بۊنەو ئا جەنگە دەروونییەیۊ هەریۊ جە پەدەکەی و حوکمەتوو بەغڎای دژوو هاموەڵاتاو هەرێموو کورڎسانی دەسشا پەنە کەرڎەن، هاموەڵاتۍ ئینۍ دۊخێکوە سەختنە مژیوا و چارەنویسوو مووچەو فەرمانبەرا ئینا وەرڎەموو تونێلێوە تاریکێنە.
دماو پەسەندکەرڎەى یاساو بودجەو عێراقی و مردنای کیانای نەوتەو هەرێمی ڕاو تورکیایۊ، هەرێموو کورڎسانی ڕووبەڕوو قەیرانوو بێمووچەیی بییەنۊ، نە حوکمەتی سەرشییەو هەرێمی، نە هێزە سیاسییەکێچش حیچ جوابێوەشا نیا پەنە پەی داواکاریى هاموەڵاتا، حەریۊ جە وەزارەتوو دارایی عێراقی و هەرێموو کورڎسانیچ قسۍ پێچەوانۍ کەرا و حەریۊشا ئەوى تەری تۊمەتبار کەرۊ پانەیە پابەندوو یاساو بودجەی مەبا.
حەرچند مەسرور بارزانی سەرۊكوو حوكمەتوو هەرمانڕاییکەروو هەرێمی، بانگەشەو ئانەیش کەرد، کە حوکمەتوو عێراقی، شایستە داراییەکاو هەرێمی مەکیانۊ، کە یاساو بودجەینە دیاریۍ کریێنۍ.
وەلۍ باسم عەواد قسەکەروو حوكمەتوو عێراقی بەیاننامێوەنە ئاشکراش کەرد، حوكمەتوو عێراقی پابەندییە داراییەكاش وەراوەروو هەرێموو كورڎسانیوە تەمام یاونێنۍ یاگۍ، هەوڵۍ فرێما دێنۍ پەی چارەسەركەرڎەی كێشەكاو بەینوو بەغڎای و هەولێری.
وەلۍ واریاتی نەوتی و نانەوتییش تەسلیموو بەغڎای نەكەرڎێنۍ، پێسە ئانەی، کە حوكمەت یاساو بودجەینە داوا کەرۊ.
لاو وێچشۊ تەیف سامییە وەزیرەو دارایی عێراقی واتش، شش مانگی یوەموو ئێساڵینە هەرێم پشکوو وێش ورگێرتەن و پەی شش مانگی دووەموو ئێساڵیچ پشکوو هەرێمی ترلیۊن و نیمۍ دینارێن.
ماچۊیچ ئانە جە دەسوو هەرێموو کورڎسانینە هەن زیاتەرا جە مافەکاش و مشۊم بدۊشۊ بە حوکمەتوو عێراقی و گەرڎەنپاکی خشتۍ داراییچ بسەلەمنۊ.
وەراوەریچۊ هەرێم ماچۊ ئێمە پابەندۍ بیێنمۍ و حوکمەتوو عێراقی شایستە داراییەکاما پەی مەکیانۊ.
پەی چارسەروو ئینەیچە پەرلەمانوو عێراقی قەرارش دا مێمانداریی تەیف سامیۍ وەزیرەو دارایی عێراقی و ئاوات شێخ جەنابوو وەزیروو دارایی هەرێموو کورڎسانی کەرۊ، پەی تاوتۊکەرڎەی کێشەو مووچەو فەرمانبەراو هەرێموو کورڎسانی.
جە ڕوای ویەرڎەیچەنە سەرۊككۊمار و سەرۊكوەزیران و سەرۊكوو پەرلەمانوو عێراقی، چەنی لایەنە سیاسییەكاو ئیدارەو دەوڵەتی بەغڎای پایتەختنە كوۍ بیێوە، كۊبییەیۊكەنە تاووتۊو دۊخوو كەركووكی و چند دۊسیێوە تەری كریا.
سەبارەت بە پشکوو هەرێمیچ جە ئەرەیاونیاو کۊبییەیۊکەینە پەشتگیرىی قەرارەکەو ئەنجوومەنوو نوێنەرا کریان پەی چڕیەی وەزیراو دارایی هەرێمی و بەغڎای.
چڕیەی وەزیروو دارایی بەغڎای و هەرێمی پەی بۊ پەرلەمانوو عێراقی، هاموەختا چەنی نەکیانای پشکوو هەرێمی لاو بەغڎایۊ و حکومەتوو هەرێمی و عێراقیچ یۊترینی تۊمەتبار کەرا بە پابەندنەبییەی بە یاساو بودجەیوە.
ئینەیچە وەختیوەنە، ئارۊ ١٣و 9و 2023ێن، وەلۍ هەرمانبەراو هەرێمی ته‌نیا مووچه‌و مانگەو 6وو ئێساڵیشا و‌ر گێرتەن و بەشێوە جە مامۊسایا و هەرمانبەرا بایکۊتوو دەوامیشا کەرڎەن.
س.ز
