ئەندامۆو کۆمیتەو مېیانو پەکەکەی هێلین ئومیدە جە بەرنامێوە تایبەتی تەلەڤزیۆنو مەدیا خەبەرینە قسێش کەرڎۍ و سەرو پرسە هەنووکەییەکا هۆرسەنگنایش کەرد. هێلین ئومیدە سڵامش ۋنەو ۋێنیشاندایەکا کۆڵنی کە پەی ئازادیی رابەر ئاپۆی و گلێرۆبیەکەو ئێلیحی جە دژو زەوت کەردەی ئیراڎەی کەرڎ و واتش، "ئەر ئەرەکۆشیەیمۍ و بە پاگیریۆ جە گرڎو مېڎانەکانە هەرەکەتما نیشانە بڎەیمۍ، ئەر هەنگامە پەی دمای نەنیەیمۍ، بە شێوۍ عال جمێوە، متاومۍ سیستەمو قڕکەردەی ئیمراڵی هۆرشێونمێوە. ئێمە ئینایمۍ سەردەمو ئازادینە. نمەبۆ هەڵوێسێوە گێرمێنە ۋەر کە دماتەر و نەگونجیۆ چنی ئی سەردەمەیە ".

هێلین ئومیدە ئانەش وست ڕووە کە مشۆم هەڵمەتەو ئازادی سەرو بنەماو ئازادیی جەسەیی رابەر ئاپۆی بە چالاکی دۆڵەمەنتەر و فرەرەنگتەر بەردەوام بۆ و واتش، "مشۆم تورکیایچەنە دەسوەڵێوستەی ئازادی وەڵۍ وزیۆ. سەرو ئا بنەمایۍ من داوا جە رۆشنۋیرا تورکی و وڵاتپارێزنا تورکی مکەرو. داوا جە رای گرڎیی دیموکراتیکی تورکیای مکەرو. بە راسی چێوۍ کە پېسە دەسوەڵێوستەی دۆڵەتی کە باسش چۆوە مکریۆ هەن و نامێوە پا جۆرەشا پۆوە نیان. دەسوەڵێوستەی دۆڵەتی بەمەبەسو پاکتاوکەردەین. ئێمەیچ ماچمۍ پەی ئازادی و دیموکراسی دەسوەڵێوستەی گەلی ساز بکەردۍ".

هێلین ئومیدە سەرەتاو قسەکاشەنە واتش" سڵام جە ئەرەکۆشای بێهامتاو ڕابەر ئاپۆی مکەرو کە ئیمراڵینە ڕاوەبەرش مکەرۆ. هەڵبەتە ئەنجامدای چەمپنەکۆتەی دماو ٤٣ مانگا جۆشوخرۆشێوە فرەش دلۍ گەلی و تەڤگەریمانە وەشکەرڎ. بێگومان سیستەمێوە وەشکریای سیاو جە تورکیانە هەن، پەنەوازا چی سیستەمەیە عال بیاومێنە. پۊکەی جە قسەکامانە گرڎ کاتێ هەوڵمدان سیستەمو قڕکەردەی ئیمراڵی عال پێناسە بکەرو. سیستەمێوە قڕکەرا کە ئازادیش چنە سەرکوتکریان. ویستو سیستمو قڕکەردەی ئیمراڵی ماڕای ئاینڎەو گەلان. واوەی بەرکۆتۆ کە بەبێ پێناسێوە عال و ئەنەیاوای جە ئیمراڵی نمەتاویۆ پێشئامایەکۍ ئیمراڵی هۆرسەنگیا.

چا بارۆ جە ئیساتێنە سەرو ئی مژاریە جەنگێوە تایبەتی سەخت ئەنجام مڎریۆ.

دۆڵەت-نەتەوەو تورکی ناچاربی ڕا بە چەمپنەکۆتەی بڎۆ

هێلین ئومیدە سەرنجش وست سەرو ئانەی کەجە ئەساسەنە دۆڵەتو تورکی ۋەرو دوۍ مەڵامەتا سەرەکی ناچاربی کە چەمپنەکۆتەیۍ پاسە پێکبۍ. مەڵامەتی سەرەکی مڎرامانی بە شکۆو ڕابەر ئاپۆیا کە ئیمراڵینە پېسە ناوەندێوە ئەرەکۆشای ڕاوەبەرش مکەرۆ. جەنگی جەهانی یەرەم کە گرڎ مېڎانێنە نرخنایش پەی مکەرمۍ. بەڵام گرڎ کاتۍ جەختما چانەی کەرڎەن کە ناوەندی سەرەکی جەنگو جەهانی یەرەمی ئیمراڵییا.

پا دەرەنجاما بەرۍ کۆتێنۍ بەڕاسی جە ئێمراڵیینە ڕابەر ئاپۆ مڎرامانێوە بە شکۆ ڕاوەبەر مکەرۆ. پاسشە کەرڎەن کە دۆڵەتو تورکی دووچارو ئا حەقیقەتەیە بۆوە. چنی بەرکۆتەی زیاتەرو کاریگەرییەکا ئی جەنگەیە، موینمۍ جموجوڵی زیاتەر جە ئیمراڵینە وەش بۆ. مشۆم پەی ئانەیچ هەڵوێس و مڎرامانو ڕابەر ئاپۆی بە گەورەیی بوینیۆ و هۆرسەنگیۆ. ئینۍ گرڎ مەڵامەتی یووەمەنۍ. چی چەمپنەکۆتەیۆ پی جۆرە وەش بی؟ ماچا کاتەکەش تەمامیان و نمەزانو چێش... بەڕاسی ئینە لایەنۍ پروپاگەندەین. حەقەتینەکەش ئانەنە پاسشا نیابێرە بە سەپنای ئا سیستەمە قڕکەرەیە کە جە کەسایەتی ڕابەرینە سەرو گەلوو کوردیرە ڕاوەبەرمکەیۆ و هەوڵشا دا ڕابەر ئاپۆی وزا دلۍ سیستەمێوە پا جۆرەیۆ، بەڵام ڕابەر ئاپۆ ئا سیستەمەشە پوچ کەرڎۆ. ویستەکە ئانە بۍ بە سیستەمو ئیمراڵی؛ جە کاتی پەنەوازەنە گێرتەو ڕابەر ئاپۆی جە ئیسفاڎەو ۋێشانە بەکاربەرا، بەڵام دماو ٢٦ ساڵا ڕۆشنبیۆ کە نمەتاوا سەرۍ گنا چا مەرامەیشانە.

