بنەیانەو چوار زینڎانیا سیاسی کوردی کە سزاو جە قەنارەدایشا سەرەرە سەپیان، خوڵقە کریێنۍ تا جە زینڎانوو ئێڤینی تارانی چەمشا پنەشا گنۆ و پینەیچ تەرسەو جابەجێکەردەی سزاو ئا چوار زینڎانیە زیاتەر بیەن.
بنەیانەو حەریۆ جە موحسین مەزڵوم، محەمەڎ فەرامەرزی، وەفا ئازەرباری و پژمان فاتحی کە سزاو جە قەنارەدایشا سەرەرە سەپیان خوڵقەو زینڎانوو ئێڤینی تارانی کریێنۍ پې ئانەی چەمشا بە رۆڵەکاشا گنۆ.
ئینەیچ دماو ئانەی مۍ کە جە ١٦و ئی مانگێنە دیوانوو باڵاو ئێرانی سەپناو سزاو جە قەنارەدایش سەروو ئا چوار زینڎانیە کوردەیرە پەسەنڎ کەردەبۍ، حەرپۊکەی جە ئیسەنە چالاکا سیاسی و مەڎەنی ۋەرکەوتوو کوردسانی و ئێرانی باس چانەی کەرا، کە چڕیەو بنەیانەکاشا پۍ ئەنجامدای دمایین دیڎاریا و ئەگەروو جە قەنارەدایشا ئینا ئان و ساتەنە.
ئا چوار زینڎانیە سیاسیە کە ئەندامۍ کۆمەڵەی بێنۍ جە ٢٣ۍ تەمووزوو ٢٠٢٢ (١و گەلاوێژوو ١٤٠١)ی جە تەرەفوو هێزە ئەمنییەکا ئێرانیوە جە دەگێوە سەر بە ورمێنە گیریۍ و دماو ماوێوە جە تەرەفوو لقوو ٢٦و دادگاو ئاخێزوو ئیسلامی ئێرانیوە بە سەرۆکایەتی دادوەر ئیمان ئەفشاری بە تۆمەتەو "جەنگ دژوو خوڎا"ی و "سیخوڕی پۍ ئیسرائیلی" سزاو جە قەنارەدایشا سەرەرە سەپیا.
دماو ئانەی تانە چا سزۍ دریا، جە ڕووا ویەردەینە لقوو ٩و دیوانوو باڵاو دادوەری سزاکێش پەشڕاس کەردۆ و دۆسیەکەش روانەو بەشوو جابەجێکەردەی سزاکا جە دادگاو تارانی کەرد، پینەیچ تەرسەو جابەجێکەردەی سزاکۍ زیاتەرە بیێنە.
محەمەڎ فەرامەرزی تەمەن ٢٨ ساڵ و خەڵکوو دێوڵانین، موحسین مەزڵوم تەمەن ٢٧ ساڵ خەڵکو مەهابادین، وەفا ئازەربار ٢٦ ساڵ خەڵکوو بۆکانی و پژمان فاتحی تەمەن ٢٨ ساڵ خەڵکوو کامیارانین جە دماو گێرتەیشا جە ٢٣/٧/ ٢٠٢٢ ێنە تا ئیسە ڕاشا پنە نەدریان دیڎار چنی بنەیانەکاشا ئەنجام بڎا و مافوو هۊرچنیەی پارێزنەریشا ۋنە زەوت کریان و دادگا پارێزنەرێوەش پۍ دیاری کەردێنۍ.
تا ئیسە دووۍ کەرەتۍ فیلموو دڎان نیایپۊرەی زۆرەملۍ ئا چوار زینڎانیە سیاسیەو کوردی جە میدیاو ڕسمی دەوڵەتوو ئێرانیوە وەڵا کریانۆ و چنەشەنە باس چانەی کریۆ ئا چوار کەسە جە ئەسفەهان و جە وەختوو سیخوڕینە گیریێنۍ، بەڵام کەسوکارشا ڕەڎش کەراوە و باس چانەی کەرا هەرچوارشا جە وەختێنە بە بێ چەک خەریکۍ هەرمانەو رێکوستەی بیێنۍ جە دەگێوۍ ورمێنە گیریێنۍ.
رێکوزیاو مافوو مرۆڤوو ئێرانی ڕۊو شەممەی جە ئەرەیاۋنێوەنە داواو هەنگامۍ دەموو دەسیش پۍ گلېرگەو جەهانی کەردەبۍ پۍ ڕاگێرتەی جە قەنارەدای ئا چوار زینڎانیە کوردا و مەحموڎ ئەمیری موقەدەم ڕاوەبەروو ئا رێکوزیایە ئەرەیاۋنابێش، "جگە جە نامرۆڤانەبیەی سزاو مەرگی، ئا چوار زینڎانیە هامشێوەو فرەو زینڎانیا تەری کە سزاو جە قەنارەدایشا سەرەرە سەپیان، گولانەتەرین ڕاوجاکۍ دادگاییکەردەی دادپەروەرانەی جە دۆسیەکەیشانە وەرچەم نەگیریان و سەپناو ئا سزۍ سەرشارە، تەنانەڎ پێچەوانەو خودوو یاساکا جمهوری ئیسلامیا".
جە ٢٣ۍ ئی مانگێنە دووۍ زینڎانیۍ سیاسی و ئایینیۍ بە نامەکا محەمەڎ قوبادلوی و فەرهاد سەلیمی جە قەنارە دریۍ و ٢٩/١٢/٢٠٢٣ ێچ یەرۍ زینڎانیۍ کوردی بە نامەکا وەفا هەنارەی، ئارام عومەری، ڕەحمان پەرهازۆی چنی زینڎانیێوە تورکی بە نامۍ نەسیم نەمازی جە زینڎانوو ورمێنە بە تۆمەتوو سیخوڕی پۍ ئیسرائیلی جە قەنارە دریۍ.
دژوو جابەجێکەردەی سزاو جە قەنارەدای هێزی چالاکا ۋەرکەوتوو کوردسانی و ئێرانی جە چن وڵاتێوە ئەوروپای و ئەمریکاینە بە گلېرۊبیە و چالاکی جیاجیا ناڕەزایی ۋێشا بەربڕی، داواشا کەردە گلېرگەی میان نەتەوەیی فشارەکاشا پۍ سەروو کاربەدەسا تارانی چڕ کەراوە پەی دمایی ئاردەی بە جابەجێکەردەو سزاو جە قەنارەدای.
جە سەرەتاو ئێساڵیوە تائیسە ٥٨ کەسۍ جە ئێران و ۋەرکەوتوو کوردسانی جە قەنارە دریێنۍ کە بەشێوەشا چالاکۍ سیاسی و ئایینی بیێنۍ و جە ئیسەنە تەرسەو جابەجێکەردەو سزاو جە قەنارەدای چن زینڎانیێوە سیاسی تەری ئینا ئارانە.
جە دماو دەسپنەکەردەو سەرهۊردای ژەنۍ، ژیۋای، ئازاڎیی ژمارەو جابەجێکەردەی سزاو جە قەنارەدای جە زینڎانەکا ئێرانینە بە شێوێوە فرە بەرزبیەنۆ و چالاکا ۋەرکەوتوو کوردسانی و ئێرانی باس چانەی کەرا، دەسەڵاڎدارا تارانی بە پەی چەمتەرسنای گلېرگەی و مرکنایرەی ناڕەزایەتیەکا پەنا پۍ جابەجێکەردەو ئا سزۍ بەرا.
