ئامەدەنە بە سەرمەشقایەتی ڕێکوستەیەکا دەم پارتی و دەبەپەی و تەڤگەرو ژەنا ئازادی (تەژەئا)ی بە درووشمۆو "نا پەی قەیومی، دیموکراسی" دژو نیایرەو قەیومی جە شارەوانییەکاو مێردینی و ئێلحی و خەلفەتی، ڕاپیمایۍ جەماوەری ئەنجامدریا. هامسەرۆکۆو گرڎینەو دەم پارتی تولای حاتەم ئۆغۆللاریە و هامسەرۆکۆو گرڎینەو دەبەپەی چیدەم کلیچگون ئوچارە و هامسەرۆکاو شارەوانی مێردینی و ناوچەکا دەوروبەری و نوێنەرا پارت و ڕێکوزیاکا چنی هەزاران هاموڵاتیا بەشدارۍ بێنۍ.

هامسەرۆکۆو گرڎینەو دەم پارتی تولای حاتەم ئۆغۆللاریە ئەرەیاۋناش تا بەرکەردەی قەیومی چی خاکە پیرۆزەنە مڎرامان مکەرمۍ، جەختش کەرڎۆ، ئەرەکۆشایشا دژو قەیومی جە گرڎ یاگێنە و جە گرڎ مېڎانێنە بەردەوام مەبۆ، تا بەرکەردەی قەیومەکا ئەرەکۆشایشا گۆرەتەر مکەرا.

سەرنجش وست سەرو گۆشەگیری ڕابەر ئاپۆی، ئەرەیاۋناش کۆسپی گۆرە ۋەردەمو دیموکراتیکبیەو تورکیاینە چارەسەرنەکەردەی ئاشتییانەو پرسو کوردین، واتش: "پېسە دەم پارتی ماچمۍ، با گۆشەگیری هۆرگیریۆ و بەڕێز ئۆجالان ئازاڎ بۆ. ئارۆیچ سەرۆکو مەهەپەی بەشێوەی جیاواز باس چینەی مکەرۆ. گەرەکشانە جە ئامادۆ پەیامی ڕۆشن بڎەیمۍ بە ئەنقەرەی و تورکیای و جەهانی، ئێمە لایەنگرۍ چارەسەری ئاشتییانە و دیموکراسییانەو پرسو کوردینمۍ. پېسە دەم پارتی پەی چارەسەری ئاشتییانە و شکۆدارو پرسو کوردی، ئەرەکۆشمۍ ئێمە واتما ئینایمۍ چنی دیالۆگی و گفتوگۆی کراوەی پەی پرسو کوردی. ئێمە ئاماڎێنمۍ پەی گفتوگۆی و ئاشتیێوە شکۆداری ئاشکرای".