هەرۋێش هێزە دژبەرەکێما، هێزە دەسەڵاتدارەکۍ کە فڕشا بە مەسڵەحەتو گەلا و بەهاکا دیموکراتیکیوە نیا و دوورێنۍ جە بەهاکاو ئازادییوە هیچ کات نمەتاوا چی حەقەتینەیە بیاوانە. ئی سیستەمە سیاسیە چی خاڵێنە گیرش کەرڎەن. زیهنییەت و هۆرسەنگنایشا جیاوازا. هەرپۆکەی نمەتاوا ڕابەر ئاپۆی وزانە دلۍ دامێوە و هورش خەڵەتنا. پۊکەی ماچا حەجگیز ڕابەر ئاپۆ هۆرنمەخەڵەتیۆ.

ئەرەکۆشای مڎرامان ئەنجامش گێرت

مەڵامەتی دووەم، ئەرەکۆشای و مڎرامانو گەلوو کوردین کە ڕاش ۋەردەمو چەمپنەکۆتەینە کەردۆ. کوردەکۍ جە گرڎ شۆنۍ دنیێنە هەس بە شکۆو ۋێشا مکەرا، ماچا پەی ڕابەر ئاپۆی چێش پەنەواز بکەرۆ ئەنجامش مڎەیمۍ.

ڕابەر ئاپۆ مەڵامەتو جە ئەڎابیەو گەلوو کوردیا پېسە نەتەوەی دیموکراتیکی. گرڎو ئا حەقیقەتا بەرۍ کۆتێنۍ ڕابەر ئاپۆن. فکر و ڕامان و مڎرامانو ڕابەر ئاپۆیا. ئاڎ فکر و چالاکی بنەڕەتی نەتەوەی دیموکراتیکی کوردین. حەقەتینەکە پا جۆرەنە، بەڵام هامکات گەلوو کوردیچ مەڵامەتو بەرکۆتەی و جە ئەڎابیەی ڕابەر ئاپۆیا و تەمامکەرۍ یۆترینینۍ. هەر چی بوارەنە هێلین ئومیدە سەرنجش وست سەرو ئەرەیاۋنای ئازادی و واتش،" ئەرەیاۋنای ئازاد چی بوارەنە کەموکوڵیشا هەن. جە دنیانە هیچ وڵاتێوەتەر پی جۆرە ڕاوەبەر نمەکریۆ.  بەڕاسی دۆڵەتو تورکی بیەن بە ناوەندو ڕاوەبەردەی سیاسەتەکا دژ بە گەلا و بەتایبەت دژ بە گەلوو کوردی. جە گرڎ یاگێنە کورد ئینا مەرامەنە و بە سیاسەتێوە جەنگی تایبەتی فریو مڎریا و سەرشارە سەپیۆنە.

ئی دووە مەڵامەتە سەرەکیێنۍ. مڎرامانی بەشکۆو ڕابەرایەتی و ئەرەکۆشای پەی ئازادی جەسەیی ڕابەر ئاپۆی کە گەلوو کوردی ڕاوەبەرش مکەرۆ و مڎرامانی بێهامتاو گەریلای بی بە مەڵامەتوو وەڵێکۆتەیۍ پی جۆرەیە.

دیما ئەرەکۆشای بەرەش ڕووەو وەڵێکۆتەیەکارە کەرڎۆ

هەرپاسە ڕووەدایە هەرێمەییەکۍ تەرسیشا جە زېڵۍ دۆڵەتو تورکینە وەشکەرڎەن، ئینێچ چن مەڵامەتێوەنۍ. بەڵام بە دڵنیاییوە ماچوش ئەر ئەرەکۊشای بێهامتاو گەلوو کوردی نەبیۍ، کە دۆڵەتو تورکی پېسە تەرسێوە سەرو ۋێشۆ موینۆش ئانە حەجگیز ئی وەڵۍ کۆتەیۍ نێنۍ ئاراوە. گەر حەقیقەتو کۆمەڵایەتی بیەی و ئەرەکۊشایۍ پی جۆرەیە نەبیۍ ئانە چنی دۆڵەتو تورکی مەجبوورو ڕابەر ئاپۆی بێوە؟ چی چێوۍ چامنە وەش بۆ؟ ئا دەرەنجامەی چینەیۆ دەس وزیۆ ئینەنە: گرنگ نییا چێش ڕووەمڎۆ، گرنگ ئانەنە جارێوەتەر دیماوە پرۆسەو ئەرەکۆشای وەڵێکۆتەی خوڵقنۆ و بە ئەرەکۆشای متاومۍ هەناسێوە هۆرلوشمۍ. وە پەنەوازا عال چا جەنگە تایبەتەیە بیاومێنە کە ئینا ڕۆژەڤەنە.

جەنگی تایبەت بە وەشکەردەی چەمەروانییەکا ڕاوەبەر مکریۆ

ڕابەر ئاپۆ واتش، "گۆشەگیری بەردەوامە". ئا پەیامشە دا بە ڕای گرڎینی سەرو ئی بنەمایە بۍ. بەڕاسی گۆشەگیری بەردەواما. سەرنج دەیدۍ هەر دماو ئەنجامدای چەمپنەکۆتەکەی ڕاسەوخۆ قەڎەغەو چەمپنەکۆتەیشا سەپنا. هیچ چێوۍ سەرو بنەمای یاسایی هەرمانەش پنە مەکریۆ. هیچ جۆرە یاسێوە ئیمراڵینە بیەیش نیا. باخچەلی نوێنەرو دۆڵەتو تورکی ماچۆ "گەر گەرەکما بۆ چەمپۊنەکۆتەی ساز مڎریۆ، مەیلیچما نەنی هیچ چێوۍ نیا " ئینە رێبازێوە جەنگی تایبەتا. با نەواچا ڕابەر ئاپۆ و پەکەکە هەڎەرشا چینەی  نیا.

دماتەر فرە بێ شەرمانە شالیارو دادی بەرکۆت و واتش جە تورکیانە یاسا هەنە!. گرڎ کەسێ بە تەماشەکەرڎەو ئیمراڵی موینۆ کە یاسا هەنە یا نیەنە جە تورکیانە. مشۆم عال چینەی بیاومێنە کە گرڎ جەنگی تایبەتا.

پی مەعنۍ گۆشەگیری بەردەواما. بەڵام دیما ئەر پەرە بە ئەرەکۆشایما بڎەیمۍ و ۋەرفراوانتەرش بکەرمۍ ئانە متاومۍ سیستەمو ئیمراڵی بماڕمێنە. کاتو ئەنەی ئامان. واتما ئیتر کاتو ئازادییا. ئینایمۍ کاتو ئازادینە. نمەبۆ کیشیەیمێوە. بە ناچارکەردەی چەمپنەکۊتەیۍ دەسبەردارۍ ئایدیا و داواکاما نمەبیمۍ. جە گرڎ شۆنۍ  و بەتایبەت جە سەرنیشتوو کوردەسانینە بە ۋەرفراوانی هەڵمەتەو ئازادی ڕابەر ئاپۆی ڕاوەبەر بکریۆ.

