ئەنڎاموو کۊمیتەو ناوەنڎی پەکەکەی جەمال شەریک ئەرەیاۋناش، ئا هېزۍ کە پاڵپەشتی جە کودەتاو ١٢ و ئەیلولی کەرېنۍ و ئانۍ پاڵپەشتی جە دیکتاتۊریەتی ئاکەپە-مەهەپەی کەرا هەمان هېزېنۍ و ۋاتش"ئامانجوو ئا هېزا قڕکەرڎەی کورڎان"
ئەنڎاموو کۊمیتەو ناوەنڎی پەکەکەی جەمال شەریک بۊنەو ساڵیاڎوو کودەتای سەروازی ١٢ و ئەیلول و ١٩٨٠ یۊ هۊرسەنگنایش کەرڎ.
جەمال شەریک ۋیرش ئارڎۊ کە ٤٣ ساڵۍ سەروو کودەتای فاشیستی ١٢ و ئەیلولی-رە ۋیەرۊ و ۋاتش،"وەختۍ پەیوەنڎی بەینوو ئازاڎیی ڕابەر ئاپۊی و ئازاڎیی کورڎسانی دەسنیشان کریا، مشۊم کۊشیای دژ بە دیکتاتۊریەتی ئاکەپە- مەهەپەیچ بە شېۋېوە یۊگېرتە هۊرسەنگیۊ، کە ئاژەی تازەو کودەتای کۊلۊنیالیستی سەروازی ١٢ و ئەیلول و ١٩٨٠ یا".
شەریک باسش چانەی کەرڎ کە ڕابەر ئاپۊ جە ئیمڕاڵی ئینا دلۍ گۊشەگیریۍ قورسینە و ۋاتش،"دلۍ ئا ئاژەیچەنە ۋېش پېسە ئازاڎتەرین ئینسان و جەهانی مۋینۊ. ئانە جە یۋەم هەنگامەو سەرەتایی جمیەری ئاپۊییچەنە، دلۍ ئاژەو کودەتای فاشیستی سەروازی ١٢ و ئەیلول و ١٩٨٠ ینە بە هەمان جۊر بۍ. ئەگەر ڕابەر ئاپۊ پېودانگە ڕاستەقینیەکېش ۋېشەنە جا بەجۍ نەکەرڎېنۍ، ئاخېزوو کورڎسانی جە ئارۊنە نەتاوۍ پا ڕادە وەڵۍ گنۊ و پی جۊرە پاڕادایمی دیموکراتیک، ئیکۊلۊژیک و ئازاڎیی وازی ژەنۍ نەبۍ بە سامانوو تەماموو ئینسانیەتی".
"ئاڎۍ ئامانجشا ئانەبۍ ڕابەر ئاپۊی و گەلوو کورڎی دلېنەبەرا"
جە ڕوو ئازاڎییوە مشۊم ئینسان پەیوەنڎی بەینوو کۊشیای ڕابەر ئاپۊی ۋەران ۋەر بە کودەتاو فاشیستی ١٢ و ئەیلول و ١٩٨٠ی و کۊشیای جە هەلومەرج و گۊشەگیری گېرتەینە سەروو ئا بنەمۍ دەسنیشان کریۊ.
ئا شېوازە جە ئەنەیاوای پاسەکەرۊ پەیوەنڎی بەینوو کودەتاو ١٢ و ئەیلول و ١٩٨٠ی و دیکتاتۊریەتی فاشیستی ئاکەپە- مەهەپەیچ بەشېۋېوە ڕاس بۋینیۊ. حەرپۊکەی ئا هېزۍ کە جە سەرەتانە ۋەران ۋەروو جمیەری ئاپۊیی مرڎېوە، ئانۍ کە جە کودەتاو ١٢ و ئەیلول و ١٩٨٠ینە گەرەکشابۍ پەکەکەی پاکتاو کەرا و کورڎا قڕ کەرا و ئا هېزۍ کە ئارۊ دیکتاتۊریەتی فاشیستی ئاکەپە- مەهەپەیشا کەرڎەن بە دەسەڵاڎ دار و گەرەکشانە بیاۋا بە دما ئامانجوو ۋېشا ، هەمان هېزەنۍ.
جمیەری ئاپۊیی دماو کودەتای فاشیستی سەروازی ١٢ و ئادارو ١٩٧١ی دەسش پنەکەرڎ. ئانۍ کە جە١٢ و ئەیلول و ١٩٨٠ینە کودەتای فاشیستی ١٩٨٠یشا ئەنجام دا، گەرەکشابۍ کودەتای فاشیستی سەروازی ١٩٧١ی کە بە نیمەچڵی مەنەبېوە، تەمامش کەرا . دیکتاتۊری فاشیستی ئاکەپە-مەپەیچ ئارۊنە سەرو ڕاو ڕېبازوو ئا کودەتایا ملاڕاوە، بەپاو ئامانجەکاشا جماوە. گرڎیچ ئا هېزېنۍ کە ئا پلانا جا بەجۍ کەرا کە جە بارەگاکا سی ئای ئەی و ناتۊینە مجیارە. مشۊم بەشېۋېوە ئاشکرا ئانە دەسنیشان کریۊ کە ئامانجی ئەساسی کودەتای فاشیستی سەروازی ١٢ و ئەیلول و ١٩٨٠ی و دیکتاتۊریەتی فاشیستی ئاکەپە-مەهەپەی دلېنەبەرڎەو ڕابەر ئاپۊی و پەکەکەی و گەلوو کوردین.
