ئەندامەو کەژاری وریشە مورادییە وەڵێ ئەرەنیستەی دادگاینە نامیوەش پەی ڕای گردینی وەڵا کەردەبێوە و ئەرەیاونابێش:" ژەنی ئاراستەو تاریخوو ئی وەڵاتەیە منەخشنا و فەلسەفەو 'ژەنی، ژیوای، ئازادی'ی دنیارە وەڵامکەرانێوە.
ئەرەنیشتەی دۆسیەو ئەندامەو کۆمەڵەو ژەنە ئازاداو وەرکەوتوو کوردسانی (کەژار)، وریشە مورادییە، کە قەرار بێ٢٨و ئابینە لەقوو ١٥مینوو دادگاو شۆرشی ئیسلامینە بکریۆ، بۆنەو ئامادەنەبییەی نوینەروو داواکاری گردینی و ڕاوێژکاروو دادگایوە دادوەر عاموزادەی دما وزیا.
وریشە مورادییە وەڵێ ئەرەنیشتەیەکەینە نامێوەش پەی ڕای گردینی نویستەبێ، باسوو ئانەیشە کەردەبێ،کە بە نوێنەرایەتیی ئا ژەناوە کە مکۆشیا، ملۆ وەردەموو دادگای و تا ئاخر داکۆکی جە پەیلوای وێش مکەرۆ.
نامەکەو وریشە موردایێ پێسنەنە:
"من وریشە مورادییە ئابوو ٢٠٢٣ێنە وەختێو کرماسانۆ پەی سنەی لوێنا، هیزەکاو ئیتلاعاتی گێرتانێ و زیندانوو سنەینە و بەشوو ٢٠٩ینە زیندانوو ئێڤینینە پەی ماوێوە،ئەشکەنجە دریانێ. ٢٧و کانوونوو یوەموو ٢٠٢٣ێوە ڕوانەو بەشوو ٢٠٩و زیندانوو ئێڤینیشا کەردا.ئەشکەنجە دریانێ و ئاشنێ بیا بە ئێشو ئا ژەنا، کە تووشو تەنگوچەڵەمەی بانێوە. وەختێوە بەشوو ژەنانە مەنانێوە، جەنی ئا ژەنا کە ڕازێ ناخورووژنێشا بێنێ پەیوەندییم وەش کەرد، من ئینانێ چەنی ژەنا و گرد وەختێ وێم چەنی ئا ژەنا قوربانیی پیاسالارینێ مویەرنوو. سیستمێوە کۆمەڵایەتی، نەریتی و تارێخوو ساعیبوو سوپاێوە کۆلۆنیالیستیێ کە ماچۆ' بەهەشت ئینا چێروو پایاو ئەدێنە' و بەهەشتی تەنیا چوارچوەو خزمەتکەردەی ژەنانە بەکار مارۆ.ئانێ دژوو سیستمی مدرێنێوە و دژو سیاسەتوو کۆلۆنیالیستی و جینۆسایدوو ژەنا مکۆشیا ئێمەنمێ.
پیری زانا واتەبێش، "ژەنی یوەم نەتەوەی ئەرەگیرکریێنێ". ئێمەیچ پێسەو گەلوو ئی نەتەوە ئەرەگیرەیە،مزوان، ئاین، باوڕما چێش بۆ با بۆ، ئێمە گیانێوەنمێ جە یەک جەستەنە. دژوو ئا زیندانییا، کە مامەڵەی نائینسانانە و ستەمکارانەشا چەنەن، لایەنی مرۆیی ئێمە پێسەو چرۆی مکریۆوە و هێزوو ژەناو ئێمە جە تاقیکەردەیوەئینسانیەتینە بەسەرەبەرزی ئامینێ بەرۆ. چی وەختەنە تارێخ هورمگێڵیۆوە، ئا 'نەتوە کە ئەوەڵ جار ئەرەگیر کریا' وێش مەدۆ دەسوو چارەنویسوو شمشێرەو چارەنویسیوە و کۆشیای ژەنا تاریخەنە میاوۆ ئاستێوە تەر. ئێمە پیوە شانەبەشانەو یۆترینی دژوو ئانەیە کە ڕووە مدۆ بە یەکڕیزیێوە کە تەنیا ژەنی متاوانێ نیشانەش بدانە، وەرگێری ڕووەدایەکا مبیمێوە. ئێمەیچ ئینسانێنمێ، ئاوات، نەریت پەروەردە و جووڵەما جیاوازا. حەرکامما سەرباروو جیاوازییەکاما هەمان وەختەنە وەراوەروو ستەمیوە کوێنمێ و یەک ڕۆح و هەڵوێست و دیای و هاوارنمێ وەراوەروو نەژیوای سەپیاینە.
ئیرادەو ئانەیما هەن،کە ئیژیوایە ئامێتەو ئازادیی بکەرمێ،ڕژدێنمێ کە تاجوو ئازادیی سەروو سەرەو ئی ژیوایە دژوارەیوە بنیەیمێرە.ئی یەکانگیرییە جوانە کە بە درێژایی ئەزموونی یەک ساڵەو ویەردەی دیما،پێوە سازما کەرد. ئێمە بناغەمجەرێ شێوازێوە ژیواینمێ کە ئێمەی ژەنانە و هەمان وەختەنە ئینسانبییەینە دزیابێ. دوژمناو ئینسانی، پیاسالاریی چەمشا ئینا دەسەڵاتیوە. دەسەڵات چەمێش بڕیێنێ بەرژەوەندیی زیاتەری،تا ئیساتێ ئینسانیەتشا یاونان دۆخێوە کە ئیتر نەک چەنی هامچەشنەکاش، بەڵکوم چەنی ئاژەلی و ڕووەکی و دارسانی و سروشتیچ کەوتەن دژایەتی و ئینەیچ ئەوەڵۆ ڕاو دوژمنایەتیکەردەیوە چەنی ژەنا دەسش پەنە کەرد. ئێمە ئەوەڵ ئی لادای و لاڕارەلوایەما دیۆ، سوورێنمێ سەروو ئانەیە ژیوای بوزمیوە سەروو ڕارەوو وێش. بەدڵنیاییوە پیسەو ئادۆرنۆ ماچۆ"ژیواێوە درووس و خاس، ناوازە و ئازاد" مخولقنمێ.
