یەرەکە ئەرەیاۋنەش، کە جە هجومۍ فڕۊکەی بۍ فڕۊکەوانی دەوڵەتو ترکی ئەرەگیرینە، کە جە ٢٨ و تەموزینە جە هەرېمو پېنجوېنە و سەر بە پارېزگاو سلېمانینە کریا، ٢ گەریلۍ گەشمەرڎۍ بیۍ و سەرەوەشیش جە خانەواڎەیشا و گەلوو کورڎسانی کەرڎ.
ناۋەنڎو ئەرەیاۋناو یەکینەکا پارېزنای ۋەرکەوتوو کورڎسانی(یەرەکە)، ئشناسنامەو ٢ گەریلایا ۋەرکەوتوو کورڎسانیش ئاشکرا کەرڎ، کە جەئاکامو هجومېوە ئاسمانی دەوڵەتو ترکینە گەشمەرڎۍ بیېنۍ.
ئەرەیاۋناکە پی جۊرەنە:
پېسە مزانیۊ چی ساڵا دمایینە دەوڵەتو ترکی فاشیستی قڕکەری، جە ۋەران ۋەرو گەلوو کورڎینە جەنگېوە ۋەرفراوانش دەسپنەکەرڎەن و جە گرڎ مېڎانۍ کورڎسانینە هجوم کەرۊ سەرو سەرمەشقاو ۋڵات پارېزا کورڎی. جە ئاکامو ئا هجومانە هەم جە گەلی و هەم جە شۊڕشگېڵنا کورڎسانی گەشمەرڎۍ کریا.
جە چوارچۍوەو ئا هجومانە کە ۋەڵتەر پۍ ڕای گرڎیما ئاشکراکەرڎەبۍ، جە ٢٨ و تەموزینە جە دۊروبەرو مەنتیقەو چوارتای نزیک بە پېنجوېنۍ، فڕۊکېوە بۍ فڕۊکەوان و ترکی، جە وەختېنە کە هەڤاڵەکېما سەرو ئەرکو ۋېشا بېنۍ، هجومش کەرڎ سەرو تڕۊمبېلېوەما. جە ئاکامو ئا هجومەینە ٢ ۍ هەڤاڵېما گەشمەرڎۍ بیۍ و دۋۍ هەڤاڵېچما زامڎارۍ بیۍ.ئا هەڤاڵېما کە گەشمەرڎۍ بیۍ ' شیلان زاگرۊسە و زاگرۊس زرېبار 'نۍ .
ئشناسنامەو حەرڎوە گەشمەرڎەکاما پی جۊرەنە:
نامۍ و دمانامۍ / هەدیە گەردەنە
ناسنامۍ / شیلان زاگرۆس-ە
وەختو یاگۍ بەشڎاربیەی / ٢٠٢٢/ بانە
وەخت و یاگۍ گەشمەرڎەبیەی / ٢٠٢٣/چوارتا
****
نامۍ و دمانامۍ / ئامانج (رێکەوت) شەریفی
ناسنامۍ / زاگرۆس زرێبار
وەختو یاگۍ بەشڎاربیەی / ٢٠٢٢/ پێنجوێن
وەخت و یاگۍ گەشمەرڎەبیەی / ٢٠٢٣/چوارتا.
حەرڎوە هەڤاڵەکېما جە مەرحەلەو بەشڎاربیەیشا دلۍ ڕیزەکا گەریلاینە بە پا گیری و گیانبازیۍ فرۊ بەشڎارۍ بېنۍ. پېسە گەنجا کورڎسانی چا مەرحەلەنە ئەرکو ۋەرپرسیاری ۋېشا گېرت ئەستۊ و بەتایبەتی جە وەختېنە کە گەلوو کورڎی پەی ئازاڎیی و بیەو ۋېش دلۍ کۊشیایۍ سەرەمڕەیرە ۋیەرۊ، پۍ ئانەی دەورشا بۊ، بە ڕۊحۍ ئاپۊیی هەڵۋېسی گەنجانە و ۋېشا پنە یاۋنا.
