ئه‌كته‌رێوە "فلیموو نامه‌كا جە شه‌نگالۊ"ی: ئینه ڕازەو ئاڎیشانە
عه‌لی ئاڤار، ئه‌كته‌روو فلیموو "نامه‌كا جە شه‌نگالۊ" واتش، فلیمه‌كه‌نە باسوو مدرامانی دژوو جینۊسایدی کریۊ. واتیچش: "ئینه ڕازەو ئاڎیشانە" و وێگێرەکێش فکر وستیمێوە
فلیموو نامه‌كا جە شه‌نگالۊ، كه ماوه‌كه‌ش ٨٠ دەیەقێن، لاو ده‌رسیم زه‌ره‌ڤانیوە بەرئامان، قەرارا پەی یوەم جاری جە ٣ۍ ئابینە هاموەخت چەنی ساڵڕۊو ئەمرەکۍ شاروو كیلوو ئاڵمانیاینە نمایش کریۊ. دماتەر فرەو وەڵاتاو ئه‌ورووپاینە نمایش کریۊ.
عه‌لی ئاڤار، كه دەوروو "دڵشێر هه‌ره‌كۊل"ی فلیمه‌كەنە گێڵنۊ، ئاماژه‌ش پەی ئانەیە کەرد، كورد سه‌دان ساڵێن مدرامان کەرۊ و ئا فلیمه‌یچە به‌شێوە چا مدرامانی نیشانە مدۊ، بێگومان شه‌نگالنە كۊكوشی کریا، وەلۍ چەنی ئانەیچە مدرامانێوە گه‌وره لوا ڕاوە.
واتیچش: فلیمه‌كه باسوو ڕازەو سەرەرەئامای گەشمەرڎا کەرۊ، به‌تایبه‌تی گەشمەرڎە دڵشێر، كه دەورێوە خاسش مدرامانوو شه‌نگالینە بیییەن و واتش: خه‌ڵكوو شه‌نگالی تا ئیساتێچ به پەنەزانایۊ یادش کەراوە و بییەن بە ڕەمز.
دڵشێر هه‌ره‌كۊل، یۊن جە فه‌رمانده‌كاو هه‌په‌گەین، كه ڕۊو ٣ ئابوو ٢٠١٤ شه‌نگالنە دژوو هجوومە كۊكوشییه‌كاو چه‌ته‌كاو داعشی، چەنی ١٢ هامڕایاش کەشوو شه‌نگالینە به‌شدارییش چا مدرامانە تاریخییەینە كەرڎەبۍ. دڵشێر هه‌ره‌كۊل ١٨ی تشرینوو یوە‌موو ٢٠٢٠ جە هجوومێوە عاسمانیی ده‌وڵه‌توو توركینە مەنتیقەو دۊرتیۊلوو سه‌ر به هاتاینە جە دامنەو کەشوو ئامانۊسینە گەشمەرڎە بی.
عه‌لی باره‌و دەورگێڵناکەیشۊ ماچۊ: ئانە پەی من شانازییوە گه‌ورەن، كه دەوروو دڵشێریم فلیمه‌كەنە دی، جەڕاسینە من چەنی ئاڎی هه‌مان مەیداننە مەناوە و چا ڕوێوه جە دیەی دەورەكه‌ینە هیچ مشکیلێوە نەبۍ، وەلۍ سه‌رباروو ئانەیچە پەرسام وێم ئاخۊ من شایه‌نوو ئانەینا كه ئا دەورەیە گێڵنوو.
عه‌لی ئاڤار ئانەیچش وست ڕووە، "وەختوو ڕ‌سمگێرتەی فلیمه‌كه‌ینە ژنیما هامڕا دڵشێر گەشمەرڎە بییەن، ئانەیچ كاریگه‌ریی فرەش سه‌روو منۊ نیارە، وەروو ئانەی خاستەر و سه‌ركه‌وتانەتەر هەرمانەکۍ کەروو و دەورەکەی گێڵنوو.
واتیچش: هێزه‌كاو یه‌په‌گه‌ی و یه‌په‌ژه‌ی به‌شدارۍ ئا مدرامانەیە بێنۍ و ئینەیچ فلیمه‌كه‌نە ئاماژه‌ش پەنە کریان و مەبۊ ئینسان ئانەش هۊش بشۊ، كه شه‌نگال به مدرامانوو گه‌ریلای و ئه‌و هێزا ڕزگار كریان و سەیەو گەشمەرڎانە تاواما سەروو پایاماوە مردمێرە و مەبۊ هەرگیز ویرما بشا.
س.ز
