ئاهەنگەکاو نەورۆزوو ئێساڵی بەریتانیانە بە سەرمەشقایەتیی مەجلیسوو گەلوو کوردی و پێکئامایەکا بەینوو ١٧-٢٤  ئادارینە چند شارێوە سەرەکیینە بەتایبەت لەندەن و لیڤەرپوول و ئیدنبۆرگ بە درووشموو "ئازاڎیی پەی  عەبدولا ئۆجالانی، چارەسەری سیاسی پەی پەرسەو کوردی" کریۆ. 

لە لەندەننە ئامادەکارییەکاو نەورۆزی تەمامیێ، چەمەڕا کریۆ ١٧ ئاداری پارکوو فینسبوروو لەندەنینە ئاهەنگێوە شکۆداروو نەورۆزی کریۆ، سیاسەتمەداروو کوردی، ئەحمەد یەڵدرم، هەرپاسە هونەرمەندێ هۆزان دینۆ و بەسەر شاهین و نەجمەدین غوڵامی و گرووپی زەلالی و مەروان شان بەشدارێ با.  

پێسە گرد ساڵێوە چەمەڕوان کریۆ تەڤگەروو گەنجە شۆڕشگێڵناو بەریتانیای وێرەگاو ٢٠ ئاداری ئاهەنگێوە  شکۆدار بە ئاویرکەرڎەیۆ و ورپڕای کریۆ. قەرارا هونەرمەندێ ڕۆتیننە و سونا ئالان و میر سەرحەد و گرووپوو زەلالی بەشدارێ با، چەنی دهۆڵ و زوڕنای ورپڕای کریۆ.

بە هەمان لەون ١٩ ئادارینە هەرمانگەو  ئینڤیسەبڵ ویندوو لیڤەرپوولینە بە سەرمەشقایەتیی مەجلیسوو گەلوو کوردی ئاهەنگێوە ساز کریۆ، هونەرمەندێ بەسەر شاهین و نەجمەدین غوڵامی و سیپان خەڵات و مەروان شان و میر سەرحەد بەشدارێ با.

بە هەمان شێوە ئیندبۆرگنە ئاهەنگێوە جەماوەری ساز کریۆ، هونەرمەندێ ڕۆتیندا و گرووپوو چوار و یەکی، گرووپوو دەنگوو ژیوای، گرووپوو وەرنیشتی و مەروان شانی بەشدارێ با.

 ١٨ ئادارینە ئێکستەرنە و ٢٢ ئادارینە برایتۆننە و شێفێڵدنە ئاهەنگوو نەورۆزی ساز کریۆ. هامسەرۆکاو مەجلیسوو گەلوو کوردوو بەریتانیای سەعید سوروچ و ئاسۆ کەمالی قسێشا پەی ئاژانسوو هەواڵوو فورات (ANF) کەردێ، ئاماژەشا پانەیە کەرد ڕابەروو گەلوو کوردی عەبدوڵا ئۆجالان وەڵێ ٥٢ ساڵانە ڕۆو نەورۆزینە یوەم هەنگامەش نیا و واتشا: "ئی ڕوە بە سەرمەشقایەتیی عەبدوڵا ئۆجالانی بە پاو جەوهەروو کۆشیای پێسە "جەژنەو ژیوایۆ و جەژنەو ئازاڎی"ی مەبارەک کریۆ".

هامسەرۆکێ ئەرەیاوناشا ئامانجشانە بە درووشموو هەڵمەتەی میاننەتەوەییەو "ئازاڎیی پەی عەبدوڵا ئۆجالانی، چارەسەری سیاسی پەی پەرسەو کوردی" مدرامان دژوو سیاسەتوو گۆشەگیری و کۆکوشی مەیدانی سیاسی و جڤاکیینە بیاونا ئاستێوە بەرز.

هەرپاسە هامسەرۆکێ ئەرەیاوناشا نەورۆزوو ئێساڵوو لەندەنی کەرا بە سەوقاتوو هەڵمەتەی میاننەتەوەییەو ١٠ تشرینوو یوەمی و واتشا: "نەورۆزوو ٢٠٢٤، بۆ بە نەورۆزوو ئازاڎیی ڕابەر ئاپۆی و چارەسەری سیاسیی پەرسەو کوردی، نەورۆز مەبارەک بۆ!".