بییەیما، ژیوایما، هەناسەکێشایما دلێ ئی دیوارانە یاگێ مشتەو هەزارا کۆشەراش ئینا پۆوە، پەی ئا مەبەستەیە. حەرهەڵوێستێوەما،هەرمانێوەما، بە ئاراستەو ئی یۆبییەی و یەکڕیزییە کە بە دەوروو ئەوینیما پەی "ژیوای ئازاد"ی شێوەگیر بییەن. نادادگا سزا بەرمکەرۆ، فشار وەش مکەرۆ، سیستموو زیندانی دلێ سنووردارکەردەیمانە سنووردارتەکەردەیمانە، سنووردارتەرما مکەرۆ. هەرمانبەدەسێ ڕەفتاری وەڵێنە بەرنامەسازی ئازاربەخشما نیشانە مدا، وەلێ ئێمە کە هاگادارێ ئی بابەتەینمێ هەست و زانیاریما وەراوەروو سەردەمیوە هەن. مزانمێ ئانێ چێروو فشاروو جەماوەرینە کەوتێنێ چە دۆخێوە، جە ڕاسەڕاو وێمانە ملمێ وەڵێوە.ژەنی پێسە تارێخوو ئی نیشتمانەیە وەش مکەرا،پێسە مۆرەو "ژەنی، ژیوای، ئازادی"ی جیهانەرە وەڵا مکەراوە و ئا مۆرێ وەنەو ژیانو وێشا مدا.
بە درێژایی ئی ڕێ بە وەرەچەمگێرتەی یۆگێرتەیی هەنگامێ منیەیمێ و منیچ بەشێوەنا جە ئی گلێرگە زیندانیکریایە. ڕۆو ٤و ئابی پێسەو ناڕەزایەتیێوە وەراوەروو سزاو ناداپەروەری دژ بە شەریفە محەمەدییێ و پەخشان عەزیزیێ، ئەرەیاونابێم،کە نمەلوو وەردەموو دادگای و نەلانێ و وەرگێریینامەکەم ئاراستەو ڕای گردینی کەرد، واتم چونکوم ئی نادادگا پەی ژەنە بەنرخە چینیشا سزای چینێ بەرمکەرۆ، کە پەی ژیوای گژییێنێ، ئینەیچ دەرفەتێوە بێ تامن نوێنەرایەتیی ئی کۆمەڵە زیندانییە بکەروو و جە دیای ئینسانی و هامڕاییماوە،ناڕەزایی وەراوەروو ئی سزێ بەروزوو.
ئەگەر جیای من حەر ژەنێوە تەرە، ئی ویرۆکەردەیشە بیێ، پێسە هەنگامە نیێ. ئەرەنیشتەی دادگایم دما کەوت و ئیساتێ جارێوە تەر وەردەموو ڕاوەلوای ئەرەنیشتەێوە تەرینە هەنا. قەرارم دان ئی جارە پێسەو کەسێوی کە فەلسەفەو " ژەنی، ژیوای، ئازاد"یم تێکەڵوو ژیوایم کەردەن، بە ئیرادەو وێم و پەی سەلەمنای ڕەوایەتیی وێم و بەرزمردنای یادوو گردوو ئانیشا گیانشا پەی داواکاریی ژیوای ئازادیی جەدەس دان،وەردەموو دادگاینە موونە. گێرا فرسەتوو قسەکەردەیم نەدانە، گێرا حەر ئاماولوایم پەی دادگای پێسەو بەشیوە جە پڕۆسەو دادگاینە تۆمار بکەرا، مزانوو کە ئی فرتوفێڵە یاسایێ بە ئاسایی بکریانێ بەڵام پیسە چەنی نەلایم پەرسێوە کەسییە نەبێ، لوایچم بابەتێوە کەسی نمەبۆ. من بە نوێنەرایەتیی ئی کۆشەر و ئازادیوازا وەردەموو دادگاینە ئامادە بوو. چە مافوو قسام بدا، یان نا، مدرای و ئامادەبییەیم چاگە هێماو ئامادەبییەما. ئیرادەما پەی مافوازی و دادوازی و یەکسانییوازییا. ئێمە حەریاگێوەنە بیمێ یەک هەڵوێستما هەن و ئانەیچ ئینسانبییەی و ئازادی و جوانیین. چە ئا وەختە جوانتەرین سرووشتەنە بێنا و چە ئا وەختە دۆزەخوو جەنگینە وەراوەروو تاریکیی داعشیوە بێنا. چە ئا وەختە ئازادانە کۆشیێنا،چە ئیساتێ کە جە کۆت و زنجیروو سیستمێوە نایاسایینە هەنا. ئینانی سەروو هەڵوێستی ئازادیوازانەو وێم و سەروو ئاب هەوڵوێستەیچە ممەنووە، مشۆم هەڵوێستی ژەنانە مۆرەی دماینە بۆ جە کۆشیاینە دژوو ستەموو پیاسالاری و سەرکەوتەی بکەرۆ بە سەوقاتوو ئینسانبییەی.
ئینسان سەرمگنۆ...
ژەنی، ژیوای،ئازادی...
وریشە مورادییە بەشوو زیندانوو ژەناو ئێڤینی."
