ئەندامەو ئەنجومەنوو ژەنا سوریای هەیبە محەمەڎە ئەرەیاۋناش، کە مشۊم ژەنی بڕواشا بە هێز و چنەئامایی ۋێشا بۆ و واتش، " ئا ژەنۍ سەردەموو داعشینە کۆیلۍ کریۍ و ئەشکەنجە دریۍ، ئارۆ سەرمەشقی پۍ گلێرگەی کەرا".
ئەندامەو ئەنجومەنوو ژەنا سوریای هەیبە محەمەڎە ئەرەیاۋناش، ٨و مارسی ڕۊو جەهانی ژەنا ۋنەپرسایۊن چا ماف و رەنج و ئازاڎییا ژەنا کە زەوت کریێنۍ و دەسشا سەرەرە گیریان.
هیبە محەمەڎە ویرش ئاردۆ کە جە سەرنیشتوو ۋەرکەوتوو سوریاینە ١٢ ساڵێن رەنج و کۊشیای گەورە ڕاوەبەر کریۆ و پی جۆرە بەردەوامە بیە: "ئێمە دماو ئاخێزوو ۋەرنیشتی فێرۍ مەعناو ٨و مارسی بیەیمۍ و دەسما بە پیرۆزکەردەیش کەرد. ئارۆ متاوو بواچوو کە پۍ ژیۋای زەوتکریاو ژەنا و پۍ مافەکاش تەنیا ڕووۍ وەسۍ نییا.
ئێمە موینمۍ کە جە ٨و ئاداریەنە هەڵای جە دژوو ژەنا فرە مامەڵۍ تنووتیژۍ و نامرۆڤانۍ بەردەوامێنۍ. جە تەماموو دنیێنە هەڵای ژەنی رووبەڕوو هجوومی فرەی باوە. هیواڎارێنمۍ کە جە سایەو ئاخێزوو سەرنیشتوو ۋەرکەوتوو سوریاینە گرڎوو ژەنا جەهانی زنجیرەو کۆیلایەتی ئیسەی ماڕا. وەڵۍ ئاخێزینە دەوڵەت پیرۆزکەردەو ئی ڕووەیشە قەڎەغەکەردەبۍ. بەڵام ئێمەی ژەنا چا وەختەنە بە شێوێوە پەنهان دلۍ ۋێمانە پیرۆزش کەرێنمۍ. ژەناو کوردی، عەرەبی، سوریانی و چەرکەسی کە ئارۆ جە سەرنیشتوو ۋەرکەوتوو سوریاینە مژیوا، پێوەرە ئا ڕووەیە پیرۆز کەرا. بە ئاماڎەکاری فرە گەورۆ پێشوازی چا ڕووەیە کەرمۍ. سێمینارۍ پێشکەش کەرمۍ، پۊستکارتۍ ئاماڎۍ کەرمۍ و گرڎوو دامودەزگاکانە وەڵاشا کەرمێوە".
هیبە محەمەڎە ئانەیچش وست ڕووە، "ئێمە گردما ئانەی مزانمۍ کە وەختوو حکومەتوو دیمەشقینە و دماتەر، جە سەردەموو داعشینە ژەنی چێششا سەرەرە ئاما. ئا ژەنۍ ئا وەختیە کۆیلە کریۍ و ئەشکەنجەدریۍ، ئارۆ سەرمەشقی پۍ گلێرگەی کەرا. بەشدارێنۍ جە ڕاوەبەردەی گلێرگەینە. ئارۆ بیێنۍ بە کۊششکارۍ و شۊڕشگێڵنۍ. بۆنەو ٨و ئاداریوە گەرەکما بە گرڎوو ژەنا ئانەی بواچوو ؛ درک بە هێز و توانا و چنەئامایشا کەرا. ئا وەختەی ژەنی بڕواش بە ۋێش بی، حیچ چێوۍ نییا کە نەتاوۆ بیاونۊش ئەنجام. دەسکۆتی فرۍ بەدەسبارۆ. متاوۆ گرڎوو دما کۊتەییەکا کە سەرشەرە سەپیێنۍ ویەرنۊشا. چی مەجالەنە مشۊم ژەنی گرڎوو ئاستەنگیەکا ویەرنا و بیاوا بە سەرکۊتەی. ئارۆ مشۊم ۋەرا ۋەروو گرڎوو هجووم و ئەرەگیریەکا دەوڵەتوو تورکی مرداوە. ئێمە پەی پارێزناو دەسکۊتەکا ژەنا تا دمایی درێژە بە مدرامانوو ۋێما مڎەیمۍ. هجوومەکۍ دەوڵەتوو تورکی رەنگە کایەکاو ژیۋای وەرتەسک کەراوە، رەنگە ژیۋای دژوار کەرا، بەڵام ئێمە هەنگامە پۍ دمای مەنیەیمۍ. ئێمە زیاتەر کۊشیەیمۍ. ئارۆ بە تایبەتی ئا ژەنۍ کە سەرمەشقی پۍ گلێرگەی کەرا، کریانە ئامانج. جە ئێران، ۋەرکەوت و عەفرینەنە گرڎ ڕووۍ ژەنا کۊششکاری کریانە ئامانج. چی روۆ پێسە ژەنۍ مشۊم تا سەر خاوەنداری جە کۊشیای ئاڎیشا کەردۍ و تا بەدەسئامای ئازاڎیی ۋێڕاگری کەرمۍ".
