سەرەڕاو فشارەکا دۊڵەتوو ئېرانی سەروو خانەواڎەو گیانبەخشایا سەرهۊردای "ژەنی، ژیای، ئازاڎیی"، بەتایبەتی خانەواڎەو ژینا ئەمینیۍ، کە ڕەمزوو سەرهۊرداکەینە، ئەڎاو تاتەش ئەرەیاۋناشا، مەراسیم و ساڵوەگېڵ و گیان بەخشای کناچەکېشا ڕاوەبەر کەرا.
موژگان ئیفتیخاری و ئەمجەد ئەمینی ئەڎاو تاتەو ژینا ئەمینیۍ جە ئەرەیاۋنېوەنە، کە ئاڕاسەو ڕای گرڎیی ۋەرکەوتوو کورڎسانی و ئېرانیشا کەرڎەن، ئاماژەشا پانەی کەرڎەن، " پېسە گرڎ خانەواڎېوە جەرگ سۊتەی و کۊس کۊتەی، جە ساڵوەگېڵ و گەشمەرڎەبیەی کناچەکېما ژینا(مەهسا)ئەمینیېنە سەروو مەزارگەو ئا ئازیزېماوە کوۍ بیمۍ و مەراسیمی نەریتی و ئاینی یۋەم ساڵەو گیانبەخشایش ڕاوەبەر کەرمۍ".
چا ئەرەیاۋناو خانەواڎەو ئەمینیێنە کە سەروو هەژماروو ئینستاگراموو ئەمجەد ئەمینیۊ ۋەڵا کریانۊ، داوا جە گرڎوو ئا کەسا کریان کە بەشڎاری جە مەراسیمەکەینە کەرا، کە ۋېشا جە گرڎ کاروەدایۍ تنوتیژی پارېزنا.
خانەواڎەو ژینا ئەمینیۍ حەر جە سەرەتاو کوشتەی کناچەکېشاوە چېروو فشاری تنوو هېزەکا دۊڵەتوو ئېرانینە بیېنۍ، پانەی کە ئەرەیاۋناش کە کناچەکېشا بە مەڵامەتوو نەوەشی درېژ مەودایۊ گیانش جە دەسدان. جە درېژەو ئا فشارانە چن ڕۋۍ چېوەڵتەر سەفا عائیلی، لالۊو ژینۍ جە لاو هېزە ئەمنیەکاوە جە سەقز گیریا.
چنی نزیک بیەیۊ ساڵیاڎوو کوشتەو ژینا ئەمینیۍ کە هاموەختا چنی دەسپنەکەرڎەو سەرهۊردای"ژەنی، ژیای، ئازاڎیی"، فشارەکۍ پۍ سەروو خانەواڎەو گیان بەخشایا ئا سەرهۊردایە زیاڎشا کەرڎەن پانەی کە ۋېشا جە مەراسیم و ساڵوەگېڵ و گیان بەخشای ڕۊڵەکاشا دوور گېرا و چا چوارچېوەنە دەیان ئەنڎامۍ ئا خانەواڎا گیریېنۍ و چڕیېنێشا پۍ ناوەنڎە ئەمنیەکا.
ڕۊو ١٢ و ئەیلول و ٢٠٢٢ۍ ژینا ئەمینیە، کناچە کورڎەو خەڵک و شاروو سەقزی جە ۋەرکەوتوو کورڎسانی، کە بەسەردای چنی خانەواڎەکەیش تاران بۍ، بەبەهانۍ جابەجۍ کەرڎەی پیمەرەکا حکومەتی پۍ حیجابی جە لاو پۊلیسی ئەخلاقیۆ گیریا و بە مەڵامەتوو ئەشکەنجە دایۆ کۊتە حاڵەتوو کۊمای و دماو ٣ ڕووا جە مەنەیۊیش نەوەشخانەنە گیانش جە دەسدا.
جە کاروەدای کوشتەی ئا کناچە کورڎېنە، سەرهۊردای سەرانسەروو ئېرانی و ۋەرکەوتوو کورڎسانیش تەنا، کە بە ۋەرفراوانتەرین و درېژ مەوداتەرین سەرهۊردای عومروو جمهوری ئېرانی منریۊرە و جە ئاکاموو بەکار ئارڎەی تنوو تیژی هېزەکا دۊڵەتینە، زیاڎ جە ٥٠٠ کەسا گیانشا جە دەسدا و بە هەزاران کەسېچ زامڎارۍ بیۍ و گیریۍ.
