مرۆڤ بوونەوەرۍ جیاوازا جە بوونەوەرەکا تەری بەبێ کۆمەڵایەتی بییەی و پێوەرە ژیوای بییەیش ماناش نییەنە. هەڵبەتە یۆ جە بنەماکاو بە گلېرگەبیەو مرۆڤایەتی باوەڕمەنڎین کە دلۍ گرد تیرە، هۆز و نەتەوەیێوەنە بە شێوازێوە بییەن و هەن و بۆنە. دین و باوەڕی دلۍ گلېرگەکانە بییەن بەپارێزنەرو ئەخلاقی و فەرهەنگی. گلېرگەو کوردەواریچ حەر جە قەڎیمۆ خۊتان دین و باوەڕی وێش بییەن. جە ئانیمیزمەوە گێرە تا بە میترائیزم-ی بیاوۆنە، ئایین و باوەڕەکەش کاریگەری وەرچەمش سەروو نەتەوە و ئایینەکا نیانەرە و تا ئا وەختەی کە دینو ئیسلامی یاگۍ دین و باوەڕیە وەڵینەکاش گێرتەنۆ و بییەن بە باوەڕی بەشێوی فرە جە گەلەکەیما.

حەر چنڎە دین و باوەڕی تازە حۊڵش دابۆنە تا ئاینی وەڵینی دلێنە بەرۆنە و تۆمەتبارش کەردەبۆ و سزاش دابۆ، بەڵام چوونکیم دین و باوەڕی بنەماو سەرەکی گلێرگەو کوردەواری بییەن ئانەشە پنە نەکریان و فاڕای دینی یان ئۆمای دینی تازەی بە ئاسانی نەتاوانش گرڎوو مەراسیم و پیرۆزیە ئایینیە وەڵینەکا دلێنە بەرۆ و دلێ وێشەنە تاونۊشاوە یۆ چانیشا مەراسیموو پیشالیاریا.

پیرشالیار و سۆفیەكێ بە تەهلیلەو هۆرپرای ئاینی و دەنگ و سیاچەمانەی هەرەسە بەسەختی وەرزو زمسانی مارا، موژدەو ساڵێوە تازەو وەهارێوی پەڕ بەرەكەتی بە ئەرەنیشتا و دەگێ مانە،

زاوڵێ دەگۍ یانەو یانە گێڵا هەواڵ و یەسنەو پیری بە بنەیانەكا یاونا، پاڵ و یانەو پیرشالیارینە موبارەكی ئاینەكا میترا و ئاڤێستا و یارسانەكا چنی دین و ئیسلامی تێكەڵ بە یۆی بیێنێ، بەگێتەمەژگێ و قوربانی كەردێی هۆرامیانە ویشا مرمانا، یەسنەو پیری مەراسیمو ئاهورا و هۆرامیەكان، یەسنەوپیرو هۆرامیەكا پێسە نەریتێوی ساڵانەی، چلێ زمسانیەنە ساز كریۆ ، بنەیانەكۍ هۆرامانی بەجۆش و خرۆشۆ ئامادەكاریش پەی كەرا، سیمای ئاینی و كەلتوری مەنتیقەکەیش چنەبەركۆتەن، چی یەسنەنە حیچ بەروارێوەش چنە دیاری نەكریان، بەپاو هیچ مانگێوی رێك نەوزیان، تەنیا دلێراسەو زمسانینە قسێ سەرو زوان و هۆرامیەكان، ئینەیچە پاسەش كەردەن نەبۆ بە موڵكو حیچ ئاینێوی تەری، چی یەسنەنە رۆ چوارشەمەی موبارەكتەرین ڕۆ حەفتەیا و مەراسیمەكەش چەنە ساز كریۆ. هەمان وەختەنە جۆرێ جە حاڵ و زیكر و هۆرپرای تایبەت بە مەراسیمەكەی نمایش كریۆ، جە حیچ یەسنەو ئاینۍ و نەتەوۍ تەرینە مەوینیۆ، وەڵینەگەو پەیا بیەی ئی یەسنەیە دیاری نەكریان  بەڵام سیماو گرد ئاینەكا مەنتیقەکەیش چنە بەدی كریۆ , وەڵینگەش پەی وەڵۍ میلادی گێڵۆوە