بەڕاسی جە قۆناغە وییەردەکانە دیما گەشەدای گرنگ بەدەسئاما. پەی نمونەی جە چوارچێوەو هەڵمەتەو ئازادینە ۋێما یاونا بە گەلا جەهانی، ڕۆشنۋیرا و ...هتد. هەم حەقیقەتو ڕابەرایەتیما یاۋنا پاڎیشا و هەمیچ هێزما چاڎیشاوە هۆرگێرت. پەنەوازا ئینە بەردەوام بۆ.

مشۆم دەسوەڵێوستەی ئازادی جە تورکیانە وەڵۍ گنۆ

هێلین ئومیدە ئانەش وست ڕووە کە مشۆم هەڵمەتەو ئازادی سەرو بنەماو ئازادیی جەسەیی رابەر ئاپۆی بە چالاکی دۆڵەمەنتەر و فرەرەنگتەر بەردەوام بۆ و واتش، "مشۆم تورکیایچەنە دەسوەڵێوستەی ئازادی وەڵۍ وزیۆ. سەرو ئا بنەمایۍ من داوا جە رۆشنۋیرا تورکی و وڵاتپارێزنا تورکی مکەرو. داوا جە رای گرڎیی دیموکراتیکی تورکیای مکەرو. بە راسی چێوۍ کە پېسە دەسوەڵێوستەی دۆڵەتی کە باسش چۆوە مکریۆ هەن و نامێوە پا جۆرەشا پۆوە نیان. دەسوەڵێوستەی دۆڵەتی بەمەبەسو پاکتاوکەردەین. ئێمەیچ ماچمۍ پەی ئازادی و دیموکراسی دەسوەڵێوستەی گەلی ساز بکەردۍ".

سەرو بنەماو ئەرەکۆشای هامبەشی فرە گرنگا. نمەبۆ ئینسان پاشەکشە بکەرۆ و مشۆم ئەرەکۆشای فراوانتەر بکریۆ، پېسە ئانەی نە جمۆوە کە گوایە گۆشەگیری لابریان. سڵامێوە گرنگما جە ڕابەر ئاپۆیۆ لا یاوا و مۆڕاڵ و ورەش بەئێمە بەخشا. بەڵام مشۆم ئانە زیاتەر بۆ بە مەڵامەتوو هاندایما پەی ئەرەکۆشای. پېسە چنی ڕابەر ئاپۆ نوێنەرو شکۆ و کولتووری کوردین جە ۋەرا ۋەرو سیستەمو قڕکەردەی ئیمراڵینە، مشۆم ئێمەیچ جە جبەرۆ بە پاو ئەنەیە ئەرەکۆشایما ۋەرفراوان بکەرمۍ.

'سڵام ۋنەو چالاکی کۆڵنی مکەرو'

هێلین ئومێدە سەرنجش وست سەرو ۋێنیشانداکەو کۆڵنی و واتش،" بە شداری گەلەکەیما جە هەر چوار پارچەو کوردەسانینە ئیراڎەش نیشانە دا. چالاکییەکۍ کوردەسانی زیاتەر تایبەتمەندی هەرێمیشا هەن. بەڵام مېڎانێوە کە تەمسیلو هەڵوێسێوە نەتەوەیی مکەرۆ مېڎانو ئۆروپاین. جەماوەرما جە ئۆروپانە جە گەلوو سەرنیشتی، ۋەرکۆتی، پانیشتی و ۋەرنیشتی پێكمۍ. ئانەی حەقەتینو گەلەکەیما نیشانە مڎۆ ئیراڎەی نەتەوەییا. چی ڕوانگۆ جە کۆڵنەنە گلێرۆبیەیۍ بە شکۆ بەرکۆت. دماو چەمپنەکۆتەکەو رابەر ئاپۆی چالاکی پی جۆرە فرە ماناڎارا. کۆڵنەنە خاوەنداری جە سڵامەکەو ڕابەر ئاپۆی کریا.

گەلوو کوردی گرڎ ڕوۍ عالتەر مېیاوۆنە جە پێوەس بیەی ئاژەیش بە ئاژەو ڕابەر ئاپۆیۆ. ئینە مژارێوە گرنگا.  پا مەترسییاوە کە دەرەنجامو جەنگی یەرەمو جەهانیوە بەرکۆتێنۍ، حەقیقەتو پارێزنای ۋێش بە حەقیقەتو ڕابەر ئاپۆیۆ لکەدان. چی پرۆسەنە گەلوو کوردی دلێڕاسەو ئەرەکۆشای ٥٠ ساڵەیمانە ستاتۆو ۋێش گەرەکا. سەرو ئی بنەمایۍ متاوو واچو حەقەتینێوە بە بڕیارداری بەرکۆتەن.

جەنگ بە گرڎو سەختییەکاشۆ بەردەواما

جە بەردەوامینە هێلین ئومێدە سەرنجش وست سەرو ئا جەنگەیە کە ئینا ئارانەو واتش،" سەرنیشتو کوردەسانی مېڎانوو سەرەکی جەنگین. جەنگ بە گرڎو سەختییەکاشۆ بەردەواما. غەڵەتا ئەر بە ژمارە بە شۆنیرەلوایش پەی بکریۆ. جەنگ جە هەرێمەکاو پارێزناو مەدیایچەنە پی ئاژۆ بەردەواما و هەپەگە ڕوانە ئامارەکاو جەنگی ئاشکرا مکەرۆ. جەنگێوە دژوار هەن و دۆڵەتو تورکیچ سەرو پروپاگەنڎە ناڕاسەکاش بەردەواما.

ئێمە تەڤگەرێوەنمۍ بە روحو ١٤و تەمموزیوە ئەرەکۆشمۍ. هەڤاڵ ئاسیا  و ڕۆژگەر بە چالاکییەکەیشا نیشانەشا دا گرنگ نیا ئاژەکە هەر نۆعۍ بۆ، وەڵێکۆتەی تەکنەلۆجیای هەرنۆعۍ بۆ، هیچ چێوۍ نمەتاوۆ فیدایی ئاپۆیی مردنۆ. مشۆم گرڎ کەسێ عال چینەی بیاوۆنە.

ئێساڵ ئا فیداییەما دی. پار جە کەسایەتی هەڤاڵ ڕۆژهاتی و ئەرداڵینە و وەڵتەریچ جە کەسایەتی هەڤاڵ سارۍ و ڕوکەنێنە دیما.

تەنیا ئینە نیا، مڎرامانێوە بە شکۆ جە هەرێمەکاو پارێزنای مەدیای و مەڕەکانە هەن.  داخەم نمەشۆ نمەتاومۍ پېسە ئانەی گەرەکمانە ئینەی بە گەلەکەیما ئەرەیاۋنمۍ. جە دژو هرووژمەکا دژمنی مڎرامانێوە بە شکۆ هەن. مشۆم عال چینەی بیاومێنە".

