بە بۊنەو ٩یەمین ساڵڕۊو ئەمرەو ٣ ئابیوە ٢٠١٤، جەنگەواناو یەبەشە، یەژەشە و ئاسایشوو ئێزیدخانی قەبرسانوو گەشمەرڎاو گەشمەرڎە دڵگەش و گەشمەرڎە بەرخۊدانینە مەراسیمێوەشا کەرد.

 میانەو مەراسیمەکەینە یاڎوو گەشمەرڎاو مانگەو ئابی و سەرجەموو گەشمەرڎاو ئەمرەکا بەرز ئرمانیا و بانگەواز ئاراستەو گەلوو کوردی و گلێرگەی ئێزدی کریا، وەراوەروو ئا کۊنسێپت و پلانە چەپەڵانە دژوو گلێرگەی ئێزدی و تەماموو گەلوو کوردی ملا ڕاوە، وێشا قەوەتتەر کەرا.

مەراسیمەکەنە، کورتای شەنگالی، بە نامۍ فەرماندەیی یەکینەکاو مدرامانوو شەنگالیوە (یەبەشە) و یەکینەکاو ژەناو شەنگالی (یەژەشە)یۊ قسێش کەرڎۍ و کەسایەتیی گیانبەختکەرڎاو شەنگالینە یاڎوو گردوو گەشمەرڎاو ئەمرەکێش کەرڎۊ. هەرپاسە  باسوو ماناو مانگەو ئابیش پەی  ئێزدییا کەرد و واتش: مانگەو ئابی پەی ئێمەو پێکئامای ئێزدی مانگێوە سیاوەنە. چونکوم دوژمنۍ و ئەرەگیرۍ چی مانگێنە گەرەکشابۍ گەلەکەیما دلێنە بەرا و ئەمرۍ دژوارەشا سەپنا سەروو گەلەکەیمارە. 

کورتای شەنگالی ئاماژەش پەی ئانەیچە کەرد، "جە ٣ ئابینە گردلێوە چەمێشا سەروو جینۊسایدوو گەلەکەماوە قووجنۍ، ئەمرەی دژوارە و دڕندانێشا ملوو گەلەکەیمارە ئارڎە. هەزاران ئەدۍ، ژەنی، گەنجۍ و پیرێشا کۊکوشۍ کەرڎۍ، کەس نەدیا پەی ئی گەلی. ئانۍ ئی ئەمرێشا دیە و وێشا فیدا کەرد، جەنگەواناو ڕابەر ئاپۊی بێنۍ. ڕۊحوو ڕابەر ئاپۊی ئی گەلەشە پارێزنا. فەرماندەکۍ پێسە هامڕا بەرخۊدان، هامڕا عەگید، هامڕا سەعید، هامڕا حەمید و هامڕا زەرڎەشتی، ئی گەلەشا جە فەرمانەکا پارێزنا. ئادۍ بیۍ بایسوو ئانەیە ئا فەرمانۍ ئامۍ ملمارە، کۍ بێنێ؟ ئانۍ خیانەتشا کەرد، جە بەرژەوەندیی وێشاوە دیۍ و بۊنەو بەرژەوەندیی تاکەکەسییشاوە ورئامۍ. ئانۍ خەڵکەکەشا ورەت. پەوکای مشۊم دۊس و دوژمنەکاما خاس بشناسمۍ.

شەنگالی واتیچش، "ڕوەکاو تەنگانەینە تەنانەت یەک هامڕاما نەبۍ، ئانۍ وێشا بە دۊسما زانا و پارێزگارییشا وەنە کەردیمۍ، سەروو ونەو گەلەکەیماوە ژیوێنۍ. چەمێشا ئاستوو هەڕەشا و تەرسەکاو خەڵکەکەیمارە قووجنۍ و وەختۍ گەل تەوقە دریا، نەتاواشا زارۊڵێوە یان ئەدێوە ڕزگارۍ کەرا.  تەنیا فکرشا جە ڕیزەکاشا کەرڎۊ، پەوکای مشۊم دۊساو ڕوەکاو تەنگانەیما خاس بشناسمۍ و  ئیرادەیما قەوەت کەرمۍ و وێما ڕێک وزمۍ. ئانۍ ئا هەڕەشە و تەرسا وینا، جمیەروو ئازادیی گەلوو کوردی بۍ و سەروو ئا بنەمێچە دەس وزیا دلۍ دۊخەکە. گرماشا جە ئەمرەکۍ پارێزنایمۍ. ئانە  ئێمە سەروو پایاوە مردنۊ، ئەندێشە و فەلسەفەو ڕابەر ئاپۊین. ئێمە پەیش سەدان گەشمەرڎێما بەخشێنۍ، ئانەیچ هۊکار و ئامانجش هەنۍ. ئێمە پا گەشمەرڎا سەربەرزێنمۍ، چونکوم ئادۍ ئێمەشا جە جینۊسایدێوە ھەمەلایەنەی پارێزنایمۍ. پەنەوازا خەڵکما باوەڕش بە هێزەکاش بۊ. یەبەشە، یەژەشە و ئاسایشوو ئێزیدخانی بە ونەو گەلەکەیما و ڕەنجوو ڕابەر ئاپۊی ئەرەمەرزیان. 

فەرماندەکۍ یەبەشە هەرپاسە سەروو پەیمانەو لۊزانی واتش، کە گەلوو کوردی و پێکئاماو کوردی و ئێزدی مەبۊ پەشتی بە هیچ کەسێوە بەسا، وەختێوە باسوو گەلوو کوردستانی کریۊ، گردوو دەوڵەتەکا یۊی گێرا. پەیمانەو دلێنەبەرڎەی خەڵکوو ئێمەشا ئیمزا کەرڎە. هەر پێسە چەنی لۊزاننە گەرەکشابۍ گەلەکەیما کۊکوش کەرا و جوگرافیاو کوردستانی گێرا، ئارۊیچ بە ھەمان ئەقڵیەت و ئامانج بەرڎەوامی بە کۊنسێپت و پیلانگێڵنایەکاشا دژ بە نەتەوەو کورد و کوردستانی مدا. داعشیچ بەشێوەن چا پیلانگێڵنییە میاننەتەوەییە، پەوکای مەبۊ هەرگیز ئی ڕاسییە نەوینیۊ".

کورتای شەنگالی، ئاخیروو قسەکاشنە واتش: جارێوە تەر بە نامۍ فەرماندەیی یەبەشە و یەژەشە و ئاسایشوو ئێزیدخانیوە، یاڎوو سەرجەموو ئا گەشمەرڎا کە فەرمانەکێنە گیانشا بەخت کەرڎەن کەرمێوە، جە کەسایەتیی ئا هامڕایانە، گردوو گەشمەرڎاو ئەمرۍ ٧٤ەمین یاڎ کەرمێوە و قەرار مدەیمۍ هەقەشا کەرمێوە و ئامانج و وەرموو ئازادیی گەشمەرڎا مارمۍ دی.

مەراسیمەکە بە واتەی دروشمەکاو "بژیوۊ سەرۊک ئاپۊ"، " بەبۍ سەرۊکی ژیوای مەبۊ" دماییش ئاما.

س.ز