عومەر سۊفی هونەرمەندی شارەزا بواروو فەرهەنگ  و مەقاماتوو زاگرۊسینە پەی ئاژانسوو هەواڵوو فوراتی قسێش کەرڎۍ سەروو ڕەسەنیی فەرهەنگوو زاگرۊسی و هەوڵەکاو دلێنەبەرڎەی و ئەرەگیرکەرڎەی ئا کولتوورییە لاو ئەرەگیراوە.

نامێبریا ئەوەڵوو قسەکاشنە باسوو ڕەسەنیی فەرهەنگوو کوردیش کەرد و واتش: دەورێوە گرنگش هەن و کاریگەرییش هەن سەروو وەرکەوتوو دلێڕاسەی و وەرنیشتیچ. هاموەخت دەسێوە باڵا هەن پەی دلێنەبەرڎەی و ورشانایۊ کولتوورەکەیمان. نامێبریا جەختش چانەیچە کەرڎۊ پێسە چەنی وەڵاتەکەما بەشبەش کریان و چێرچەپۊکا و هونەرەکەیچما پاسنەن."

عومەر سۊفی ڕەئییەش چانێنە کورد بێی بە ساعیبوو کیانێوە سەربەوۍ مافەکێش دەسۍ کەوتێنۍ و زانێش کورد چکۊوە هەن کاریگەرییشا چکۊ هەن، تاوێنمۍ کاریگەریی کولتووروو کوردی فرەو وەڵاتاو دنیێنە وێزمێوە.  

ئەو شارەزاو بواروو فەرهەنگ و کولتووری نامۍ ئامێرە موزیکییەکا پێسە  بەڵگەی مارۊوە، کە ئا ئامێرۍ نیشتیمانۍ ڕەسەنیانۍ کورڎسانیێنۍ و ماچۊ:" بواروو هونەروو نامۍ ئامێرە موزیکییەکا شایەتوو ئانەینۍ، کە ئا ئامێرۍ کوردیۍ نیشتیمانیۍ ڕەسەنێنۍ هینۍ کورڎسانینۍ، وەلۍ ئیساتۍ گردوو دنیێنە وەڵی بیێنۍ، پێسە ئامێروو دووزەلۍ، جە دووە زۍ یان دووە زەلی کوردییوە ورگیرییان، چونکە ئامێرەکە دووۍ قامیشا پێک ئارڎەن. ئامێروو کەمانی کە نامەکێش چا بەشە قەوسەیۊ ورگێریینە، کە بەکار مۍ پەی ژەنای، نامەکێش جە قەوسوو کەمانیوە ئامێنە. ئامێروو جۊزەی جە داروو وەزۍ وەش کریان و خڕا، عەرەب پ ماچۊ جۊزە، نامۍ جۊزەیچ جە وەزێوە ئامان کە کوردییەنە.  

 دەربارەو سەرسامیی ئەرەگیرا بە کولتوور و  فەرهەنگوو مەنتێقەکەی عومەر سۊفی ماچۊ:" وەختۍ ئەسکەندەری مەکەدۊنی گەورە هجووم کەرۊ سەروو وەڵاتوو ئاریانی بە ئەرستۊی فەیلەسووفی ماچۊ: (ئجیام گرد ئارڎەینێوە ئینا لاو تۊوە، وەلۍ ئارڎەینە و کولتوورئینا وەڵاتوو ئاریاینە) کە مەبەست کەوانەو زاگرۊسی و کورڎسانین.

  ئاخروو قسەکاشنە زیاتەر تیشکی وزۊ سەروو دزیەی ئەرەگیریی ئا کولتوورییە، کە لاو دەوڵەتە ئەرەگیراوە دژوو گەلوو کوردی و کولتوورەکەیش هەن و ماچۊ:" وەروو دۊڵەمەندی و ڕەسەنیی ئی مەنتێقەیە، کە گردوو دەوڵەتە سەرڎەسا گەرەکشانە کورڎسانی پارچە پارچە کەرا و کولتورەکەیشدزا، پەی نموونەی ئیبراهیم تاتڵیساس وێش کورڎا و خەڵکوو ئورفەو سەرنیشتوو کورڎسانین، وەلۍ لوان خزمەتوو ئەرەگیراوە  گردوو بەرهەم و مەقامەکاو کوردیش بەرڎێنۍ و کەرڎێنێش بە تورکی بۍ ئانەی ئاماژە پانەیە کەرۊ کە کوردییۍ ڕەسەنێنۍ، یا تورکەکۍ یان بە نامێوە تەرۊ دیکە تەتەرەکۍ وەختۍ چەنی مەغۊلەکا گژیێنۍ ئامێنۍ مەنتێقەکە، دەسشا ملوو کولتووری ڕەسەنوو مەنتێقەکەیرە گێرتەن، با پرسیارە کەرمۍ ئا کولتووروو ئیساتۍ تورکیانە هەن ئایا چیننە هەن، کە نیشتیمانی ڕەسەنوو تورکەکان؟ بێگومان نییا."

س.ز