ئەر هرووژمەکۍ نەمردا ئانە چالاکییەکۍ ۋێپارێزنایچ بەردەوامۍ با

هێلین ئومێدە سەرنجش وست سەرو چالاکیەکەو هەمڕایاما ئاسیۍ و ڕۆژگەری و واتش،" ئینە چالاکیێوە نیا کە چەمپۆشیش  ۋنە بکریۆ. سەرنج دەیدۍ، دۆڵەتو تورک سەرەش سوڕمەن. بەڵام ئێمەیچ سەرەما سوڕمەنەن جە سەرۋنەشێویاکاشا. ئینە جەنگا و بەردەوامی مڎۆ بە جەنگی. ئەر توساش بەردەوام بۆ جە هرووژمەکاش پەی سەرو ئێمە، ئانە هرووژمی تازە مکریۆ. چی ئاڼنە سەرەشا سوڕمەنەن پی چێویە؟ با گرڎ لێوە بزانا ئەر دۆڵەتو تورکی هرووژمەکاش نەمردنۆ، ئانە چالاکییەکۍ ۋێپارێزنای بەردەوامۍ با. من تەنیا باسو هرووژمەکاشا پەی سەرو گەریلای نمەکەرو، باسو هرووژمەکاشا پەی سەرو گەلیچ مکەرو. هرووژمەکۍ دۆڵەتو تورکی پەی سەرو گەلی فرە جددییۍ و دژوارێنۍ.

ئەرەکۆشای بەردەوام بۆ تا دۆڵەتو تورکی هرووژمە ئەرەگیریەکاش نەمردنۆ و ئیراڎەو گەلوو کوردی قبوڵ نەکەرۆ، سیستەمو قڕکەردەی ئیمراڵی نەمردنۆ. با گرڎ کەس ئینەی بزانۆ، با کەس سەرەش سوڕنەمەنۆ و کەس نەواچۆ چی ڕووە مڎۆ.

بەرکۆتەی ئاسیۍ بەرکۆتەیۍ گۆرەو ئازادییا

 هێلین ئومێدە ماچۆ "ئی چالاکییەو هەمڕا ئاسیۍ و رۆژگەری چالاکیێوە نیا زوو ۋییەرنمێش. داوا جە ژەنا کوردەسانی، مکەرو جە نزیکۆ هەمرا ئاسیۍ و ڕۆژگەری بشناسا. داوا مکەرو چا پاڵنەرا بیاوانە کە هەر دووە هەڤاڵەکەماش یاۋنا پا کاریە. ویرش چنە بکەرۆ هەمڕا ئاسیا، ئەندازیارەو کۆمپیوتەری بۍ، جە ۋەننگەکا دۆڵەتو تورکینە ۋەنانش، پا سیستەمەرە ۋییەردێنە. بەڵام چێش ڕووە مڎۆ؟ گێڵایش شۆنەو شناسنامەیشەرە، میاونۆش لاو پارتەکەیما (پەکەکە)ی. هەڵوێسو هەمڕا ئاسیۍ بەرکۆتەی ئازادیێوە گۆرەین. چا نامانە کە پەیش جیا ئاستیمۍ، واتش چانەینە من پېسە هەمڕا زیلانۍ نەبو، ئاڼنە خاکەڕاو و چنە ویەردۍ بۍ، بەڵام هەمڕا ئاسیا نوێنەرەو ئارۆو زیلانێمانە. مشۆم پا جۆرە بیاومێشەنە.

 مەڵامەتی سەرەکی کە ئاڎەش یاۋنا بە پەکەکەی و ئەرەکۆشای پەکەکەی کتێبو 'ئەوینو کوردی'ن. تەوەری سەرەکی ئەوینو کوردی ئانەن کە چنی بژیومۍ؟ ئینە تەوەری سەرەکی کتێبو ئەوینو کوردین.

ۋێش ماچۆ، کاتێ پەی ئەوەڵجاری وەنامۆ، فرە جە ماناو ژیۋای نەیاوانینە، بەڵام یاوانینە کە چنی نەژیوو. جە حەقەتینەنە جە سەردەمو ئێمەنە فرە گرنگا ئی پیمەرێما با. چی سەردەمەنە قڕکەردەیۍ کۆمەڵایەتی هەن، بەتایبەتی سەرو ژەنۍ، جوانا و مرۆڤەکا. دژە ژیۋای هەن. ڕووبەڕوو راسی دژە ژیۋای بیێنمێوە. ئانەی پنەش وچیۆ ژیۋای پېسە گرڎ چێوۍ چامنەن جگە جگە جە ژیۋای.

پی مەعنۍ هەڤاڵ ئاسیا هێڵۆو کەمال پیری پەیڕەو مکەرۆ. پەنەوازا ئاسیۍ پېسە هێزێوە ژیۋای بشناسمۍ، پێناسەش بکەرمۍ و جە کۆششەکاش بیاوانە، تەماشەو چەمەکاش بکەرا. ژەنا کوردەسانی، جوانا کوردەسانی، بە چەمۍ ئاسیێوە تەماشەو ژیۋای بکەرا. ئیساتۍ کوردەسانەنە پراکتیکو جەنگی تایبەتی گەرەکشا کوردەسانی گێڵنۆوە پەی ئاژەو زەلکاوۍ و تاریکی، گەرەکشا خنیکنۆش. سەرنج دەیدۍ چا بەرکۆتەیۍ بێهامتا نیشانە مڎۆ.

هەمڕا ئاسیا دماو گەشمەرڎەبیەیش قەول بە هەمڕا لاشەری مڎۆ. ماچۆ، "کاتێ گەشمەرڎە بی، لوانی تەرمەکەم کۆکەردۆ". قەولم بە گرڎو بەشەکا جەسەیش دا." ئیساتۍ گەرەکما ئینەی بە گەل و جوانا و ژەنا ۋێما واچو؛ جە کوردەسانەنە هیچ خاکێوە نیا بە ۋنەو گەشمەرڎا ئاوی نەڎریا بۆ، گەژمەرڎەکێما چنەشەنە ئەسپەردۍ نەکریێبا. پا مەعنۍ پیرۆزا. مشۆم گرڎ کەسێ سەرو ئی بنەمایۍ قەولەکا ۋێش جابەجێ بکەرۆ. چونکی هەمڕا ئاسیا پێسە ئەمرە مکەرۆ.

هەمڕا ئاسیا نوێنەرایەتی وڵاتپارێزنی مکەرۆ. ئانەی نیشانە مڎۆ کە وەشەسیای نیشتمانی چنین بۆ، چنی گرنگیش پنە بڎریۆ. سەرو ئا بنەمایۍ مشۆم جوانۍ و بەتایبەت ژەنا خاوەنداری چی هەڵوێسەو هەمڕا ئاسیۍ بکەرا.

