ئەنجامنامەو کۊنفڕانسوو ژەناو ڕاوەبەرایەتییە هەرێمییە دیموکراتیکەکاو پارتوو یەکسانی و دیموکراسیی گەلا (هەدەپ)ی ئاشکراش کەرد. کۊنفڕانسەکەو هیزی بە دروشموو "چەنی ژەنی، ژیوای، ئازادی بەرەو ڕاوەبەرایەتیی هەرێمیی ئازاد"ی ساز کریا. کۊنفڕانسەکە جە کەسایەتیی هەڤرین خەڵەف، یوسرا دەروێش و قەدەر ئۊرتاکایاینە، کە سەرنیشت و وەرکەوتوو سووریاینە تیرۊرۍ کریۍ، پێشکەش بە گردوو ژەنە کۊشەرا کریا.

ئەنجامنامەکەنە باسوو نوێنەرایەتیی ژەنا کریان، کە جە یەرۍ ئەنداموو ئەنجووومەناوە دەسش پەنە کەرڎەن  و یاوان بنەماو نوێنەرایەتیی یەکسانی و هامسەرۊکایەتی، کە جە تارێخوو کۊشیای ژەنانە پێسە دەسکەوتێوە منریۊرە و ئانەیچە وزیان ڕووە، کە جە "ورچنیەی هەرێموو ٢٠١٤ینە پڕەنسیپ و بنەماو هامسەرۊکایەتیی نوێنەرایەتیی وێمانە، گردوو میکانیزمەکاو وێماما چەسپنۍ و سەرباروو گردوو هجوومەکایچ یەک هەنگام پاشەکشێما نەکەرڎە".

ئانەیچە وزیان ڕووە، کە ئیساتێنە، کە بەرەو ورچنیەیە هەرێمی و وێمانەکا ملمۍ وەعد مدا، کە سیستموو وێشا قەوەتتەر کەرا و ئەرەیاونیان: "مەبۊ کەس گومانیش بۊ، کە تواناو ئێمە پەی مسۊگەرکەرڎەی بەشداربییەی کاراو ژەنان ورچنیەی ڕاوەبەرایەتییە وێمانەکانە و ئەنداماو ئەنجوومەنوو شارەکانە و ئەنداماو ئەنجوومەنوو شارەوانییەکانە و هامسەرۊکاو شارەوانینە".

بەشێوە تەروو ئەنجامنامەکەی تەرخان کریان پەی پەرسەو گۊشەگیریی ڕەهای سەروو ڕابەروو گەلوو کوردی عەبدوڵڵا ئۊجالانیوە و چا بارەوە ئامان، "بییەی گەلوو کوردی ئیمراڵینە گۊشەگیر کریۊ" و ئەرەیاونیان: "حکومەتێوە کە بە سیاسەتی دوژمنکارانەو وێش سەروو پایاوە مرڎان، ئارۊ فاڕیان پەی ڕژێموو گۊشەگیری. بە قووڵکەرڎەیوە گۊشەگیریی  جەنگی زیاتەر تەشەنەش مدۊ پەنە.  بەڕێز ئۊجالان ٣٢ مانگێن ئینا چێروو گۊشەگیریی ڕەهاینە ئازیانۊ.  ئارۊیچ پێسە هێزی ماچمۍ، ئانە بییەی گەلوو کوردین کە موازۊ، جە زیندانوو ئیمراڵیینە گۊشەگیرش کەرا. ئێمە بێوچان ماچمیشۊ، کە بەڕێز ئۊجالان گەرەنتیی ئاشتیی شکۊمەندانەو ئا خەڵکەینە. کرێڵوو چارەسەری دیموکراتیکوو پەرسەو کوردین. بە ئەندێشەکاش  پەی گەلاو دنیۍ بەتایبەتی وەرکەوتوو دلیرسەی گەورەتەرین هومێدا. ئانۍ کە متاوا گۊشەگیریی ڕەها سەروو بەڕێز ئۊجالانیوە دمایی پەنە بارا و ئازادیی جەستەییش مسۊگەر کەرا، ژەنینۍ، کۊشیای و پاگێرتەیرەین، کە بە وەڵێکەوتەی ژەنا ڕوەشئینا ورکێشیاینە. ئێمە پا بڕوا و قەرایوە جووڵیەیمیوە، بە بەیاگەیاونای و بەعەمەلیکەرڎەیوە پاڕادایمی دیموکراتیک، ئیکۊلۊژیک، ئازادیی ژەنا و ڕاوەبەرایەتیی وێمانەییما گۊشەگیریی ڕەهای ماڕمۍ ملوو یۊیرە".

