تۊڕەو مافەکاو ئینسانی کورڎساننە ئاماروو پاشێلکارییەکاو مافەکاو ئینسانیش، جە وەرکەوتوو کورڎسانینە جە مانگەو جۊزەرڎانینە (٢١وو ئایاری تا ٢١وو حوزەیرانی) وەڵا کەرڎێوە. بە پاو ئامارەکەی "لای کەمیوە ٧٠ هاموەڵاتۍ و چانیشا بنەیانەو داڎوازا و حەرپاسە چالاکاو کوردی جە شار و دەگا جیاوازەکاو پارێزگاکاو ورمۍ، سنە، کرماشانی و خووزستان، بە تۊمەتی سیاسی لاو هێزە ئەمنی و داڎوەرییەکاوە دەسبەسەرۍ  کریێنێ".

٤٠ ئەندامۍ بنەیانەو گیانبەختکەرڎاو سەرەورڎای دەستبەسەرۍ کریێنۍ

ئامەژەش پانەیچە کەرڎەن: "جە راکەوتوو ١٩و جۊزەرڎانینە (٩و حوزەیرانی) لاو کەمیوە ٤٠ کەسۍ جە ئەنداماو  بنەیانەو دادوازا کە بە مەبەسوو دیداری چەنی بنەیانەو گیانبەختکەرڎا سەرڎای شارەکاو سەقزی و بۊکانیشا کەرڎێبۍ، جە دەروازەو شاروو بۊکانینە لاو هێزە ئەمنییەکاوە دەستبەسەرۍ کریۍ. فرەشا دماو چنڎ سەعاتێوە ئازاڎۍ کریۍ، وەلۍ ٦ کەسێشا و دووە سایەقەکۍ دماو چنڎ ڕووۍ گیریای بە نیایرەی بارمتەی بە وەختی ئازاڎۍ کریۍ.  

ئینجا دلۍ دەسبەسەرکریایەکای تەروو ئی مانگێنە ٢ کەسێشا بە مەبەسوو سزاو بەندکەرڎەی دەسبەسەرۍ و ڕوانە و زینڎانی کریۍ، وەلۍ ئەوۍ تەرۍ هەڵایدەسبەسەرێنۍ و هیچ زانیارییوە سەروو چارەنویسیشا وەرڎەس نییا.

 سزاو زینڎانی ملوو ١٦ چالاکارە سەپیێنە

تۊڕەو مافەکاو ئینسانی کورڎساننە وستەنیچش ڕووە، کە چی مانگێنە لاو کەمیوە، ١٦ هاموەڵاتۍ و چالاکۍ و مامۊسۍ ئاینیۍ کوردی جە لاو دادگای تایبەتوو مەلاکاو هەمەدانی و دادگاو شۊڕشی ئیسلامی و پارێزگایەکاو ورمۍ، سنە، تارانی و ئیلامیوە سزاو بەندکەرڎەیشا ملەرە سەپیێنە.

کەدەی ئامانجوو کۊڵبەرا درێژەش هەن

سەبارەت بە دۊخوو کۊڵبەرایچ جە راپۊرتەکەنە ئامان، جە مەنتیقە سنوورییەکاو شاروو بانەو پارێزگاو سنەینە، کۊڵبەرێوە کورد بە دەسڕێژوو هێزە چەکدارەکاو کۊماری ئیسلامیی ئێرانی کوشیان، کۊڵبەرێوەیچ بۊنەو مرڎای دڵێشۊ جە مەنتیقە حدوودییەکاو نەوسوودەو پارێزگاو کرماشانینە گیانش جەدەس دان و ئینجا ١٦ کۊڵبەرێچ بە دەسڕێژوو هێزە چەکدارەکاو کۊماری ئیسلامیی ئێرانی و کەوتەیرەی جە بەرزاییوە بریندارۍ یا تووشوو زەبری قورسی بیێنۍ.

لاو کەمیوە ١٣ کورڎۍ دریێنۍ جە دار

تۊڕەو مافەکاو ئینسانی کورڎساننە، جابەجاکەرڎەی سزاو جەدارڎای لاو کەمیوە پەی ١٣ بەندکریایا تۊمارە کەرڎێنە، بە تۊمەتەو «کوشتەی بەئەنقەس»ی یان تۊمەتەی پێوەندیدارە بە «ماددە هۊشبەرەکا»ـەوە سزاو جەدارڎایش پەی بەرۍ کەرڎێنۍ و جە زینڎانەکاو سنە، کرماشان، کەرەج، ورمۍ، مەشهەدی و شیرازینە جە داری دریێنۍ.  

