەیانەیی سەرهۊرمڎۊوە؟
ئەحمەد شەرع کە ڕەخنە جە بنەیانەو ئەسەدی گێرۍ کە سوریاش کەرڎەن بە ئیمپراتۆریەتێوە بنەیانەیی، کەچی ئارۊ وێیچش بە هەمان شێوە مامەڵە مکەرۆ.
ئەحمەد شەرع براو ۋێش، ماهر شەرع-ش، پېسە سکرتێرو گرڎیی سەرۆکایەتی کۆماری دەسنیشان کەرد. هەرپاسە برێوەتەرش بەنامۍ حازم شەرعی جە سەرۆکایەتی ئیدارەو جابەجێکەردەینە نیانەرە، هەرپاسە برازاو ۋێش، عوەیس شەرع-ش، پېسە سکرتێرو گرڎیی کۆشکۊو سەرۆککۆماری دیاری کەرڎەن. وچیۆ ئی هەڵوێسۍ کاریگەریێوە فرە جە دەورو سەرۆککۆمارینە وەش مکەرۆ.
جە گرڎی سەرنجڕاکێشتەر، ئەحمەد شەرع براو خێزانەکەیش، ئەحمەد دەرویشش، پېسە سکرتێرو گرڎیی بانکی مېیانی سوریای دەسنیشان کەرد، کە دەوری یەکلاکەرەوەش بۆ جە دیاریکەردەی سیاسەتو ئابووری وڵاتینە.
ۋېیەردەو ئەحمەد دەروێشی، جیهادی جە نوسرۆ پەی داعشی
ۋېیەردەو ئەحمەد دەروێشی بینیانۆ بە پەیوەندییەکاش بە ڕێکوزیا جیهادییە تونڕەوەکاوە. چا کاتەنە دەروێش پەیوەندیێوە نزیکش چنی بەرەو نوسرەی بۍ کە سەرۆکەکەش ئەحمەد شەرع بۍ. وچیۆ بە ئەمرەو جۆلانی دەروێشی لووان پەی عێراقی و ئەرکو ئەسای مووشەکو "کۆرنێت"یش پنە بەخشان بە میقدارو ١٢٠هەزار دۆلارا. هەرپاسە باس چانەی مکریۆ ئی زەڕە ڕاستەوخۆ جە لایەنو جۆڵانیوە دریان.
شیاوو باسیا دەروێشی جە ٢٠١٥ەنە پڕێنە جە نوسرەی جیابیەنۆ و پەیوەندیش بە داعشیوە کەردەن. بانگەشەو ئانەی مکریۆ کە ١٢٠ هەزار دۆلارێش پا جۊرە ڕادەسو داعشی کەردەن.
دماو شکسو داعشی جە عێراقەنە، دەروێشی جارێوەتەر گېڵانۆ پەی سوریای، ملۊ پەی شارو ڕەقەی و دماتەر ۋێش مېیاونۆ بە هەرێمو ئەلنوسرەی (تەحریر شامو ئیساتۍ) جە ئیدلب و پەشیمانی ۋێش بەربڕیەن و داواش جە جۆلانی کەردەن چنەش وەش بۆ، بەڵام داواش ۋنەکریان ئا میقدارە زەڕەی دریابێش پنە گێڵنۊشۆ.
سەرەڕاو ئی پێشینەیشە، دەروێشی دماو وڕای ڕژێمو ئەسەدی جە لایەنو ئەحمەد شەرعی سەرۆکو کاتی سوریایۆ بە سکرتێرو گرڎیی بانکی مېیانی دەسنیشانکریا.
شیاوو باسیا ئی ئەرەمەرزنایە تەنیا پەیوەندیش بە دەروێشیوە نییا. جگە جە براکاو ئەحمەد شەرعی، ماهێر و حازم شەرع، مامۊزا و زەماکەو، ماهێر مەروانیچ مەنسەبی گرنگشا دریان پنە.
ئیساتۍ سەرەنجەکۍ ئانێنۍ کە ئا پڕۆسەی کە بە قەولو "سوریایۍ تازەی" دەسش پنەکەردەبۍ، خەریکە بۆ بە حکومڕانیێوە بنەیانەیی کە وەڵتەر ئینۍ مەڵامەتو وڕنای ڕژێمی وەڵینی بێنۍ.