جەمال شەریک باسش چانەی کەرڎ، کە ئا هېزە ئاماژەپنەکریۍ پەیلوایشا پاسەبۍ کە ئامانجەکەشا پېکان و ۋاتش"سەروو ئا ئەساسیە هجومۍ فرە دژوارېشا ئەنجام دۍ. ئامانج و ئا هجومایچە ڕەشبگیر، ئەشکەنجە، کۊچبەرکەرڎەی، ماڕای مدرامانوو پەکەکەییەکا، بە ئەشکەنجەدای و چۊک پنەدای بۍ. ئەگەر ئانە سەر وزیۍ ئە وەختە هجومە فاشیستیەکۍ ١٢ و ئەیلول و ١٩٨٠ی جە دژوو گەلوو کورڎی و پەکەکەییەکا سەرگنۍ. ئا هجومۍ تەنیا لایەنېوە هجومی فاشیستی١٢ و ئەیلول و ١٩٨٠ی نیشانە مڎا. بېجگە چانەیچ ئامانجی جیاوازیچشا بۍ. وەڵۍ گرڎوو ئا ئامانجانە ڕابەر ئاپۊ بۍ. ڕابەر ئاپۊ ماوېوە کەم وەڵۍ کودەتاو ١٢ و ئەیلول و ١٩٨٠ینە بەمەبەسوو ئاماڎەکاری پۍ کۊشیایۍ درېژ مەودای لوابۍ پۍ بەروو ۋڵاتی. ئانە جە هەمان وەختەنە بەماناو کەرڎەیۊ ڕېوە تازۍ هەناسەدای بۍ پۍ کۊشیاکەیما. جە ئاژەو ئا وەختەینە چنی ژمارېوە فرە شۊڕشگېڵنا، هېزی دیموکراتیکی ۋەرکەوتوو میامینی و ۋڵاتا جیاجیای پەیوەنڎی سازکریابۍ. هاموەخت هەرمانەی ڕېکوزیاییەیچش فراون کەرڎە. ئانە جە هەمان وەختەنە بەماناو ئانەی بۍ کە پەکەکە بە گرڎ جۊرۍ دژ بە کودەتاو ١٢ و ئەیلولی پېسە هېزېوە بیەی ۋېش پارېزنۊ و ۋەڵۍ گنۊ. پۊکەی دۊڵەتوو ترکیچ پۍ ئانەی بتاوۊ ئامانجەکا ۋېش جە ١٢ و ئەیلولینە بیاونۊ بە سەرکۊتەی، جە بەروو ۋڵاتی دەسش بە هجوومەکاش پۍ دلېنەبەرڎەو پەکەکەی کەرڎ. ئامانجوو ئا هجوما ئانەبۍ، کە هەرمانۍ کەرا ڕابەر ئاپۊ نەتاۋۊ دەوروو ۋېش گېڵنۊ، ڕېکوستەی پەکەکەی هورشېونۊوە و نەتاۋۊ جارېوەتەر گېڵۊوە پۍ سەرنیشتوو کورڎسانی و هەرمانەو ڕېکوستەی بەرۊڕاوە. پۊکەی پلانەو هجومېوە گرڎینەیش وستەبۍ بواروو جابەجۍ کەرڎەیۊ. جە لایۍ تەرۊ هجووم کریۍ سەروو گەلی، چەولایچۊ هجوم کریۍ سەروو زینڎانیەکا و پەکەکەییەکا جە بەروو ۋڵاتی. فاشیزمی ١٢ و ئەیلولی گەرەکش بۍ پا هجووما بیاۋۊ ئەنجام بەڵام نەتاواش".
