جمیەرو گلێرگەو دیموکراتیکی (تەڤ-دەم) سەبارەت پا مژاریە ئەرەیاۋنێوەش وەڵا کەرڎۆ و شناسنامەو شۆڕشگێڵن تەکین گۆییش ئاشکرا کەرڎ.

ئەرەیاۋناکەی پی جۆرەنە:

"هەڤاڵما، یۆ جە شۆڕشگێڵنە سەرمەشقەکا کورڎەسانی عیسمەت ئونڤەر (تەکین گۆیی) جە ١٩و ئابو ٢٠٢٤ ینە کاتێ جە شارو قامیشلۆینە ئەرکو ۋێش جە چوارچێوەو خەباتی تەندروستینە درێژە پنە دۍ، جە ئاکامو هرووژمێوە وەحشیانەو دۆڵەتو تورکی ئەرەگیرینە جە ڕاو فڕۆکەی بێفڕۆکەوانیۆ گەشمەرڎە بی.

هەڤاڵ تەکین گۆیی جە شارو شڕنەخینە جە هەرێمو بۆتانی جە ئەڎۍ بیەن، زاوڵەیی و جوانیش جە جوگرافیاو دژوارو کورڎەسانینە ۋییەرنا و شایەتو ستەم و زۆرداری سەرو گەلەکەیش بۍ، پۊکەی قەرارش دا پەی حەقکەردەیۆ جە دژمنی بەشدارو دلۍ ریزەکاو گەریلای بۆ. ساڵەو ١٩٩٢ بە یاردیدای بنەیانەکەیش بەشداریش جە ریزەکاو جمیەرو ئازاڎینەکەرڎ.

هەڤاڵ تەکین ساڵەو ١٩٩٦ ڕوەشکەرڎە مېڎانوو پەروەردەو رابەر ئاپۆی و چا جە ڕاو ئا پەروەردەیۆ کە هورشگېرت بی بە خاوەن هۆشمەندیێوە شۆڕشگێڵنی و رۆحی مڎرامانی قەوەت و بی بە شۆڕشگێڵنێوە زانا. بەتایبەتی دماو ۋینای پەروەردەو رابەر ئاپۆی، جە گرڎ مېڎانێنە نوێنەرایەتی فەلسەفە، هزر و کەسایەتی جەنگاوەری ئاپۆیی کەرۍ.

هەمڕا تەکین ئەرەکۊشای شۆڕشگێڵنی ۋێش جە فرەو ناوچا کورڎەسانینە درێژە پنەدۍ. چا مېڎانانە مڎرامان چنەشانە فرە بۍ، پېسە بادینانی، بۆتان، مێردین، قەندیل، ۋەرنیشت و شەنگال بەشێوێوە کارا بەشداریش کەرڎ. جە ڕاو رەنج و مانیایۆ جە گرڎوو ئا هەرێمانە شۊنەی تایبەتەش دلۍ دڵو خەڵکینە کەرڎۊ. جە گرڎ مېڎانێنە بە دڵسۆزی ۋێش پەی گەلی و بە قەرارداری شۆڕشگێڵنیوە ئشناسیێوە.

سەرەڕاو ئانەی جە جەنگەنە قاچی چەپش جە دەسدابۍ، بەڵام ئا ئاژە جەستەییە نەتاواش ئەرەکۊشای شۆڕشگێڵنیی ئاڎیی مردنۆ، بە پێچەوانۆ، بە جۆش و خرۆشێوە گۆرەتەرۆ، باوشیش کەرڎۆ بە ئەرەکۆشای ۋێشەرە و ئەرکە شۆڕشگێڵنیەکێش درێژە پنەدۍ.

 

ساڵەو ٢٠١٤ کاتێ چەتەکۍ داعشی پەلامارەو ۋەرنیشتیشا دا سەرو داواو رابەر ئاپۆی پەی ئاماڎەکاری، هەڤاڵ تەکین بێ دووەدڵی رووەش کەرڎە کۆبانێ. چا پېسە فەرماندێوە بە تەجروبەی جە بەرەکا وەڵێوە جەنگینە مڎرامانش کەرڎ و بەشدار بۍ.

دماو شکسو داعشیچ جە لایەنو جەنگەوانا ئازاڎیوە، جە فرەو کۆششا خزمەتگوزاری و کۆمەڵایەتینە سەرمەشقایەتیش کەرڎ. چی دماییەنە جە کۆششی تەندروستینە بە شێوێوە کارا بەشداربۍ، خزمەتگوزاری تەندروستی پێشکەش بە هەمڕاکاش و گەلەکەیش کەرۍ و چی قۆناغەنە هەوڵ و مانیایی فرەش کێشت.

جە ١٩و ئابو ٢٠٢٤ینە کاتێ جە شارو قامیشلۆینە خەباتی تەندروستی درێژە پنەدۍ، جە ئاکاموو هرووژمێوە وەحشیانەو دۆڵەتو تورکی ئەرەگیرینە بە فڕۆکەی بێ فڕۆکەوان گەشمەرڎە کریا.

هەڤاڵ تەکین؛ بە بەشداربیەی، هەڵوێس، ئەرەکۆشای و شکۆمەنڎی ۋێش فەرماندێوە بۍ کە نامۍ ۋێش بە کەلیمۍ ئاڵتونیە جە تاریخو ئەرەکۊشای شۆڕشو کورڎەسانی و گەلا هەرێمەکەینە نویستۆ. شۆڕشگێڵنێوە بێهامتا بۍ و یاڎو ئاڎی، گرڎ کاتۍ جە ئەرەکۆشای گەلانە بە زیڼەیی مەنۆوە.

جە کەسایەتی هەڤاڵ تەکینینە قەولو حەقکەردەیۆ بە گرڎوو گەشمەرڎا مڎەیمۍ و ئاواتو ئا گەشمەرڎا مارمێنە دی و ڕاپیمای رابەرایەتی ئازاڎ، کورڎەسانی ئازاڎ بە سەرکۆتەی تاجدار مکەرمۍ. سەرو ئا بنەمایۍ ئێمە سەرەوەشی جە بنەیانەی فرە بەقیمەتو هەڤاڵیما تەکینی، گەلی وڵاتپاڕێزنو بۆتانی و گرڎوو گەلا هەرێمەکەی مکەرمۍ. ئەرەکۊشای و فیداکاری ئاڎیی مبۆ بە رابەر و ئیلهامبەخش پەی ئێمە".

جە دما دمایی ئەرەیاۋناکەینە زانیاری جە بارەو ئشناسنامەو تەکین گۆیی ئاشکرا کریان:

نامۍ / عیسمەت ئونڤەر

ناسنامۍ/ تەکین گۆیی

نامۍ ئەڎۍ/ سەبیحە

نامۍ تاتەی/ محەمەد

شۊنەماو کاتو جە ئەڎابیەی: شڕنەخ-٠١-٠١-١٩٧٦

شۊنەماو کاتو بەشداربیەی: قلەبان-شڕنەخ-١٩٩٢

شۊنەماو کاتو گەشمەرڎەبیەی: قامیشلۆ- ١٩-٠٨-٢٠٢٤