بەشێوە تەروو ئەنجامنامەکەی تایبەت کریان پا جەنگە تایبەتەیوە کە دژوو ژەنا و گەنجا هەن ئارانە، ئاماژە پانەیە کریان یۊ جە مەیدانە گرنگەکا پەی وەرپەرچووئا جەنگە تایبەتەیە، ڕاوەبەرایەتییە هەرێمی و وێمانەکانۍ چا ڕووەوە ئەرەیاونانشا: "بە سەرجەنۊ ئەرەمەرزنایوە ڕێکوزیای و ئەرەمەرزیایەکا چا بوارەنە خەبات کەرانۍ،  جە ڕاو ئا ڕیکوزیایاوە و تیمی گێڵیاریوە کە سازشا کەرمۍ و ئەنجوومەنوو گەڕەکا و دەگایەکا ئێمە گردوو گەڕەکەکا کەرمێوە سەر و ڕێکیشا وزمۍ، چونکوم مزانمۍ قەوەتتەرین ڕێباز وەراوەروو سیاسەتەکاو جەنگی تایبەتیوە وەرفراوانکەرڎەی ڕێکوستەی و یۊگێرتەیی ژەنان.

ئاخر بەشوو ئەنجامنامەکەیچەنە ئاماژە بە هجووم و کاولکارییەکاو سەروو ژیوگەی کریان، کە جە ڕاو بەرتیلی و تاڵانکارییوە دەرە، بەحر، دارسان و ژیوگە بەتەمامی ڕووبەڕووۍ دلێنەشییەی کریێنێوە و هەناسە جە ئینسانەکا بڕیان، ئینە جگە چانەی جە ڕاو سۊچنای دارسانەکاوە کوردستاننە و چێرئاووستەی شارە تارێخییەکاوە کولتوور و تارێخوو گەلا کریۊ ئامانج.

چا ڕووەیچەوە ئەرەیاونیا، کە وەراوەروو ئا هجووومانە پەی ساتێوەیچ دەسبەرڎارۍ هەرمانەو پارێزگاری خە دارسان و ژیوگەی مەبا و کایەکاو ژیوای بە پاو پارادایموو ئیکۊلۊژیکی ڕێکۍ وزا و بونیادشا منیا.  

ئاخروو ئەنجامنامەکەینە ئامان، ئێمە هێزوو وێما جە پابەندبییەیما بە پاڕادایمەکەیما ورگێرمۍ، ئێمە هەم وێما و هەم گلێرگەی دیموکراتیک بە هۊشمەندی ئانەیۊ، ڕاوەبەرایەتیی هەرێمی تەنیا دلۍ بیناو شارەوانییەکانە دەسەبەر مەبۊ، ئەرەمەرزنمۍ. بە گێڵایوە پەی جەوهەروو وێما، ئێمە پاڕادایمی دیموکراتیکی، ئیکۊلۊژیک و ئازادیوازووو ژەنۍ میاونمۍ یاگۍ. پاڕادایمما هەن، هێز و بڕوا و ئیرادەما هەن، کە ئانەیە میاونمۍ یاگۍ، گردوو ئانەیە جە ژەنۍ و گلێرگەی سنیانۊ ورش گێرمێوە و ژیوای ئازادانە بونیاد منیەیمێ".