دەسەڵاڎدارا ئاکەپە- مەهەپەی، جە فرەو ئا شارانە کە مەتاوا جە هۊرچنیەکانە ئەنجام دەس وزا ، دەنگەدەراش جە شارەکا تەریۆ فاڕۊوە پۍ ئا شارا، جە ڕاو قەیومەکاوە خجڵ و ئی گەمە تازەینە. ئانە تەئکید کریانۆ کە جە چنڎین شار و شارۆچکڵێوە، چنڎین دەنگدەرۍ بەشێوێوە نایاسایی ئامێنۍ ئا یاگا و پۍ هۊرچنیەی چا بنەشا وستێنە. پارتوو دیموکراسی و یەکسانی گەلا، ۋەران ۋەر پی هەرمانە نایاساییا هەڵوێسش هورگێرتەن و ناڕەزایش بەربڕیەن. شەکواکۍ جە تەرەفوو دەسەو باڵاو هۊرچنیەیۆ ڕەڎ کریێنێوە.

هامسەرۆکەو ئامەڎەو دەم پارتی پنار ساکیک تەکینە، سەبارەڎ پی مژاریە پۍ ئاژانسوو هەواڵوو فورات (ANF)ی قسێش کەردۍ و واتش: "هامپەیمانی دەسەڵاڎداری، وەختۍ مەتاوۆ ۋەران ۋەر بەدەسکۊتەکا پارتی و گەلوو ئێمە ۋێس گێرۆ، بە پاو ئا دەرنجاما کە جە هۊرچنیەو ٢٠١٩ ینە توشش ئاما، گەرەکشا بە فاڕایۆ دەنگدەرا ۋێش، چی هۊرچنیەینە ئەنجامەکا جە ئیسفاڎەو ۋێشەنە یەکلاکەرۊوە. جە فرەو هەرێمەکانە ئی هەرمانۍ کەرۆ، بەتایبەتی چا هەرێمانە کە جە هۊرچنیەو ٢٠١٩ینە بە جیاوازیێوە کەم هۊرچنیەکێش دۆڕنۍ".

سوپا و پۆلیسۍ پېسە دەنگدەری فاڕیێنێوە

تەکینە ئاماژەش پانەی کەرد بەپاو زانیارییەکا پارتەکەیما، ئانە زانیان، سەروازۍ سوپۍ جە بەحری سیاوۆ فاڕیێنێوە پۍ کوردسانی و واتش: "جە یاگێوەنە کە نامونیشانوو ۋێش نیا، دەنگدەرۍ مەرزیێنێرە. بەتایبەت جە مەنتیقەکا پاشور، هەزرۆی و ئەگیلەو ئامەڎیی،  دڵنیایی ئانەیما هەن کە ئا دەنگەدەرۍ ئامێنۍ پۍ ئا مەنتیقا گرڎ سەروازۍ سوپۍ و پۆلیسی و کەسا سەربەدەسەڵاتینۍ. ۋەران ۋەر پی پاشێلکارییا ناڕەزایەتیما جە دەسەو هۊرچنیەکانە تۆمارکەردەن، بەڵام واتشا 'ئی دەنگدەرۍ کاربەدەسۍ ڕسمیێنۍ' پۊکەی شەکواکۍ ئێمەشا ڕەڎ کەردۆ. ۋەروو ئی مەڵامەتیە داوکاریما پۍ دەسەو باڵاو هۊرچنیەکا بەرزکەردەنۊ و چەمەڕاو جواب دایۊ کەرمۍ. پۍ ئانەی هۊرچنیێوە دیموکراتیکی جە کوردسانەنە ئەنجام بڎریۆ، هیواڎارێنمۍ دەسەو باڵاو هۊرچنیەکا بە ئەرکوو ۋێش هۊربێزۆ. پارتێوە بێ گەل و گەلۍ بێ پارت بۆ، مشۊم نیشانەشا بڎەیمۍ کە چنی پەشتیوانی کۊکەرمێوە. ڕێژەو دەنگەکاما پېسە نیشانۍ سیاسەتی دیموکراتیکیما موینمۍ".

'ئێمە ئیراڎەو گەلەکەیما پارێزنمۍ'

تەکینە سەرنجش وست سەروو گرنگی هۊرچنیە دلێینەکا و واتش: "پێویسا وریا و ۋەرپرسیارۍ بیمۍ، مشۊم فرە بە وردی ئەرکوو ۋێما جابەجێ کەرمۍ، گرڎوو ئا نادادپەروەرییای جە وەختوو هۊرچنیەینە ۋەران ۋەرما کریان، ئاشکرا کەرمۍ. ئی پرۆسەیە بە ۋێماوە لکە مڎەیمۍ، پۊکەی هەرمانێوە فرۍ گنۆ سەروو گەلەکەیما. پېسە دەم پارتی هەرمانەکاما سەروو بنەماو داتای بەرمۍ ڕاوە. وەعد مڎەیمۍ چ جە وەختوو هورچنیەی و چ دماو هۊرچنیەی پارێزنای جە ئیراڎەو گەلەکەیما کەرمۍ'.