هونەرمەنڎا تەڤ- چاندی پۍ ڕاپیماو ١٧و شوباتی جە کۆڵن، داواو بەشداربیەیش کەرد  و ئەرەیاۋنێوەش وەڵاکەردۆ. جە ئەرەیاۋناکەینە ئامان: "دەوڵەتا کاپیتاڵیستی، دەوڵەتوو ئەرەگیروو تورکی، بە هیواو دمایی ئاردەی بە قەزیەو کوردی و کوردسانی گرڎوو بەها مرۆڤایەتیەکا پاشێل کەرا. وەڵۍ گرڎ چێوێنە گرڎ حۊڵێوە دیبلۆماسی ئاستەنگ کەرا، دماتەر جە ڕاو پیلانگێڵنیی میان نەتەوەییوە، ڕابەر ئاپۆی بە شێوێوە مافیایی گێرا و مڎاش دەسوو دەوڵەتوو تورکیایۆ، کە قەسەمش سەروو دوژمنایەتی کوردی واردەن. هیواو چەمەڕایشا ئانەبۍ ، بە گێرتەی ڕابەر ئاپۆی، کۊشیای ئازاڎیی گەلوو کوردی تەمام بۆ. بەڵام ڕابەر ئاپۆ و جمیەری ئاپۆیی پەیجوری و ۋەنایۆ عالشا پۍ سەرهۊرداکا وەڵتەری کەردەبۍ. حەجگیز جە گەلی جیامەباو و حیچ هێزێوە مەتاوۆ جە گەلوو کوردی بڕۊشارە.

هەر جە سەرەتاوە، گەلوو کوردی و جمیەروو ئازاڎیی، جە ڕوانگەو ڕابەر ئاپۆیۆ جە پیلانگێڵنی یاوێنە. هیوا و ئامانجوو دەوڵەتوو ئەرەگیروو تورکی و هامکارەکاشا نیا قەبرە. جە گرڎ یاگێنە کۊشیای و مدرامانوو ۋێش فراونتەر کەرد. بە چالاکی ئازاڎیی بانگەوازوو ئازاڎیی جەسەیی و لابەردەی گۆشەگیری ڕابەر ئاپۆی کەرا. دەوڵەتوو ئەرەگیری ماوەو ٢٥ ساڵان بە دەسوروو هامکارەکاش، گۆشەگیریێوە نا ئەخلاقیشا وەرووچەما گرڎوو دنیێوە سەپنان.

دەوڵەتوو ئەرەگیروو تورکی ٢٥ ساڵێن ڕاو چارەسەری دیموکراتیکی وزۊرە. چەکی قەڎەغەکریا ۋەران ۋەر بە گەریلای بەکار مارۆ. کۊکوشی کەرۆ. دەگا و شارەکا کاول کەرۆ. قڕکەردەی سیاسی و کلتوری یاوان بە ئاستێوە وەحشیانە. بەڵام پی هەرماناشە مەتاوۆ دمایی بە کۊشیای ئازاڎیی گەلی بارۆ.

پېسە هونەرمەنڎا وڵاتپارێزی جە کۊشیای ئازاڎیی گەلینە، ئەرک و دەوروو ۋێما مزانمۍ. جە گرڎ چالاکیێوەنە ئینایمۍ چنی گەلوو ۋێما و حۊڵمڎەیمۍ سەرمەشقایەتی کەرمۍ. پۊکەی مشۊم جە چالاکی ١٧و شوباتینە، هونەرمەنڎا و خەباتگێڕا کلتوری گرڎ کار و بەرنامێوە ۋێشا مردنا و واچا: جە ١٧و شوباتینە تەنیا یەک بەرنامە هەن، ئاڎیچ چالاکی تاریخیا پۍ ئازاڎیی جەسەیی ڕابەر ئاپۆی".