تەڤگەری ئازاڎیی بۆنەو ئامایۆ مانگەو ڕەمەزانیوە، مبارەکباییش جە تەماموو موسڵمانا کەرد و ئەرەیاۋناش، "داوا جە باوەڕدارا کەرمۍ، چی مانگێنە پەیاموو ئاشتیی و پێوەرە ژیۋای قوڵ کەراوە، ڕۊچۍ و دوعاو گرڎ کەسۍ با پۍ دماییئاردەی بۆ بە ستەموو دەوڵەتە ئەرەگیرەکا ".
دەسەو ڕاوەبەری تەڤگەروو ئازاڎیی گلێرگەو کوردسانی، جە بارەو ئامایۆ مانگەو مبارەکەو ڕەمەزانیۆ ئەرەیاۋنێوەش وەڵاکەردۆ.
تەڤگەری ئازاڎیی جە سەرەتاو ئەرەیاۋناکەینە، ئامای مانگەو ڕەمەزانی مبارەک کەرۆ جە تەماموو موسڵماناو کوردسانی و جەهانی، حەرپاسە هیواو خێرۍ و ئاشتیی پۍ گرڎوو جەهانی موازا.
حەرپاسە داواش جە زانایا و باوەڕدارا حەقواچی و نیشتیمانپەروەروو کوردسانی کەردەن و ئەرەیاۋنانش: "جە مانگەو ڕەمەزانینە پەیاموو پێوەرە ژیۋای و ھامکاریی قوڵ کەراوە، گەلی جە فێڵ و تەڵەکەو ساختەکاریی دەسەڵاتە ئەرەگیروو فاشیستەکا هۆشیار کەراوە، ماناو مانگەو رەمەزانی، ئارامیی و ئاشتیی و دادپەروەریی و ئاسوودە بیەی ڕۆحە پاک و ڕاسەکان، ڕاو لوایۆ پۊرە و ۋێپارێزناین، جە گرڎ خراپیی و غەڵەتێوە"".
جە دمادمایچەنە دەسەو ڕاوەبەری تەڤگەری ئازاڎیی گلێرگەو کوردسانی ئاماژەش پانەی دان، "ڕۊچۍ و دوعاو گرڎ کەسۍ، با پۍ دمایی ئاردەی بۆ پا ستەمەی، کە دەوڵەتە ئەرەگیرەکۍ کوردسانی، بە نامۍ دینیوە یان بە نامۍ نەتەوەگەراییوە سەروو گەلوو کوردسانیرە سەپنانشا".
