کۊمیتەو وەرگێریی جە ڕۊنامەنویسا (سی پی جەی) کە بارەگاکەش ئینا ئەمریکا، داواش کەرڎێنە ڕۊنامەنویس سڵێمان ئەحمەد، کە ٢٥وو تشرینوو یوەمینە لاو هێزەکاو پەدەکەیوە ئڕفانیا، "بەبۍ مەرج ئازاڎ کریۊ."
سلێمان ئەحمەد یۊن جە هەواڵسازەکاو ڕۊژنیوزی، ڕۊو 1وو تشرینوو یوەمی بە ڕەزامەندیی حکومەتوو هەرێموو کوردستانی بەڕسمی سەردای بنەیانەکەیش کەرڎەبۍ وەرنیشتەنە، وەلۍ ڕۊو 25وو تشرینوو یوەمی وەختوو ئەوەگێڵایشەنە، هێزەکاو پەدەکەی ئڕفانا.
چندین ڕوێن هیچ زانیاریێوەش سەر نیا و بۊنەو ناڕەزایەتیی کۊمەڵایەتییوە، پەدەکە ناچار بی واچۊ کە دەسبەسەرشا کەرڎەن. وەلۍ تا ئیساتۍ نمەزانیۊ چکۊن و ئینا چە بارودۊخێوەنە زیندانی کریان. سەرەڕاو هەوڵاو ڕێکوزیایەکاو مافوو ئینسانی و پارێزنەرایچ، هیچ زانیاریێوە سەبارەت بە ڕۊنامەنویس سلێمان ئەحمەدی نەدریان.
مشۊم بەبۍ مەرج ئازاڎ کریۊ
کۊمیتەو وەرگێری جە ڕۊنامەنویسا ڕۊو چوارشەممەی ئەرەیاوناێوەش وەڵا کەرڎۊ و داواش کەرڎێنەە دەمودەس یاگۍ سلێمان ئەحمەدی ئاشکرا کریۊ و بەبۍ مەرج ئازاڎ کریۊ و دمایی بە فشاروو سەروو ڕۊنامەنویسا باریۊ.
ڕێکوزوو پڕۊگراموو وەرکەوتوو دلێڕاسەی و سەرنیشتوو ئەفریقاو سی پی جەی شەریف مەنسوور، واشنتۊننە ئەرەیاوناێوەش وەڵا کەرڎۊ و واتش:"پێویسادەسەڵاتداراو کوردوو عێراقی دەمودەس یاگۍ ڕۊنامەنویس سلێمان محەمەد ئەحمەدی ئاشکرا کەرا و ئا تۊمەتۍ وزیێنۍ پاڵش ورشنیاوە و بەبۍ مەرج ئازاڎ کریۊ."
بە شێوێوە پلانپەیمجیارە و نایاسایی ڕۊنامەنویسۍ گیریا
مەنسوور واتش:"کوردستانوو عێراقینە ڕۊنامەنویسۍ بە شێوێوە پلانپەیمجیارە و نایاسایی دەسبەسەرۍ کریا، ڕووبەڕوو ئەشکەنجەی باوە، دەبنەوە، ئینەیچە قبووڵکریا نییا، پێویسا دەسەڵاتداراو کوردوو عێراقی ڕا بە ڕۊنامەنویسا بدا بە ئازاڎی و بێتەرس هەرمانەو وێشا کەرا."
