ناوەندووئەرەیاونای یەکینەکاو پارێزنای ژەنا (یەپەژە) ئەرەیاوناێوەنە ئاشکراش کەرد، کە ژەنۍ گەنجەی ئێزدییە بە نامۍ فریاڵ خدر-ێوە دەسوو چەتەکاو داعشیوە ڕزگارشا کەرڎێنە.

ئەرەیاونیاکەینە ئامان، "ساڵەو ٢٠١٤ وەختوو هجووموو داعشینە پەی سەروو شەنگالی، فریاڵە عومرش ١٢ ساڵۍ بۍ. وەختێوەنە خەڵکوو شارەکەی گەرەکشا بۍ وێشا چا چەتا نەجات بدا، چەتەکا ناست و ڕاشا وەنە گێرتۍ بڕۍ جە ئەنداماو بنەیانەو فڕیاڵۍ و بەشێوە فرەو خەڵکوو شەنگالی عومری جیاجیانە، بەتایبەتی ژەنی و کناچۍ ئڕفانیۍ و کەسۍ بەتەمەنێچ حەر چا یاگێنە کۊکوشی کریێ".

ئا گەنجە ئێزدییۍ کە ئیساتۍ عومرش ٢١ ساڵێن، بارەو نەهامەتییەکاو دماو ئڕفانایشۊ قسێش کەرڎۍ. بە پاو قسەکاو فڕیاڵۍ، ڕێکوزیاو تیرۊریستیی داعشی ئادێشا ئڕفانۍ و فاڕێشاوە پەی مەکتەبێوە گەورەی تەلەعفەرنە. دمایی ژەنی و پیۍ و تەنانەت زارۊڵە کناچڵێچشا جیۍ کەردیێوە. هەرپاسە کناچۍ و ژەنیشا جە یۊی جیۍ کەرڎێوە و پێسە کۊیلەی فاڕێشاوە پەی موسڵی و چاگە ئەمیرەکۍ کناچەکێشا ورچنیۍ و بەرڎێشا ورەتەی، بۍ ئانەیە گۊش بە گەورەیی و گولانەییشا بدا. دماو ماوێوە مەنەیۊ موسڵنە، چەنی کناچێوە لالۊزێش پێسە کۊیلەی فاڕیێنێوە پەی شەدادوو سوریای و مەکتەبێوەنە ئازیێنێوە".

درێژەو ئەرەیاوناکەینە ئامان، " پێسە گردوو ژەنا و کناچای تەری، فریاڵە دلۍ تەرسۍ و تۊقناینە بیێنە.  وەختوونامنویسیشانە لاو داعشیوە، تا ئەمیر و ئەندامەکێشا ورشاچنا فرە تەرسێنۍ. پێسە دەسکەوتی و غەنیمەتوو جەنگی بەزۊر مامەڵەشا چەنی کریان. ئا کناچۍ ڕەتشا کەرڎەبێوە کە بلا چەنیشا، ئەشکەنجە دریێنۍ. شەدادنە داعشی تیرۊرست یەرۍ جارۍ فریاڵەشا ورەتێنە.

فریاڵە هەڵای عومرش نەیاوابۍ ١٤ ساڵۍ، چەنی کناچێوە تەرۍ فاڕیێنێوە پەی ڕەقەی و چا ورەشیێنۍ. چا لاو وەرپەرسێوە داعشیوە بە نامۍ ئەبو محەمەدیوە گیریێنۍ و مەنێنیوە، تا بیێنە بە ١٥ ساڵۍ. هەڵای زارۊڵۍ بیێنە، کە زارۊڵێوەش وینان. ئا چەکدارەو داعشی کە شووش پەنەکەرڎەبۍ وەختوو ئۊپراسیۊنوو ئازادکەرڎەی رەقاینە بە هجوومێوە عاسمانی هامپەیمانیی میاننەتەوەیی کوشیا".

بە پاو ئەرەیاونایەکەی"فریاڵە باسوو ئانەیش کەرڎەن، کە وەختوو دەسپەنەکەرڎەی ئۊپراسیۊنەکەو قەسەدەینە، داعش چەنی ئادە و ژەنۍ تەرێش بە زۊر ڕەقاوە بەرەو دێرەزۊر و بەتایبەتی باغۊز فاڕێنێوە و بیابانەکانە سەرڎا و ئاوراییشا چەشتەن، بەتایبەتی کە زارۊڵێوە ساوایچش پەنە بییەن. دماو ماوێوە کەمی بەرڎێنەشا پەی بابی و چا دووۍ ساڵۍ مەنێنۊ، دمایین جاریچ بەرڎێنەشا پەی ئیدلبی.

دماو ئا گەشتە دژوارەیە، فریاڵە گەرکش بییەن بە گرد نۊعۍ وێش چا تیرۊریستا نەجات بدۊ، چاگە یەپەژە تەماموو هەوڵەکاش وستێنۍ هەرمانە پەی ئازادکەرڎەیش. هەوڵەکاو یەپەژەی پەی ڕزگارکەرڎەی فریاڵۍ و یاونایش بە هەرێمەکاو سەرنیشت و وەرکەوتوو سوریای سەرکەوتۍ و دما جار ڕزگارەشا کەرڎە.

چەتەکاو داعشی ٥ جارۍ فڕیاڵەشا ورەتە، فریاڵە هەڵای مەزانۊ، کە چەتەکاو داعشی قەوم و کەسوکارەکەشا کوشتێنە یا مەنێنێ".

س.