جمیەروو گلێرگەی دیموکراتیک (تەڤدەم)ی سەبارەت بە زیادبییەی هجوومەکاو دەوڵەتوو تورکی ئەرەگیری دژوو هەرێمەکاو سەرنیشت و وەرکەوتوو سوریای و کورڎسانی و ڕووەدایەکاو پانیشتوو کورڎسانی، ئەرەیاوناێوەش وەڵا کەرڎۊ.

ئەرەیاوناکەینە ئامان: "جە هەرێمەکاو چێروو کۊنترۊڵوو پارتی دیموکراتوو کورڎسانی (پەدەکە)ینە، کەرڎەیئامانجوو نویسنگە و نوێنەرایەتیی کەنەکەی کرڎەوێوە تەرسنۊکانەن. هامکاریی پەدەکەی چا هجوومەنە، گورزێوەن دژوو هەوڵەکاو سازکەرڎەی یۊبییەی نەتەوەیی کورڎساننە.

تەڤ-دەم ئاماژەش پانەیچە کەرڎەن، کە دماو سەرکەوتەی هەڵمەتەو "پتەوکەرڎەی ئاسایشی" کە لاو قەسەدەیۊ لوا ڕاوە و هەرپاسە شکستوو پیلانگێڵنییەکا پەی وەرفراوانکەرڎەی بەرەو جەنگی، دەوڵەتوو تورکی پەی هەقسانایۊ، چندین مەنتێقێش بە فڕۊکەی بێفرۊکەوان بۊردومانۍ کەرڎێنۍ و بییەن بایسوو گەشمەرڎەبییەی فرەو هاموەڵاتە مەدەنییا و ڕاوەبەرە سەرمەشقا، کە وەراوەروو تیرۊروو داعشی و پەشتیوانەکاشانە جەنگشا کەرڎەن.  

ئەرەیاوناکەینە ئامان، "دەوڵەتوو تورکی فاشیستی جە وەڵیوەلوای ئیرادەی بیرڎۊزیی گەلاو هەرێمەکەی و یۊگێرتەییشا تەرسۊ و هەستش کەرڎەن، کە ئا یۊگێرتەییە  تەرسینە پەی سەروو پلانە ئەرەگیرکارییەکاش.

ئا دەوڵەتە چارەسەری ئاشتییانە و دیموکراتیک پەی کێشەکاو دلێش مەویزۊوە، مەتاوۊ جبەرۊ وێش پارێزنۊ، چون نەژادپەرس و ئایینپەرسا و پەشتیوانی جە تیرۊریش کەرڎەن بە بنەمێوە پەی وێش، تا یاوان ئاستێوە کە بۊ بە ناوەندێوە چانە، کە هەڕشۍ سەروو هێزە سیاسی و نیشتمانی و هەرێمی و میاننەتەوەییەکا وەش کەرۊ. بەداخۊ هێزە میاننەتەوەییەکۍ پەشتیوانی چا دەوڵەتە شوومەیە کەرا، ئادیچ ئا پەشتیوانییە قۊزۊوە و ڕاشۊ تاوانەکاش شارۊوە، بێباکانە و بە چەپەڵی هجووم کەرۊ سەروو ئیرادەو گەلاو سەرنیشتی و وەرکەوتوو سوریای، شەنگال و هەرێمەکاو پارێزنای مێدیای. لە دمانموونەیچنە هجوومش کەرد سەروو نویسگەو نوێنەرایەتیی کۊنگرەو نەتەوەیی کورڎسان (کەنەکە)ی، کە چەترەو ئیرادەو گەلانە دلۍ هەولێروو پایتەختوو پانیشتوو کورڎسانینە. ئانە بەرش وزۊ، کە چندە تۊڕەو هەواڵگێری و سیخوڕیی میتی شارەکەنە بڵاوەنە و چندە یاگەکاو چێروو پەدەکەینە باڵادەسێنۍ. وێش پەدەکە هامکارشا و وێش تەسلیموو دەوڵەتوو تورکی ئەرەگیری کەرڎەن. کەرڎەیئامانجوو نویسگەکەی کرڎەوێوە تەرسنۊکانەن. هامکاریی پەدەکەی گورزێوەن دژوو هەوڵەکاو یۊبییەی نەتەوەیی کورڎسانی.

تەڤدەم بەشێوە تەروو ئەرەیاونایەکەینە بێدەنگی و بێهەڵوێسیی گلێرگەی میاننەتەوەیی و هامپەیمانیی میاننەتەوەیی دژ بە داعشی، وەراوەروو تاوانەکاو دەوڵەتوو تورکیوە شەرمەزار کەرڎەن و واتش "پا بێدەنگیەیشا با مایۍ هامبەشیی سیاسەتوو جینۊسایدی و بێدەنگیەکەیشا نیشانۍ ڕازیبییەیشانە پا کرڎەوا".

ئاخروو ئەرەیاوناکەی تەڤ-دەم ینە ئامان: "داوا وەنەو گەلەکەیما کەرمۍ گرد یاگێوەنە دەسکەوتەکاشا پارێزنا، وێشا سەروو بنەماو جەنگی شۊڕشگێڵنی خەڵکی ڕێک وزا".

س.ز