جە دۊسیەو کۊکوشیی سێواسینە، کە یەرۍ کەسۍ داڎگایۍ کریێنۍ، داڎگا بە بەهانۍ ویەرڎەی وەختی ملوو دۊسیەکێرە قەراروو وستەیرەیش دا.  قەرارەکەو داڎگای بی بە بابەتوو گەرموو ڕۊی تورکیانە و واتەواچش بارەوە کریۊ. ئاکەپە ساڵاو ئەوەڵوو دەسەڵاتدارینە، قەرارش دا دۊسیەو تاوانەکاو دژ بە ئینسانیەتی، مەبۊویەرڎەی وەختی گێرۊشاوە. سەرەڕاو ئا قەرارەو ئاکەپەیە، قەرارەکەو داڎگای بارەو دۊسیەو کۊکوشیی سێواسیوە، مشتومڕوو ڕایگردینی و لایەن و چینەکاو گلێرگەیش وەنە کەوتۊ.  

یڵماز تونچ وەزیروو داڎی، جە میانەو قسێوەشنە جوابوو ئا پرسیارێشە داوە، کە سەبارەت بە وستەیرەی دۊسیەو کۊکوشیی مادیماکی بە بەهانۍ ویەرڎەی وەختیوە کریا، وەلۍ جگە چانەیە کارڎایۊش وەراوەروو قسەکاو  سەرۊکی گردینوو جەهەپەی نیشانە دا، حیچ چێوێوە تەرش نەوات. تەنانەت نەواتش قەرارەکە غەڵەتا.

ئەرەن کەسکینە، پارێزنەرو بواروو مافوو ئینسانی و سەرۊکەی گردینەو ئیهەدەی، جە واچێوەشنە پەی ئاژانسوو فورات (ANF)ی، ورسەنگنایش پەی قەراروو داڎگای بارەو دۊسیەو کۊکوشیی سێواسیوە کەرد.

"ئاکەپە چەنی ئا ئەقڵییەتەیە، کە گەرەکش بۍ ئا حزبەیە وزۊرە، ڕێک کەوت"

کەسکینە واتش، ئاکەپە بارەو 'مەبۊ قەراروو ویەرڎەی وەختی دۊسیەکاو تاوانوو دژ بە ئینسانیەتی گێرۊوە' کە وێش دانش، چەنی ئا ئەقڵیەتەیە کە گەرەکش بۍ ئا حزبەیە وزۊرە، ڕێک کەوت و واتش: جە ئەنجاموو ئا ڕێککەوتەیچنە، سزانەڎای و پاشێلکارییەکۍ زیاتەرۍ با.

ڕۊشنیچش کەرڎۊ، ڕاسیینە ئاکەپە کە ئا هەموارێشە یاساکانە کەرڎۍ، ئاکەپەو ئیساتۍ نەبۍ. ئاکەپە چەنی ئا ئەقڵییەتەیە کە گەرەکش بۍ  گێرۊشنە وەر و چەنیش ڕێک گنۊ، ئیساتۍ دژوو گردیما سزانەڎای، ڕزگارنەبییەی جە سزۍ و پاشێلکارییەکۍ زیادشا کەرڎەن. وەڵۍ ئینەیچەن دۊسیەو ژیتەمی ئەنقەرەی بە قەراروو  ویەرڎەی وەختی دماوزیا. هەمان قەرار بارەو دۊسیەو کۊکوشیی مادیماکیوە دریا. گردوو ئا حاڵەتانە، کە دەوڵەت یان هێزەکاو دەوڵەتی، بکەر و ئەنجامدەرێنۍ دۊسیە مەکریۊوە، ئەگەر دۊسیەیچ کریۊوە، بە قەراروو ویەرڎەی وەختی وزیۊرە. ئانەیچ دۊسیۍ پێوەس بە گیریایا و بێسەروشۊنکریایەکا گێرۊوە. ٢٠ ساڵێن یاساو ویەرڎەی وەختی سەروو دۊسیەکارە بەکار مۍ. داواکارۍ گردینۍ ماوەو ٢٠ ساڵانە حیچ داواکاریێوە ئێمەشا قبوڵ نەکەرڎەن و قەرار مدا، کە دۊسیەکۍ ویەرڎەی وەختی گێرۊشۊ.  

کەسکینە واتیچش: سەپنای ویەرڎەی وەختی ملوو دۊسیەکارە نیشانۍ سەرەکییەو سیاسەتوو سزانەڎای و نەجاتبییەینە جە سزۍ و واتیچش، بەتایبەتی جە ساڵەکاو ویەرڎەینە ئاکەپە بارەو تاوانەکاو دەوڵەتی سێبەریوە، سیاسەتوو سزانەڎای گێرۊنە وەر.  

'ڕەنگا ڕوۍ ئاکەپە چەنی چارەسەری ھامڕا بۊ، وەلۍ جەهەپە حەرگیز'

کەسکینە واتیچش  قسەکاو  یڵماز تونچی، وەزیروو داڎی: چی بابەتانە حیچ جیاوازیێوەشا بەینوو ئاکەپەی و جەهەپەینە نییا. ئاکەپە جە ساڵەکاو ئەوەڵوو گێرتەیدەسوو دەسەڵاتیوە نۊعێوە تەر قسۍ کەرۍ، دماتەر پەی وێش بی بە دەوڵەت. جەهەپە دایمە پارتێوە دەوڵەتیین. ڕوۍ چارەسەری بۍ ئاراوە، وەروو ئانەی پراگماتیکین، ڕەنگای ئاکەپە چەنی چارەسەری ھامڕا بۊ، وەلۍ جەهەپە بە حچ نۊعێوە".

کەسکینە ئاخیریچۊ واتش: "دماو ئا قسا وەرپەرسیوە فرە باڵاو دەوڵەتی کە واتەبێش: 'کەس مەتاوۊ حیچ بە سوپێکێما واچۊ، سوپێکێما پاکتەرین سوپاو دنیێنە'، ئادۍ بە دەموو وێشا واتشا، چا دۊسیانە سوپا یان سەروازەکۍ ئەنجامدەر و بکەرێنۍ، حیچ سزێوە مەدریا و مەگێرۊشاوە.

س.ز