پیرشالیار و ماناو پیرێ جە هۊرامانەنە

پیر جە وەڵینگەو هۆرامانیەنە پلێوی ئاینیش بیەن، بە كەسێوی جە خواتەرسی وچیان، پۆكەی پیرەكێ هۆرامانی موبارەكی وێشا بیەن، لاو مەردمیۆ قەڎرشا گیریان، دماو مەردەیشا مەزارێوی تایبەتشا پەی وەشکریان، مەردم جەوەخت و گرفت و قورسیەكا ژیوایشانە لوێنێ سەرو مەزارەكەیشا و دوعاو ئەوەلاڵیایشا کەردەن , سەبارەت بەنامۆ پیرشالیاریچ، كەسێوی زاناو عارف بیەن، وچیۆ كتێبێوەش دماو وێش ئاستەنجیا  "بەنامۆ ماریفەت و پیرشالیاری'' ئیكتێبە بە زوانو  هەورامی نویسیان , پێسە ئاڤێستای بەند بەندا و لاو زەردەشتیەكاوە موبارەكا، دماو گرد بەندێوی ئی دێڕێ نویسێنۆ

هۆشت جە واتەی پیرشالیاری بۆ

گۆشت جە كیاستەی زانای سیمار بۆ

قۆناغە جیاجیاکۍ لوای ڕاوەو زەماونەو پیری

زەماونەو پیری بە چن هەنگامێ دەس پننەكەرۆ، ماۆو چن روێوی خواینۆ حەفتێو وەڵێ دەسپەنەكەردۆو مەراسیمەكەینە، چن بنەیانێوە كە ئەركدارێنێ بە پارێزنای یانە و موڵك و پیری، جە راو زاوڵا دەگێوە یانەو یانە گێڵا و وەزی گلێرێ كەراوە، پی قۆناغەیچە ماچا خەبەر. دماو خەبەری بە حەفتێوە ڕۆو چوارشەمەی كڵاو ڕۆچنە دەس پنەكەرۆ، چا روەنە حەریانێو بەپاو تواناو وێش، شیرینی سەرو زاوڵارە بەش كەرۆ، هەنگامەی دماتەرە قوربانی كەردەیا، یاگێوە تایبەتەنە چن ئاژەڵێوە كەرا قوربانی. بەشێو جە گۆشتەكێش سەرو فەقیرا دەگێرە بەش كریۆ، بەشێوی تەر جەگۆشت و قوربانیەكەی كریۆ بە چاشتە تشێ دریۆ بە مێمانەكا، هەمان رۆنە دماو نماو عەسری  مەراسیمو زیكری وەرودەم و یانەو پیریەنە دەس پنەكریۆ،  ئینەیچە پەی ماۆو دووۍ روا بەردەوامبۆ. جە حەفتەی دماتەرەنە مەراسیم و تربێ دەس پنەكریۆ، بە وەشکەردەی گێتە مەشگێ كە واردێوی میلی هۆرامیان و چا مەراسیمەنە هەربنەیانێو ملۆ سەرو یۆ جە پیرەكا هۆرامانی و تۆشەبەرەكێش چاگە كەرۆوە، دماو ئانەی گردو گێتە مەژگەکا تێكەڵ كەرا دماتەر دەس بەواردەیشا كریۆ، ئانەیچە پێسە ئاماژێوی پەی نەبیەی چینایەتی و بەروستە و ڕەمز و یەكسانی و پێوەرە ژیوای  دلێ ئەرەنیشتاو هۆرامانیەنە.