پاڕێزنەر ئەمیر ڕەئیسیان باسوو ئانەیش کەرد، کە موەکیلەکەو ئیلناز محەمەدیۍ دادگانە جە تۊمەتوو 'هامکاری چەنی حوکمەتی بیانی'ی بێبەری کریان و ئانەش سەرۊ ساق نەبییەنۊ.  

ڕەئیسیان وستیچش ڕووە، کە بۊنەو تۊمەتەکای تەریوە، پێسە پیلانگێڵنای و کۊبییەیۊی نایاسایی سزاو یەرۍ مانگا زینڎانی ملوو ئێلناز محەمەدیۍ و نگین باقریێرە سەپییان، وەلۍ ماوەو یۊ جە ٤٠وو ئا سزۍ زینڎاننە بەرا سەر و سزێکۍ پەی ماوەو پەنج ساڵا ورپەسێریۊ و ئەگەر جا پەنج ساڵەنە تۊمەتی هامشێوەشا سەرەرە ساق کریۊوە، مشۊم ئا ماوە کە جە سزێکێشا مەنۊوە بلا زینڎان.

ئا دووە ڕۊنامەنویسۍ ناچارێنۍ پەی ماوەو ٥ ساڵا گرد فەسڵێوە بەشداری جە دەورێوە خولی ئاکاروو هەرمانۍ ڕۊنامەوانیێنە کەرا، چا ماوەنە گەشتوو بەروو وەڵاتی و هەرمانەی ڕۊنامەوانیییەشا وەنە قەدەغە کریۊ و بە حیچ نۊعۍ مەبۊ پەیوەندییشا پا کەساوە بۊ، کە دەزگاکاو ئەرەیاونای بێگانانە هەرمانە کەرا.  

دماو دەسپەنەکەرڎەی سەرەورڎای"ژەنی، ژیوای، ئازادی" بە دەیان ڕۊنامەنویسۍ و میدیاکارۍ ئێراننە و وەرکەوتوو کوردستانینە گیریێنۍ، کە تا ئیساتێچ بەشێوەشا ئینۍ زینڎاننە و ڕووبەڕووۍ سزای قورسۍ بیێنێوە.  

س.ز