هێلین ئومێدە جە دما سەرنجشەنە سەرو هەڤاڵ ئاسیۍ ماچۆ، سەرو ئی بنەمایۍ دەربارەو هەڵوێسو هەمڕا ئاسیۍ، پەیوەندی و پەیوەسبیەیش بە ڕابەر ئاپۆیۆ واتش. ڕابەرایەتی جە دێڕێوەنە کە جە کتێبو نەورەسینە هۆرش گێڕتەبۍ ماچۆ، گەر کات و شۆنەکا ۋییەرنمۍ متاومۍ بیمۍ بە هەمڕێوە حەقەتینە. هەمڕا ئاسیا هەمڕێوەنە کە جە گێڵاینە بۍ شۆنەو ئینەیرە. چن جە کاریگەری شۆنۍ و کاتی دەباز بکەرمۍ، ئاڼنە متاومۍ بیمۍ بە هەمڕۍ حەقەتینۍ جە پەیوەندییەکامانە. ئا پەیوەندیۍ کە کات و شۆنی دەرباز مکەرا، پەیوەندیێوەنۍ کە دڵسۆزی و وەشەسیایی حەقەتینە بەروزا.

پەنەوازا جوانۍ ڕێبازو هەڤاڵ ڕۆژگەری بگێرانە ۋەر

هەڤاڵ ڕۆژگەر هەڤاڵێوە جوانا. جە تەمەنێووە جوانینە، ڕووبەڕوو ئاژێوە سەختو ئەرەکۆشای بیەنۆ. جە ۋێڕاوەبەریەکا سەرنیشتینە بەشداریش کەرڎەن، فرە عال هرووژمە وەحشیانەکۍ دژمنیش جە نزیکۆ دیێنۍ و تووڕەیی ۋێش جە دژشا کۆکەردەنۆ. ئەگەر توڕەیی و ناڕەزاییش پېسە ۋێش هۆرسەنگیۆ، زەمینەو دڵسۆزی و عەشقی حەقەتینە خوڵقنۆ. چێگەنە حەقەتینۍ چیمنە جە هەڤاڵ ڕۆژگەرینە موینمۍ. پۊکەی داوا جە گرڎو جوانا کوردەسانی مکەرو هەڤاڵ ڕۆژگەری پېسەو ڕەمزو ۋێشا بوینا و شۆنەو ڕێبازو ئاڎی گنا.

ئەگەر ڕۆژگەر و ئاسیاکۍ فرۍ با، متاومۍ بکەرمێشا بە حەقەتینێوە بەردەوام و زیڼە. ئانەی من باسش مکەرو هەڵوێسو ژیۋاین، هەڵوێسا جە دژو تیرۆری و کۆمکوژیی، ئینە ئەرکێوەن ۋەردەمو جوانا کوردینە.

جەنگی تایبەت بەردەوامیش هەن

هێلین ئومێدە جە بەردەوامینە ئاماژەش پانەی کەرڎە کە دۆڵەتو تورکی گەرەکشا بە سیستەمو جەنگی تایبەتی جە دژو ئێمە باڵادەسی ۋێش بەدەس بارۆ. پەی نموونەی بە قسەکاو باخچەلی، گەرەکشانە ئاژێوە خوڵقنا کە ڕەگەزپەرسەکا بەکار بارا. بەڕاسی مەترسیێوە چامنە هەن.

جە لێوەتەریچۆ قەیرانەکۍ جە گرڎ بوارێنە تورکیاشا تەننان. ئێمە ڕوانە باس جە کوشتەی زاوڵا، دەسدرێژیکەردەی سەرو زاوڵا مکەرمۍ. ئینە ئاژێوە فرە مەترسیڎارا. ئانادۆڵ و کوردەسان کە بە ناوەندێوە ئەخلاقی و کولتووری ئشناسیێنۍ چنی یاوێنۍ پی ئاژەیە؟ ئینە ئاژێوە قبوڵنەکریان مشۆم دمایش پنە بۍ. جە تورکیانە میکانیزمێوە ئەرەمەرزیان کە گەرەکشا جە هەر ڕووەدایۍ ئیسفاڎە هۆرگێرۆ، گەرەکشا گلێرگەی زیاتەر پێوەس بە دەسەڵاتو ۋێش بکەرۆوە.

چێوۍ تەر ئانەن گلێرگە ئاشتی دلێینەی بنیاڎ منیۆ. ئا گرژی و ملەملانێ ڕووە مڎا، سەرچەمەو گرڎو کێشەکان. ئینەیچ ئینا زەینو سیستەمو جەنگی ئابووری و تایبەتی دەسەڵاتینە. جە دژو ئەرەکۆشای ڕەواو گەلوو کوردین، گرڎ جۆرە سیاسەتێوە جەنگی تایبەتی بەکار بەرا. گرڎ شۆنێنە چەواشەکاری مکریۆ، پیلانگێڵنی هەن. ئینەیچ مشۆم بە عالی پەی گلێرگەو تورکیای ڕۆشن بکریۆوە ، تا حەقەتینەکا بوینا کە تورک بەبێ کوردی بیەیش نییا، کوردیچ بەبێ تورکی نمەتاوۆ بیەیش بۆ.

نزیکایەتی پەکەکەی چنی گەلا تەری هامشێوەو حەقی کارەری و کەمال پیرین

رابەرایەتی ١٠ ساڵۍ چێوەڵی ئی قسێشە کەردێنە. ئیساتۍ باخچەلی ئینەی ماچۆ. وە بێ شەرمانە نمەواچۆ کێ ئینەش واتەن. ئینە قسۍ ڕابەر ئاپۆینە. مزانا کە پەکەکە جە ئەنجامو دۆسایەتیی بەینو حەقی کارەری و ڕابەرایەتینە وەش بیەن. پەکەکە پېسە جوابێوە و حەقکەردەیۆ هەڤاڵ حەقی کارەری دیلۆکەنە ئەرەمەرزیا. چنی ئەرەمەرزناو پەکەکەی جوابو گەشمەرڎە هەڤاڵ حەقی دریاوە. سەرو بنەماو ئا قەولەی پنەش دریابۍ، پەکەکە ئەرەمەرزیا.

