تەڤ-دەم سەبارەت بە نۊیەمین ساڵیادوو جینۊسایدوو دژ بە ئێزدییەکا ئەرەیاوناێوەش ئەرەیاونا و واتش" کە پێویسا گلێرگەی میاننەتەوەیی دڎان پی جینۊسایدیرە بنیا و ڕای عاسمانییەو مەنتێقەکەی ڕووەو هجوومەکاو دەوڵەتوو تورکی ئەرەگیریرە وزارە".
جمیەروو گلێرگەی دیموکراتیکی (تەڤ-دەم) بۊ یادکەرڎەیۊ گەشمەرڎاو کۊکوشیی شەنگالی، کە ٩ ساڵۍ چیوەڵتەر سەروو دەساو چەتەکاو داعشینە دژوو ئێزدییەکاو شەنگالیوە کریا، ئەرەیاوناێوەش وەڵا کەرڎۊ.
ئەرەیاوناکەینە ئامان: "ئەوەڵۊ گردوو گەشمەرڎاو ئا کۊکوشییە یاد کەرمێوە و سەرەو رێزی و نەوازشیشا پەی کۊمنمێرە. ٩ ساڵۍ چێوەڵتەر گەلی ئێزدی شنگالنە ڕووبەڕووۍ ئەمرێوە تەرۍ بیێوە و جە ڕاو داعشیوە، کە بە هامکاری هێزە دلێی و میاننەتەوەییەکا هجوومش کەرد سەروو شەنگالی، بە شێوێوە سەرەکی دەوڵەتوو تورکی ئەرەگیری بە هامکاریی پەدەکەی، کە چا سەرڎەمەنە شنگالشا کۊنترۊڵ کەرڎەبۍ، گەلوو ئێزدییشا کۊکوش کەرد. ئامانج چا کۊکوشییەیە نیایرەی تیرۊریستاو داعشی بۍ شەنگالنە، ئینەیچ وەروو ئانەی شەنگال کریۊ بە ناوەندوو هێزی تاریک و خراپەکارەکا پەی گردوو مەنتێقەکەی، پەی دلێنەبەرڎەی میراتی کولتووری و تاریخیی گەلی ئێزدی شەنگالنە.
گلێرگەی ئێزیدی تاریخێوە پەڕ جە وێگێری و خەبات و هەڵوێستی نەتەوەیی و بەها ئینسانییەکاش هەنۍ، پەی پارێزنای میراتی کولتووری و کۊمەڵایەتی ڕەسەنوو ئێزیدی، ئارۊ ئی گلێرگە ئینا وەرڎەموو سیاسەتوو جینۊسایدی و دلێنەبەرڎەینە. ڕێککەوتەی ٩ی تشرینوو یوەمی، تەمامکەرڎەی جینۊسایدی ئیتنیکی دژ بە گەلوو ئێزدیین، چەوسنایۊ جەوهەری و ڕۊحوو ژیونایۊن، پی ڕۊحەیە، مدرامانێوە تاریخیی هامچەرخ پەرەش سانان پەی ئەرەمەرزنای سیستمێکوە دیموکراسی- شنگالنە و دەشتەو نەینەواینە مدرامانێوە تاریخیی هامچەرخ وەڵۍ وزیا. ئی ڕۊحە هێزوو وێش چا قوربانیدایەنە ورگێرتەن، کە تەڤگەروو ئازادیی کوردستانی پەی پارێزنای ئی میراتەیە نیشانەش دان.
ئەم وێگێرییە بی بە ئەوەڵوو شۊڕشێوە هامچەرخی پەی زیندەکەرڎەیۊ گلێرگەی ئێزدی و بنیاتنیای ڕێکوستەکەیش جە ڕاو ئەرەمەرزنای ئەرەمەرزیا دیموکراسییەکاوە، وەشکەرڎەی یەکینێوە مدرامانی، کە تیرۊرشا تێکومەکان دا و شەنگالشا ڕزگار کەرد.
داوا جە گلێرگەی میاننەتەوەیی و ئەنجوومەنوو ئاسایشوو نەتەوە یۊگێرتەکا و ڕێکوزیایە پەیوەندیدارەکا وەرپەرسێن بە پارێزنای کەمینە نەتەوەیی و ئایینییەکا کەرمۍ، جە تەرسۍ و هەڕەشۍ جینۊسایدی، کۊکوشی، پاکتاوی ئیتنیکی و فاڕیای دیموگرافیای، هەرمانە مرۊیی و ئەخلاقییەکاشا بیاونا یاگۍ. هەرپاسە داوا کەرا و هەڵوێستشا بۊ پەی قەدەغەکەرڎەی کایەی عاسمانیی باکوور و وەرکەوتوو سووریای، شنگال، مه خموور و پانیشتوو کوردستانی، کە بەبەرڎەوامی لاو دەوڵەتی تورکی ئەرەگیری و چەتەکاشۊ هجوومش سەرا.
نەتەوە یۊگێرتەکۍ کە دڎان پی کۊکوشییەیرە مەنیا و گەرەکش نییا پەرساوە جە بکەرەکاش، وەرپەرسا چی کۊکوشی و تاوانکارییا کە دژ بە ئینسانیەتی کریا. ئی بێباکییەو نەتەوەیۊگێرتەکا هانی دەوڵەتوو تورکی مدۊ، کە ئەرەگیرییەکاش وافرتەر کەرۊ و خەڵکی زیادتەر کۊکوش کەرۊ".
س.ز