جەمال شەریک ئانەش وست ڕووە، کە مدرامانی بەقوەت دژ بە کودەتاو ١٢ وئەیلولی جە زینڎانەکاوە دەسش پنەکەرڎ و ۋاتش،"کۊشیای گەریلای کە مدرامانوو زینڎانەکاش بە نۊبە هۊرگېرت، ئا مدرامانشە یاۋنا بە سەرکۊتەی. ئا کۊشیایچە ناستش فاشیزموو ١٢ و ئەیلولی بیاۋۊ ئامانج. جە هەمان وەختەنە گورزەی جەرگبڕەش ۋنە ئەشا. پی بۊنۊ جە ساڵیاڎوو ١٢ و ئەیلولینە جە ڕەمزەکا مدرامانی دژ بە فاشیزمی ١٢ و ئەیلولی ' مەزڵوم دۊغان، فەرهاد کورتای، مەحموڎ زەنگین، نەجمی ئۊنەرو ئەشرەف ئانیکی'، حەرپاسە قارەمانا ڕۊچۍ مەرڎەی ١٤ و تەموزی کە دلۍ ئاژەو ١٢ وئەیلولینە بە مدرامان جە زینڎانەکانە گورزۍ قورسەشا جە فاشیزمی ١٢و ئەیلولی شاناو دلېشانە بەرڎ. هامڕا کەمال پیر، محەمەڎ خەیری دورموش، عاکیف یەڵمازی و عەلی چیچەکی جە ٤١ەمین ساڵیاڎوو گەشمەرڎەبیەیشانە، جە هەمان وەختەنە فەرمانڎەی قارەمان و هەڵمەتەی گەریلایی گۊرۍ ١٥ و ئابی هامڕا مەعسووم کۊرکمازی و جە کەسایەتی ئاڎیچینە گەشمەرڎا ئاخېزی گرڎیشا بە ڕېزوو پنەزانایۊ ۋیرمارووە. قەناعەتوو ۋېم نیشانە مڎەو کە دەسکۊتە گۊرەکۍ کە ئاڎۍ بە مدرامانوو ۋېشا خوڵقنانشا و بە ئاخېزوو کورڎسانیا و تەماموو مرۊڤایەتیشا بەخشان، زیاتەر وەڵۍ گنا".
چېگەنە مشۊم بە دیاری کریایی دەسنیشان کریۊ کە سەردەموو ١٢و ئەیلولی هەڵای نەیاوان بە دمایی. لاپەڕېوە نیا کە وزیابۊرە. پېسە گرڎوو مېڎانەکا زینڎانەکایچەنە ۋەردەواما. پېسە ئا وەختیە ئیسەیچ دژ بە دۊڵەتوو ترکی فاشیستی، قڕکەری، جە زینڎانەکانە کۊشیای ۋەردەواما. چی کۊشیاینە گەشمەرڎۍ گۊرۍ دریا.
"نەریتوو کۊشیای دژ بە ١٢ و ئەیلولی مشۊم جە بەرزتەرین ئاستەنە ۋېنا کریۊ"
هجومی پاکتاوکاری، کە جە ئیمراڵی جە کەسایەتی ڕابەر ئاپۆینە ئەنجام دریۊ جە کورڎسان و بەروو وڵاتیچ دژ بە گەلەکەیما بە چڕی و تنی ۋەردەوامېنۍ. هامڕېکېما جە زینڎانەکانە راستەوخۆ ئامانج و ئا هجومانۍ. متاویۊ وچیۊ ئانۍ ئارۊ فاشیزمی ١٢و ئەیلولی ۋەردەوامی مڎا پنە، درێژەپنە دەروو نەریتی دژە شۆڕشینۍ بە دژوارتەرین شێوە. ۋەروو ئانەی جە ساڵیاڎوو ١٢و ئەیلولینە دژ بە فشارەکا فاشیزم، کۆلۆنیالیست و قڕکەری، کە جە دژوو ڕابەر ئاپۆی، پەکەکەی، زینڎانەکا و گەلی ئەنجام دریا، مشۊم هەڵوېسۍ ئەنجام بڎریۊ و کۊشیایۍ ئەنجام دریۊ. وەختۍ کە کۊشیایۍ پی جۊرەیە بریا ڕاوە مشۊم ۋیر نەکریۊ کە ئا هېزۍ کودەتای فاشیستی سەروزی، کۊلۊنیالیستی، ١٢و ئەیلوول و ١٩٨٠یشا ئەنجامدا، سەرەڕاو ئانەی شکسیچشا ئارد، دەسبەرڎارۍ ئامانجەکاشا نەبیۍ. چی سەردەمەنە بە ڕاو ڕېبازی جیاجیا ۋەردەوامېنۍ جە هجومەکاشا. ئا هجومۍ چی وەختەنە بە قورسی ئەنجام دریا. وېش جە وېشەنە ئانەی کە مشۊم کریۊ ئانەن کە مشۊم بزانیۊ، دیکتاتۊریەتی فاشیستی ئاکاپە- مەهەپەی دژوارتەرین ئاژەی هەنوکەیی ١٢ و ئەیلولیا، مشۊم کۊشیای دژوو کۊلۊنیالیزمی و فاشیزمی ١٢ و ئەیلولی بە نۊبە هۊرگیریۊ و زیاتەر بەقوەت کریۊ".
جەمال شەریک ئانەیچش وست ڕووە، کە ئا ئەرکە مشۊم جابەجۍ کریۊ و ۋاتش،"پۍ ئانەیچ مشۊم دژ بە شۊنکۊتا ١٢ و ئەیلولی کۊشیای بە چالاکتەرین شېوە ئەنجام بڎریۊ. جە ساڵیاڎوو ١٢ و ئەیلولینە مشۊم ئا ئەرک و ۋەرپرسیاریە جا بەجۍ کریۊ".