هەڤاڵ حەقی کێن؟ هەڤاڵ حەقی شۆڕشگێڕێوە تورک بۍ خەڵکو ئۆردووی. ئا پەیوەندییەی کە ڕابەر ئاپۆ چنی هەڤاڵ حەقی دەسش پنەکەرڎ، هەمان پەیوەندیی بۍ کە چنی گەلاو تورکیای دەسش پنەکەردەبۍ. جە هەمان قۆناغەنە پەیوەندیێوە هامشێوەش چنی کەماڵ پیریچ وەش بی. ئا پەیوەندییەی کە ڕابەر ئاپۆ چنی هەڤاڵا حەقی و کەماڵی بنیاڎش نیا، ڕێبازو شۆڕشو کوردەسانی و پەکەکەیش دیاری کەرد. ڕابەر ئاپۆ سەبارەت بە حەقی کارەری هەمڕایش ماچۆ "ڕۆحی شاراوەو منا". هەڤاڵیەتی پەکەکەی، نزیکبیەیۆ پەکەکەی چنی گەلا هامشێوەو ئا پەیوەندیانە.

جگە چینیشا ڕابەر ئاپۆ پەی ئانەی ئاڵاو دەنیز، ماهیری و ئیبراهیم سەرو زەمینیۆ نازۆوە قەسەمش وارڎ. واتش دەنیزەکۍ جە کاتو قەنارەینە نامۍ گەلەکەیمشا ئارڎەن. کاتێ جە هەلومەرجی کۆمکوژیینە، جە هەلومەرجو فاشیزمی تاریک پەرەسینە نامۍ گەلوو کوردی باس نەکریۍ، بە واڵە و برایەتی گەلوو کوردی و تورکی هەژمار نەکریۍ.

ماهیر داکۆکیش جە دیاریکەردەی مافو چارەنوویسو گەلوو کوردی کەرد. ئیبراهیم ڕووەش کەرڎە کەشەکا دێرسیمی. بەهەزاران کەسۍ چامنۍ هەنۍ. بە سەڎان کەسۍ سەرو ئا بنەمایۍ بەشدارۍ پەکەکەی بیۍ. پۊکەی ڕابەر ئاپۆ قەد جە دیموکراتیک بیەی و جە شۆڕشو تورکیای نە بڕیانەرە. ئانەی هەڤاڵ کەماڵ کەردش فۆرمولەکەردەین، با گرڎ کەسۍ بژنەوۆ و بزانا. شۆڕشو تورکیای و دیموکراتیک بیەیش جە کوردەسانۆ دەس پنە مکەرۆ. ساڵۆو ١٩٩٣ڕابەرایەتی ئا پرۆسەی کە ئێمە ئینایمۍ دلێشەنە بە واتەی "شۆنەو موخاتەبێوەرە گێڵو" دەسش پنە کەرڎ.

ئیساتۍ ڕازەو ئەلپ ئەرسلانی سەر جە نۆ گێڵناوە، ڕازەو تورکەکا کە چنی ئامێنۍ ئانادۆڵ. بەڵێ ئینۍ ڕازۍ حەقەتینێنۍ. پەنەوازا مەعنێوە عالتەرش پنە بڎریۆ. کاتێ دەستوورو ١٩٢١، پرۆسەکاو ساڵۆو١٩١٧، ١٩١٩، ١٩١٨، جە ئەرەمەرزناو کۆمارو تورکیاینە وزیانە ۋەرو ئەوەکۆڵیای، موینیۆ کە جە حەقەتینەنە ئاژەکە پاسەن. ڕابەر ئاپۆ کەسێوەن کە گوزارشت چینیشا مکەرۆ. ڕابەر ئاپۆ سەرو بنەماو ئا حەقەتینا هەوڵو ڕۆشنکەردەیۆ ئاینڎەو گلێرگەو تورکیای مڎۆ. پۊکەی گەلاو تورکیای پەنەوازشا بە رابەر و لیدەرێوەتەری نیا. پەنەوازا گلێرگەو تورکیای بە عالی چانەی بیاوانە کە گەمە بە حەقەتینە تاریخیەکا کریان.

پەنەوازا جە دژو ژەعراوی کەردەی ئاوەزی و هۆشیاری مردمێوە

چی سەردەمەنە جەنگی ئایدیۆلۆژی یا جەنگی هۆشیاری هەن. بە وردی سەرەنج بڎەیدۍ، یەکەمجارا باخچەلی پی جۆرە ئاڼڼە بەرگنۆ؛ باس جە تاریخ و فەلسەفەو تورکیای و ڕاوجاکا پێکئاوردەی مەهەپەی و تورکیای و زیا گۆکالپی مکەرۆ. بەڵام کاتێ ئینەی مکەرۆ، ڕاسی و دروۍ تێکەڵ مکەرۆ. واتە حەقەتینەکا باس نمەکەرۆ. پۊکەی پەنەوازا گرڎ کەسۍ جە ژەعراویکەردەی هۆشیاری ئاگاڎارۍ و وریۍ با.

دووەم: دژو پەکەکەی جەنگی تایبەت ملۆڕاوە. چی دماییانە ماچا پەکەکە دۆڵەت بنیاڎ منیۆ و هتد. ئا هەواڵۍ کە ماچا پەکەکە دۆڵەت ئەرەمەرزنۆ، دروێوە تەمامەنە. پەنەوازا گەلاو تورکیایچ چا حەقەتینیە بیاوانە. ئەر یاڎما بۆ ڕابەر ئاپۆ واتەبێش: "بە ئاوەو ئاڵتونیچ شۆردێش، دۆڵەت میکانیزمو کۆیلایەتییا؛ ئازادی بە بیەو دۆڵەتیوە بەدی نمۍ، ئانە دژو پرەنسیپو منا و ڕەڎش مکەرووە." ئێمەیچ پارتو ڕابەر ئاپۆینمۍ، پەکەکەیچ پارتو ڕابەر ئاپۆیا.

من نمەگنو دلۍ ئا مشتومڕاوە کە ئایا دۆڵەتی کوردی بۆ یان نا، مەسەلەکۍ ئانۍ نییەنە. ئەر هرووژمە کۆمکوژییەکۍ پی تنوتیژیۆ بەردەوامۍ با، کورد چارەسەرێوە تەر هۆرچنۆ. کورد بەردەوام چارەسەری خوڵقنۆ. پەکەکە ۋێش بێ پەیوەندی و سیاسەتی نمازۆوە. بەڵام جە ڕوانگەو پارادایمیوە، شۆنیرەلوایۍ چامنە نیا ئارانە. پەکەکە گەرەکشا سیستەمو دیموکراتیکی ئەرەمەرزنۆ، نوێنەرایەتی سۆسیالیزمی ڕادیکاڵی مکەرۆ؛ ئینە حەقەتینو ئایدیۆلۆژیی پەکەکەین. ئانۍ دژمنایەتیما مکەرا، با جوابو ئی ئارگیومێنتا بڎاوە پەی ئانەی جە حەقەتینەکا بیاوانە.