یەرۍ ژەنۍ چا مانگێنە کوشیێنۍ

سەبارەت بە تندوتیژی وەراوەرو ژەنایچ ڕاپۊرتەکۍ ماچۊ، لاو کەمیوە ٣ ژەنۍ کوردی، جە پارێزگایەکاو ئیلامی و کورڎسانینە بە دەسوو ئەنداماو بنەیانەی  و بە سەبەبوو «نامووسی» یان «کێشەی خێزانی» کوشیێنۍ.

دۊخوو کرێکارایچ بەشیوە ڕاپۊرتەکەین و دلێشنا ئامان: " لاو کەمیوە ٢ کرێکارۍ بە ڕووەدای هەرمانۍ جە شارەکاو دیواندەرەی و ورمێنە گیانشا جەدەس دان".

جە درێژەو راپۊرتەکەیچنە ئامان: "چی مانگێنە مەرگی گوماناویی دووۍ تەلەبە کورڎا بە ناومەکاو بامشاد سلێمانخانی و مەنسوورە سەگوەندی، خەڵکوو ئاودانانی و خوڕەمئاوای، جە شاروو ئاودانانینە ناڕەزایەتیی گەورە و وەروەڵاش چەنە کەوتۊ. جە رێکەوتوو ١١و جۊزەرڎانینە (١و حوزەیرانی) خەڵکوو بازاڕی و کاسبکارۍ شاروو ئاودانانی جە پەرچەکرڎارێەوەنە دژ بە مەرگی گوماناویی بامشاد سلێمانخانی مانشا گێرت و دمانیمەڕۊو هەمان ڕۊی و جە وینیشانەداێوە جەماوەرینە لاو کەمیوە ٢٠ هاموەڵاتۍ بە دەسڕێژوو هێزە ئەمنییەکا بریندارۍ بیێ".

سوپاو پاسڎارا بەرڎەوامەنە جە کاولکەرڎەی ژیوگەو کورڎسانی

هجوومەکەو ئی دماییەو سوپاو پاسدرا پەی سەروو هەرێموو کۊساڵانی و وێرانکەرڎەی ژیوگەی و سروشتوو کورڎسانی بەشێوە تەروو پاشێلکارییەکاو مانگەی ویەرڎێنۍ و چا بارەوە ڕێکوزیاکە ئەرەیاونانش: "سوپاو پاسڎارا جە ڕێککەوتوو ٢٢ۍ جۊزەرڎانیوە (١٢و حوزەیرانی) جە مەنتێقە کویسانییەکاو کۊساڵانوو شاروو سەوڵاوای و دەگایەکاو دەوروبەروو مەریوانوو پارێزگاو سنەینە، دەسش کەرڎەن بە مانۊڕێوە سەروازی بە ناموونیشانوو «موحەڕەم»ی. مانۊڕەکۍ تا ئیساتێچ هەنە و جە ئەنجاموو تۊپوارانەکاو سوپێنە، بەشیوە فرەو مەنتێقە پاریزیایەکاو کۊساڵانی سۊتێنۍ. سوپاو پاسڎارا بە وەشکەرڎەی جادەی و سەروازگەی تازەی جە بەرزاییەکاو زنجیرەکوێسانەکاو  کۊساڵانینە بەشێوە وەرەچەموو مەنتێقە ژیوگەپارێزیاکەیش کاول کەرڎەن، ڕایچش جە هامووشۊو ئا دەگانشینا گێرتێنە کە سەرگەرمۍ هەنگداری و ئاژەڵدارینۍ. ".

ئاخروو ئەرەیاوناکەیچەنە ئامان: "هاموەخت چەنی ئی مانۊڕۍ، ڕوانەکەرڎەی وەروەڵاو هێزەکاو سوپاو پاسڎارا پەی مەنتێقە حدوودییەکاو شارەکاو شنۊی، پیرانشاری و بانەیچ درێژەش هەن وچی ماوەنە دووۍ جارۍ مەنتێقەو «بورئالان»وو ماکۊی بەهەسی سوپاو پاسڎارا بوردومان کەرڎەن."

س.ز