ئامەدەنە ٣٢٨ ڕێکوزیێ گلێرگەی مەدەنی، هەرمانێ ڕەنج و پیشەی نەخشەڕاو ئاشتییشا مەیدانوو شێخ سەعیدینە مەنتێقەو سوورینە ئاشکرا کەردە،کە بە بۆنەو ١و ئەیلوولییوە ڕۆو 'ئاشتیی جیهانی'یوە ئامادە کریابێ،پێکئامایەکاو پلاتفۆڕموو ڕەنج و دیموکراسیی ئامەدی و نوێنەروو ئا لایەنا کە نەخشەڕایەکێشا ئێمزا کەردێبێنی، بەشدارێ بێنێ.

نەخشەڕایەکێ لاو سەرۆکوو نویسگەو پارێزنەراو ئامەدیوە نیهاد ئەرەنیوە ونیاوە و ئاماژە پانەیە دریا ئامانجی سیاسیی ئینسانی ئانەنە، ژیوایوە دوور جە تەرسینە بە ئاشتی و شکۆمەندانە بژیوۆ و واتش:" وەلێ وەرچەماو گلێرگەی میاننەتەوەییوە چندین یاگێ ڤیهانینە جەنگ و کاولکاری بەردەوامەن و فرەو ئا هجووما دژوو ژەنێ و  زارۆڵا مکریا، جگە جە ئی گردوو دۆخە نەریێیا، بە جەختکەردەیوە وەنەو مافوو ئاشتییانەو وێما دژوو جەنگی مپارێزنمێش."

بەردەوامینە ئەرەنە باسش جە گرنگیی ئاشتی پەی گلێرگەی کەرد و واتش:" ماوەکاو وەڵێنە پەی چارەسەری دیموکراسییانەو پەرسەو کوردی، چندین پرۆسێ دەس پەنە کریێ و یاگێ بایەخوو گلێرگەی بێنێ، وەلێ بەداخۆ ئا پرۆسێ بەپاو مەیلەکاو گلێرگەی ئەنجامگیرێ نەبێنێ، جگە جە گردوو ئا ئۆپراسیۆن و گرژییا، کە دەسشا پەنە کریان، تەماموو گلێرگەی ئینا هومێدوو ئاشتیینە، واتەواچی و دایوسانایەکێ بەردەوامی مدا بە هومێدەکا و مپارێزناش."

'سەرچەمەو قۆرتەکا ناچارەسەریی پەرسەو کوردی و سیاسەتی ئەمنیین'

 درێژەنە ئەرەنە ئاماژەش پانەی دا ڕێکوزیایەکاو گلێرگەی مەدەنی، هەرمان و پیشەییەکێ مانگەو شوباتینە ئامەدنە کوێ بیێوە و پێوەس بە پەرسەکاو کوردی داواشا کەردە و واتشا:" ڕۆشن بیەنۆ سەبەبوو تەنگەژەکا جە وەڵێکەوتەی دیموکراتیکوو وەڵاتینە و قەیرانی ئابوورینە لکەدریاو سووربییەین سەروو ناچارەسەری پەرسەو کوردی و سیاسەتە ئەمنییەکا. پەنەوازا ئیرادیوی چارەسەری تازەی وەش بکریۆ، چەکەکێ بێدەنگێ بکریا و قۆرتەکێ وەردەموو کارەکتەرە کاریگەرەکا لاببریا."

ئاخرۆ داواش پەی چارەسەروو پەرسەکاو کوردی کەردە و واتش:" داوا وەنەو گرد ئەکتەر و ورسووڕنەرە کۆمەڵایەتی و سیاسییەکا مکەرمێ کە پەرسەو کوردی بە ڕاو ئاشتی و دیموکراتیکی چارەسەرە بکریۆ، دمایی بە دۆخوو جەنگی بێ و وەرپەرسیی وێشا بیاونا یاگێ."