ویەردەو ٦ساڵا ملو گاڵتەچاڕی ڕیفراندۆمەکە و بەرزانیرە
مەسعود بارزانی بییەن بە کەواسوروو سووپا ئەرەگیرەکۍ تورکیای جە دژو ئاخێزوو وەڵینگەو کوردی جە وەرکەوت و سەرنیشت و وەرنشین و کورسانی.
دماو وێردەو ٦ ساڵا ملو ئەنجامداو ڕیفراندۆمە شکس واردەکەو پانیشت و کورسانی، بە پیشەنگایەتی کەردەو بەرزانی، تا بە ئارۆیج لێکەوتە خرابەکیش سەرو کۆ لایەنەکا و ژیواو گلېرگەو پانیشتیۆ بەردەواما. کاروەدەسا پانیشتی تا بە ئارۆیج فرە دوورېنی چانەی کە یاوانێوە فکری و سیاسی قوڵشابۆ پەی پرس و ئازادی نەتەوە کەیشا. سەرەڕاو تەمام و ئا وشیاریا کە هەم جە دلی گلیرگەو کورسانینە و هەم سەرو ئاست و سیاسەت و نێودەوڵەتینە؛ ئاگاڎاری دریا بە بارزانی پەی ئەنجام نەڎای ڕیفراندۆمی، بەڵام هەرزەیی سیاسی ئی ئینسانەیە فرە بێمنەتانە جە وەرانوەرو گرد ئەرەیاوناکا دنیېوە، قەرارو ئەنجامدای ڕیفراندۆمیش کەرد، بەبێ ئینەی هیچ یاواینێوەی فەلسەفیش پەی ڕاستینەو وەڵینگەو کوردی بۆ کە جە هەناو ویشەنە کوردبییەی سیسەم و دەوڵەت نەتەوەی قبوڵ مەکەرۆ. کەمۍ نییەنۍ ئا ڕۆنامە نوویس و سیاسیۍ کە پاگېرتەیرەو مەسعود بارزانی پەی ئەنجامداو ڕیفراندۆمی، بە فیت و دەوڵەت و تورکیای زانېنی. هەرچی ڕۆڵ و لایەنەکا تەرو پانیشتیچ بی جە تەماشاکەرێوە زیاتەر نەبی. یۆتەر چا ئامانجا کە بەرزانی چێرو نامی ڕیفراندۆمینە پەنەش ورئێست، دایوەنەی بی جە پیگەو جەماوەریەکە و یەنەکەی بەتایبەتی جە کەرکوکەنە، بەبێ ئانەی کە یەنەکە هەست پی سیاسەتە قێزەونەو بەرزانی کەرۆ.
بەر ئەنجام و ڕیفراندۆمی جە دەسداو ٥١٪ و خاک و پانیشت و کوردسانی بۍ. کیشیایۊ و هیزو پیشمەرگەی جە دلۍ شارو کەرکوکی و دوز خورماتو یو گوڵاڵەی تا بە شەنگال یۆتەربی چا لێکەوتە خراپا ڕیفراندۆمی. پێگەو کوردی سەرو ئاست و مەنتیقەکەی و سیاسەت و دنیۍ وەڵی ڕیفراندۆمینە فرە بەهێزتەربی. پەلامارداو حەشدی شەعبی پەی سەرو خاک و پانیشت و کوردسانی هەم وەخت و پەلاماردا ی سووپا ئەرەگیرەکۍ ڕژیم و تورکیای پەی سەرو عەفرینی جە وەرنیشت و کورسانییەنە. ئینەیج ئاڕاسییەما نیشانە میۆ کە بەرزانی بە فیت و دەوڵەتی ئەرەگیرو تورکی پەی لاوازکەردەو گلیرگە و سیاسەت و کوردی ئەرکدار کریان.
جە دماو ئەنجامداو ڕیفراندۆمە شکس واردەکەو بارزانیۆ، پێگەو پانیشت و کورسانی سەرو ئاست و سیاسی و سەروازی و ئابووری تەمام لاواز بییەن، بەجۆرێ بارزانی کە بانگەشە و سەربەخۆ بییەو پانیشت و کورسانی بە هامسا دەوڵەت و ئێراقی کەری، وە مۆرەو خیانەتی ئەو دلی چەما و هەر هێزو لایەن و کەسایەتێوە کوردی دی کە چەنی گاڵتەچاڕی ڕیفراندۆمی نەبێ، کەچی دماو ڕیفراندۆمی، بەرزانی پیسەو هەرمانەو گرجارێش فرە زەلیلانە جە کاروەدەسا ئێراقی لاڵیوە تا بەرەو گفتووگۆی نەوزارە، تا بە ئارۆج بەرزانی بە ویش و مەسروری کوڕش و نێچیری برازایشۆ، چەمەڕوانی خەیرو سەدەقە و دەسو کاروەدەسا بەغاینۍ. هەمان وەختەنە بییەن بە کەواسوورو سووپا ئەرەگیرەکۍ تورکیای جە دژو ئاخێز و وەڵینگەو کوردی جە وەرکەوت و سەرنیشت و وەرنشین و کورسانی.