پەی نمونەی دیتا ماچا ئەمریکا و ئیسرائیل چنی پەکەکەی ئینۍ پەیوەندینە. ۋێش ئا کەسەی فرەتەرین پەیوەندیش چنی ئەمریکای و ئیسرائیل هەن ئەردۆغان و باخچەلینۍ. پارتەکەو باخچەلی ئەمریکانە ئەرەمەرزیا. بەڵێ پەشتگیری گولەنی مکەرۆ، بەڵام جە ئەمریکاوە کیانیان پەی ئانەی دژو کۆمۆنیزمی مردۆوە جە تورکیانە. پەنەوازا گەل باسو ئینیشایچ بکەرا.

پەنەوازا ئێمە بە عالی شۆنیرە لوای پەی ئیمرالی و ڕابەر ئاپۆی بکەرمۍ

وچیۆ کە ڕابەرایەتی چێوێش دەس نیشانکەردەن، بەڵام پەکەکە قبووڵش نەکەرڎەن. گەلەکەما پەی ۋێش گرڎ چێوۍ مزانۆ، بەڵام من پەی ڕای گرڎینی، دۆسا و ئانۍ ئێمە نمەشناسا قسۍ مکەرو. هیچ چێوۍ نیا ئارانە. هیچ چێوۍ پەی پەکەکەی نامان. هیچ چێوۍ نیا گفتوگۆش سەر بکریۆ یان جواب بڎریۆوە. بە گەمەو جەنگی تایبەتی پاسە نیشانەش مڎا کە چێوۍ هەن.

ئێمە بە عالی شۆنیرەلوای پەی ئاژەو ئیمرالی و ڕابەر ئاپۆی مکەرمۍ. ئەرەکۆشای دژو گۆشەگیری ئیمرالی بەرز مکەرمێوە. گرڎ بوارینە شۆنەو حەقەتینەکا گنمۍ. سەرو ئی بنەمایۍ، ۋێتا و مەژکتا ڕۆشن بکەردێوە. ئەرنا ئینە بۆ بە مەڵامەتوو ژەعراویبیەی و ناڕۆشنی ئاژەکەی و ئەنجامی نەرێنیش چنە گنۆوە. پۊکەی پەنەوازا گەل بە شێوێوە سەرەکی ئاگاڎارو سیاسەتەکا جەنگی تایبەتی با دژو گلێرگەی. ئێمە جە دژو دلێنەشیەو سروشتی ئەرەکۊشای مکەرمۍ. مەڵامەتەکۍ فرێنۍ، ئێمە قبوڵش نمەکەرمۍ. ئینە شەرمەزارییا و پەی گلێرگەو تورکیای بێ کەرامەتیا.

سەبارەت بە گلێرگەو کوردەسانی ئەر هرووژمە کۆمکوژییەکا و ئەرەگیریەکا قبوڵ بکەرمۍ، چێوۍ فرەتەرێچ دەسەنە ملا. ئەر گرنگی پی مژاریە بڎەیمۍ، متاومۍ زەمینێوە کۆمەڵایەتی و سیاسی پەی دمایی ئاردەی بە دەسەڵاتو ئاکەپە-مەهەپەی وەش بکەرمۍ. ئاشتی کۆمەڵایەتی بەدی بارمۍ، هێزەکاو دیموکراسی قەوەت بکەرمۍ، دماتەر پێوەرە چارەسەری بنەڕەتی وەش بکەرمۍ.

دەسەڵات نمەتاوۆ دەست بە چارەسەری بکەرۆ. سیستەمو دەوڵەتی نمەتاوۆ چارەسەری بەرهەم بارۆ، ئاڎۍ تەنیا بە چەوەسنایۆ، بەکارئارڎەی، هەڕەشۍ و زۆرەملێ، ئەرەگیری و بەرژەوەندی دەسەڵاتەکەیشا پەشتی بینا. جە فەلسەفەو ئێمەنە هونەرو ئازادی هەن. ئاڎیچ جە لایەنو گەلیوە ملۆڕاوە. سەرو ئی بنەمایۍ پەنەوازا گلێرگەو کوردی جە گرڎ بوارێنە ڕێکوستەی ۋێش قەوەت بکەرۆ، کاریگەری سەرو گلێرگەو تورکیای بنیۆرە، ئێمە گەرەکمانە چنی گەلوو تورکیای بژیۋمۍ. سەرو ئی بنەمایۍ، ئەر ڕا و ڕێباز نیشانە بڎریۆ، چنی هێزەکاو دیموکراسی، سەرو ئی بنەمایۍ، ڕێکوستەی پەنەواز و کار و چالاکی پەنەواز مشۆم ئەنجام بڎریۆ تا جە ئاینڎەنە ئەنجامێوە یەکلایی بەدەس بارمۍ.

ڕۆڵەکۍ ئێری گێڵێنێوە

سەرەتا سڵام ۋنەو ئا کەسا مکەرو کە ئێلیحەنە درێژە بە مڎرامانی مڎا، بەتایبەت جوانا. جە حەقەتینەنە کۆششۍ فرە گرنگو جوانا کارەنە بۍ، جە ۋەرا ۋەرو زرێپۆشەکا دژمنینە، مڎرامانێۇە قەوەتشا ئەنجامدا و گەشمەرڎەیچشا دا نموونە هەڤاڵما ئوزگور ژیۋای ۋێش جە دەسدا.

بەڕاسی ڕۆڵەکۍ ئێری گێڵێنێوە. دیارا هەرچنە فشار بۆ، کۆمکوژی بۆ، پیلانە و گەمەی سیاسی بۆ، جوانۍ کوردی جە ۋەرا ۋەرشەنە ۋێشا بەڕێکوستەی مکەرا. پۊکەی پەو پەڕو وەشحاڵیۆ سڵامشا ۋنە مکەرو. مشۆم جوانا بەبەردەوامی درێژە بە چالاکییەکاشا بڎا.

نیایرەو قەیومی واتە نیایرەو کەسێوە نە شایستەی. کوردەسانەنە ئەرەگیری هەن. بەپاو یاساو چەوەسنایۆ و ئەرەگیری، سیاسەت ملۆڕاوە. یاساو ئەرەگیری ئینا ئارانە. جە کوردەسانەنە دژو سیاسەتو قەیومی و ئەرەگیری ئەرەکۆشای مکریۆ. گەل قبووڵش نمەکەرا دەسوەردای جە مافو دەنگداینە بکریۆ. کوردەسانەنە دەسدرێژی و ئەرەگیری هەن، ئیراڎەو گەلی تاڵان مکریۆ.

ماچا سەرو بنەماو شناسنامەی نەتەوەیی با سیاسەت نەکەرمۍ، ماچا دەم پارتی هەرمانە ی چامنۍ مکەرۆ، کورد سیاسەتی نەتەوەیی مکەرۆ. جە حەقەتینەنە ڕژێم پەی ۋێش جە تورکیانە سیاسەتی نەتەوەیی پراکتیزە مکەرۆ.