بەجۊش و خرۊش و ورۊ ڕەنگەش بە ژیۋای گەریلای بەخشا
گەشمەرڎە شیلانە جە شارو بانەی دلۍ هەرېموو خانەواڎېوەنە بە کلتوری ۋڵاڎپارېزی گۊرۍ بیە. جە مەرحەلەو ئاخېزوو"ژەنۍ، ژیای، ئازاڎیی"نە، کە جە کورڎسان و جەهانەنە دەنگش داوە، پېسە ژەنېوە گەنجەی کورڎۍ هەڵۋېسی شۊڕشگېڵنیش گېرتەنە ۋەر و بەشڎاری ڕیزەکا گەریلاکا ئازاڎیش کەرڎ. سەرەڕاو عمرۍ گەنجی، پېسە کەسېوە ژیرۍ و چنەئامۍ جە ژیۋای و خەباتی شۊڕشگېڵنینە چالاکانە بەشڎارە بۍ.بەجۊشو خرۊشی گەنجانۊ ڕەنگەش بە ژیۋای گەریلای بەخشا. پېسە گرڎو هامڕاکاش ئاواتش هامڕایی ڕاستەقینە بۍ چنی ڕابەر ئاپۊی و گەشمەرڎا. پۍ ئانەیچ ۋەردەوام حۊڵ دۍ ۋېش جە فەلسەفەو ئەندېشەکا ڕابەر ئاپۊینە قوڵ کەرۊوە. پۍ ئانەی تاۋۊ شۊڕشگېڵیېوە بە ئاڕاسەو ڕاسی ڕابەرایەتینە وەڵۍ وزۊ و حەقە جە دوژمنی کەرۊوە. گرڎو وزەو ۋېش سەرو ئا ئەساسیە ڕېکوزۍ، ۋېش جە ۋەران ۋەرو ڕاسی دوژمنینە بەقوەت کەرۍ. جە ڕاو پاڕادایمو ڕابەر ئاپۊیۊ گەرەکش بۍ ۋېش پانەی بیاۋنۊ کەرۊش بە ' خودبیەی ' جە کەشە ئازاڎەکانە گەرەکش بۍ بۊ بە صەڎاو گرڎو ژەنا. بەتایبەتی ژەنا ۋەرکەوتوو کورڎسانی و ئېرانی. چا چوارچېوەنە ۋېش سەرو پاڕادایمو ڕابەر ئاپۊی پەروەرڎە کەرڎ ، پۍ ئانەی گورزە جە دوژمنە ئەرەگیرەکا بڎۊ.
چا وەختەنە سەروازی زۊرە ملۍ بۍ ئاما دلۍ ڕیزەکا گەریلای
گەشمەرڎە زاگرۊس، دلۍ خانەواڎەو مەنتیقېوە ۋڵاڎ پارېزینە گۊرەبی. حەر جە زارۊڵەیۊ جە نزیکۊ پەژاکش ئشناس و چنی وەڵېکۊتەی ئاخېزوو ۋەرکەوتوو کورڎسانی گۊرە بی. ئا وەختەی ئاخېزوو "ژەنۍ، ژیای، ئازاڎیی" دەسش پنەکەرڎ، سەروازی زۊرەملۍ ئېرانی بۍ. جە ۋەران ۋەرو فشارەکا سیستمی دژ بە گەلەکەیما چا مەرحەلەنە، هەڵۋېسی ۋڵاڎ پارېزیش گرتەنە ۋەرو بەشڎاریش جە ڕیزەکا گەریلاینە کەرڎ. جە ئەوەڵ ساتو بەشڎاربیەیشۊ تا وەختو گەشمەرڎەبیەیش، بە هەڵۋېسېوە گیانبازانەو قەناعەتېوە بېهامتاوە تېکەڵ بە ژیۋای وکۊشیای ئازاڎیی بی. گرڎوو ئەرکو ۋەرپرسیاریەکاش بەشېۋېوە بەقوەت جابەجۍ کەرڎو پېسە ڕېبوارو شۊنکۊتېوە گەشمەرڎا جماوە. ئامانجو ئاڎیی پېسە گەریلېوە سەردەمی تازەی بریتی بۍ چانەی جە گرڎ ڕۋېوە ۋېش بیاۋنۊ ئاستو جەنگاوەرېوە ڕاسەقینەیی ڕابەر ئاپۊی.سەرو ئا ئەساسیچە جە ڕاو فەلسەفەو ڕابەر ئاپۊیۊ ۋەردەوام جەڕوو ئایدۊلۊجی و سەروازیوە ۋېش پەروەرڎەکەرڎ.
پېسە یەکینەکا ۋەرکەوتوو کورڎسانی یەرەکەی، ئېمە بەڕېزو ئیحترامۊ یاڎو ئا گەشمەرڎاما کەرمېوە، سەرەوەشی جە گرڎوو گەلی ۋڵاڎپارېزی و نیشتیمانپەروەرو کورڎسانی، بەتایبەتی خانەواڎەی بەڕېزو نرخدارو هەڤاڵاما کەرمۍ. وەعد مڎەیمۍ ئاڵاو کۊشیایشا ۋەردەوام بە شۊکیایی ڕاگېرمۍ و بە ڕزگارکەرڎەی و بنیاڎنیای کورڎسانېوە ئازاڎیی و دیموکراتیکی حەقەشا بسانمېوە.
هـ.ش
