دەوڵەتە گلادیۊیەکۍ پۍ ئانەی گەلوو کورڎی دلېنەبەرا، گرڎ دەرفەتو، تەکنیک و تاکتیکېوە ۋېشا وستەن هەرمانە. بەڵام ڕاسیۍ هەن، کە ئاڎۍ پەیشا پنەنەبەرڎەن، ئاڎېچ جەنگاوەرە گیانبازەکۍ کورڎسانینۍ، کە ۋېشا بە فەلسەفەو ڕابەرو گەلوو کورڎی، عەبدوڵا ئۆجالانی ڕازنانۊ و سەرجە نۊ ۋېشا خوڵقنانۊ.

یۊ چا جەنگاوەرە گیانبازا، گەریلا یەڵدز شاهین بۆتان-ە بۍ، جە دەشتە بەپیتەکۍ کۆبانێنە جە ئەڎۍ بیە و گۊرۍ بیە. یەڵدزە کە دلۍ جەنگی و ئاخېزینە گۊرۍ بیە، دیش، کە گەلەکەش جە گرڎ لایېوە ڕوبەڕوو هەڕەشا و مەتەرسی بۊوە. حەرپۊکەی هەستش بە ۋەرپرسیاری و تۆڵە ئەسای جە دوژمنی کەرڎ و تایبەتمەنڎی جەنگیش جە ۋەرانۋەرشەنە بەقوەتتەر کەرڎ. چونکی ئا جەنگەوانۍ ئازاڎیی کە پەی گەلی و خانەواڎەکاشا جەنگشا کەرڎ، بە شێۋېوە دڕنڎانە جە لایەنو چەتەکا داعشیوە گەشمەرڎۍ کریۍ. جە دژوو ئەرەگیرکەرڎەی عەفرینی جە لایەنو دەوڵەتو تورکی کۆلۆنیالیزمی و چەتەکاوە کە ساڵەو ٢٠١٨ ی دەسشپنەکەرڎ و جە دژوو هجومەکا پۍ سەرو سەرێکانی کە ساڵەو ٢٠١٩ دەسش پنەکەرڎ، یەڵدزە تفەنگەکەش هۊرگېرت و ڕۋەش جە بەرەکا ۋەڵۍ کەرڎ، پۍ ئانەی ئاخېزو ئازاڎیی گەلی و ئا بەهۍ کە گەشمەرڎۍ بە ۋنەو ۋېشا خوڵقناشا پارېزنۊ، بە شێۋېوە فیدایی جەنگش کەرڎ.

دۋۍ برۍ و فرېوە جە خزمە نزیکەکاش بەشڎاری ڕیزەکا گەریلایشا کەرڎەبۍ، ئانەیچ ئازایش بە یڵدزۍ بەخشا کە بە تفەنگەکەیش جە کەشەکا ئازاڎینە جەنگ کەرۊ. پۊکاتی بە ویستۍ گۊرە و جۆش و خرۆشێوە فرۊ ڕوەش جە کەشەکا ئازاڎیی کەرڎ. قەرارش دا ١٥و شوباتینە بەشڎاریی کەرۊ، ئا ڕۋەی کە پیلانگێڵی میان نەتەوەیی حۊڵشدا گەلوو کورڎی جە تاریکینە بازۊوە. دماو پەروەردەو جەنگەوانە تازەکاوە، جە ڕوو ئایدیۆلۆجی و سەربازیوە ۋېش ۋەڵۍ وست و بیە بە فەرمانڎېوە سەرمەشقە.

یڵدزە ئا هەرمانۍ ئەنجامش دۍ پېسە پەنەوازی نەۋینېش، پۍ ئانەی تاۋۊ هەرمانەی گۊرەتەرە کەرۊ، ساڵەو ٢٠٢١ی داواش کەرڎ بەشڎاری هێزەکا تایبەتی کەرۊ و بۊ بە دەنگو گەلەکەیش و حەقەو هەڤاڵەکاش کەرۊوە. ئا ئەرک و ۋەرپرسیاریەی کە جە ئەستۊشەنە بۍ بە سەرکۊتەیی یاۋناش مەنزڵ. دماو ئانەی دەوڵەتو تورکی دەسش بە هجومەکاش پۍ سەرو هەرێمەکا پارېزنای مەدیای کەرڎ، پەیوەنڎیش بە هەڵمەتەی شۆڕشگێڵانۍ گەشمەرڎە ساواش مەڕەشیۊ کەرڎ، جە مەڕەکا جەنگینە بە ئازایی و توڕەییېوە فرۊ جەنگش کەرڎ. چنی هامڕاکەیش، ڕۆبن ئاڤەنتی ڕۊو ٢٥و تەمووزو ٢٠٢٣ جە ئاکامو هجومو دەوڵەتو تورکینە پۍ سەرو مېڎانو مدرامانو کەشو جودی گەشمەرڎۍ بیە.

 هـ . ش