ئەر جە کوردەسانەنە مڎرامانێوە هەن، بە پاو ڕاسی ڕابەر ئاپۆی گەشە مکەرۆ. جە حەقەتینو کوردەسانینە قەڵاو مڎرامانی و ڕاسی ڕابەرایەتی هەن. گرڎ کەسێ هێزو ۋێش چاوە هۆر گێرۆ. سەرچەمەن، ڕۆشنایی ژیۋای ئێمەن. پەی جوانایچ هەمان چێوا. پۊکەی پەنەوازا زیاتەر گرنگی و خاوەنداریش ۋنە بکریۆ. جوانۍ دڵسۆزۍ و وەفاڎارۍ بە ڕابەر ئاپۆی سەرو ئی بنەمایۍ ئەرەکۆشای مکەرا و قەناعەتما هەن کە سەرۍ گنا.

بارگرانی جەنگی زیاتەر ئینا سەرو شانا ژەناوە

٢٥و نۊۋەمبەری ڕۆو ۋەرەنگاربیەیۆ تنوتیژین دژو ژەنا، ڕوێوە گرنگا. ئا ئاژەی ئێمەش ئینایمۍ چنە، ئاژەو جەنگی جەهانی یەرەمین ئی ئاژەیە گرنگتەر مکەرۆ. پەی چی؟ چونکی دژو ژەنا جە گرڎ شۆنێوە جەهانینە تنوتیژی پەرەش ئەسان. بەڵام جە ۋەرکۆتوو مېیامینینە و بەتایبەت چا ناوچانە کە جەنگ ئینا ئارانە، ژەنی فرەتەر بانۍ بە قوربانی.

جە ئاخرو سەدەو ٢١ ی نزیکۍ بیمێوە. هۆرچنیەو ترەمپی جە ئەمریکانە یۆن جە نامە ڕەمزیەکا دەسەڵاتداری پیای و ڕەگەز پەرەسی کە بزانە چنی وردە وردە جەهانی ڕووبەڕوو زەحمەتی ژیۋای مکەرۆوە. سەبارەت بە ٢٥و نۆۋەمبەریچ داوا جە گرڎو ئا کەسا مکەرمۍ کە شۆنەو ژیۋایۍ دیموکراتیک، یەکسانی و ئازادیرە گێڵانە پەی ئەنەیاوای جە کولتور و جەهانی ژەنا، بەرەو پارادایمێوە تازەی دەس بە هەوڵدای بکەرا.

سیستەمو ئیساتۍ و سیستەمو پیا سالاری، سەرمایەداری مۆدێرنیتە و کولتوورو پیا سالاری بە گرڎی کریۆ پی جۆرە هۆرسەنگیۆ. مۆدێرنیتەی سەرمایەداری بەرزتەرین ئاستو ئی سیستەمەینە. سیستەمو دۆڵەتی وەڵۍ ٥ هەزار ساڵانە بەکار ئامان، جە سەردەمو مۆدێرنیتەی سەرمایەدارینە، یاوا بە بەرزتەرین ئاستو ۋێش. جە حەقەتینەنە جە گرڎ بوارێوەنە هیچ دەرفەتێوە ژیۋایش پەی مرۆڤایەتی ناستەنۆ جە حەقەتینەنە ئەر قەرارا جە دژو تنوتیژی ۋەرا ۋەر بە ژەنا ئەرەکۆشایۍ دەس پنەبکەرۆ، داوا جە گرڎ لێوە مکەرو ڕووە جە جەهانێوە جیاوازی، پارادایمێوە تازەی بکەرا. ۋەرو ئانەی جیا چانەی هیچ ڕێوەتەر و ئازادیی نمەیاوۆ بە ئەنجام.

سەرو ئی بنەمایۍ مشۆم مڎرامانـما قەوەت بکەرمۍ. هەرپاسە ئەرکی سەرەکی گرڎ کەسێوەن کە جە بوارو فیکریینە ۋێش بەڕێکوستەی بکەرۆ. بە تایبەت ژەنا مشۆم زیاتەر جە هەوڵ و ئەرەکۆشاینە با. ۋەرو ئانەی جە کوردەسانەنە جەنگ هەن، بە زانابیەی سیاسەتەکۍ جە تورکیانە پەی دلێنەبەردەی گلێرگەی ملۆڕاوە. گلێرگەیچ ئی سیاسەتا قبوڵ نمەکەرۆ.

پەکەکە متاوۆ جەهانی فاڕۆ

وەڵۍ گرڎ چێوێنە ٢٧و نۆۋەمبەری جە ڕابەر ئاپۆی پیرۆز مکەرو. جە گەلەکەیما، ژەنا و جوانا پیرۆز مکەرو.

٤٦ساڵۍ ماوێوە فرەن. نزیکەو نیم سەدەین. پەکەکە مۆرەو ۋێش جە تاریخو تورکیای دان. چا سەرش هۆردا و بی بە جمېیەرێوە کە کاریگەر سەرو بنیاڎنیای ۋەرکۆتوو مېیامینی مکەرۆ. چی بوارەنە هیچ کەسێ نمەتاوۆ بەبێ پەکەکەی جە ۋەرکۆتوو مېیامینینە سیاسەت بکەرۆ. بێگومان ئانەی ئێمەش یاۋنا پی ئاستە جە مڎرامانی گەشمەرڎە قارەمانەکێما بێنۍ. پی بۆنۆ جە کەسایەتی هەڤاڵە گەشمەرڎەکا پارتیما پەکەکەینە، گرڎو گەشمەرڎا ڕاو ئازادی بە  وەشەسیای، رێز و پنەزانایۆ یاڎۍ مارمێوە.

جمېیەرێوە کە چا کاتەنە سەرش هۆردا، کە جە کوردەسانەنە هیچ چێوۍ بە نامۍ کوردی و ئیراڎێوە کوردبیەیۆ نەمەنە بۍ، بە جەماوەر، هێز، دەرفەت و هێزی فیکری و پارادایمەکەیش و دۆساش هۆرچەرخنایۍ گۆرە جە جەهانەنە مارۆ وەڵۍ، ئینە پەیامی سەرەکیمانە. پەکەکە پەی ئی مەبەسیە هێزو ئا فاڕیایشە هەن. خاوەن قەرارو و ئیراڎەو ۋێشا.

پا بۆنۆ ماچو، ٤٧ـەمین ساڵوەگەڕو ئەرەمەرزناو پارتیما پەکەکەی هەر پېسە ٤٦ـەمین ساڵەیش مەبۆ بە مېڎانوو ئەرەکۊشایۍ گۆرەی. داوا جە گرڎ لێوە، وڵاتپارێزنا، دۆساما، ژەنا، جوانا مکەرو کە بەشێوێوە چالاک بەشدارۍ ئەرەکۊشای با، بانۍ بە خاوەن مەعنا و ئازاد بژیۋا.