کۆمپانیاو میترۆپۆڵی کە یۆن جە گەورەتەرین کۆمپانیایەکاو ئەوەکۆڵیای و ڕاپەرسی تورکیانە، ئەوەڵوو مانگەو ئابینە ئەنجاموو ئەوەکۆڵیاێوی وێش وەڵا کەردۆ،کە بییەن یاگێ قسەوباسوو ڕای گردینێ.کۆمپانیاکە ئەرەیاونانش، بەپاو ئەوەکۆڵیایا کە کەردێنێش بەرکەوتەن کە تەماموو تورکیاینە،کوریگەریی ئاینی سەروو ژیوای کۆمەڵایەتی کەم بییەنۆ.

بە پاو ئەوەکۆڵیایوەکەی ٥٠ پۆینت ٩و بەشداراو ڕاپەرسییەکەی باوڕشا چانەن، کە کاریگەریی ئاینی سەروو ژیوای کۆمەڵایەتی تورکیانە کەم بییەنۆ و دماتەریچەنە بێکاریگەر مبۆنە.

چا بارەوە پەرلەمانتاروو بازنەو کۆجاعەلی دەم پارتی عومەر فاروق گەرگەرلیئۆغلۆ سەروو ئا پەرسێ قسێش کەردێ.

ئەوەڵوو قسەکاشەنە گەرگەرلیئۆغلۆ ئاماژەش پانەیە دا، نەک تەبیا بە پاو ڕاپەرسیی میترۆپۆڵی، بەڵکوم راو چەمدارە سیاسییاوە و چند ڕاپەرسییای تەریچۆ، ئاماژە پانەیە کریان،کە ئاین دلێ ژیوای کۆمەڵایەتیی تورکیاینە لاواز بییەن و واتش:" دەسەڵات کە وێنا سیمبوڵ و ئامانجە ئاینییەکێش پەرە پەنە دێنێ،پیسە یاوا بە دەسەڵاتی، تورکیانە زەرەری فرەش بە ئاینی یاونا.  چونکوم بە بەکارعاردەی ئا سیمبوڵە ئاینییا خەنجەرێوەش وەنەو ڕۆحوو ئاینی دا و دلێنەکەش بەتاڵ کەردۆ، گردوو ئا بەها جوانا کە پەنەواز بێ ئاین بپارێزنۆشا، دەسەڵات بەرژەوەندیی وێشنە بەکارێش ئاردێ و پاشێلێش کەردێ. حەرپاسە ئیساتێنە جیهانێوە میکانیکی و ماتریالیستی هەن، ئینەیچە هۆکارێوا تا دۆخوو کاریگەریی ئاینی لاواز بۆ."

'کەردەیوەی مەکتەبە ئاینی و کۆرسە ئاینییەکا زەرەرش دان وەنەو ئاینی'

گەرگەرلیئۆغلۆ واتیچش بڕێ مەکتەبێ ئاینیێ کۆرسوو قورعانوانای مکەراوە و واستش؛" موچیۆ ئی هەرمانێ زەرەر بە ئاینی نمەیاونا، وەلێ فرە زەرەر میاونا، چونکوم دەسەلات دوور جە بەها ئاینییەکا بەکارێشا مارۆ، پاسە بە ئایندارا مکەرۆ جە بڕواداریی ئاینی سەردێ باوە"

' موسڵمانی هەقەتین مشۆم دژوو ئی قیزەونییەو دەسەڵاتی بمدرۆوە'

ئاخرۆ  گەرگەرلیئۆغلۆ داواش کەردە کە پەنەوازا، ئا کەسێ کە ئایندارێ هەقەتینێنێ ڕا پا هەرمانا نەدا و واتش:"ئانێ وێشا بە مسوڵمانی ئەخلاقی هەقەتین مزانا، پەنەوازا وەراوەروو ئی هەرمانە ئاینیانێ دەسەڵاتینە بمدراوە، چونکوم جگە چادیشاکەسی تەر نمەتاوۆ ئا هەرمانێ بکەرۆ، ئینە ڕاسییا، مسوڵمانی هەقەتین مشۆم دژوو ئی قیزەونییەو دەسەڵاتی بکۆشیۆ".