وەزارەتوو دلېینەو مەغریبی ئەرەیاۋناش، بە مەڵامەتوو ئا بومەلەرزەی کە پانیشتوو ۋەرنیشتوو مەغریبیش لەرناوە، لاو کەمیۊ ٢ هەزارۍ و ١٢ کەسۍ گیانشا جەدەسدان. حەرپاسە هەزاروو ٤٠٤ کەسېچ زامڎارۍ بیېنۍ، کە ئاژەو تەندروستی بەشېوەشا فرە خراپا.

بوومەلەرزەکە شەوەو جومعەی سەعات ٢٣:١١ دەیەقۍ بە وەختوو دلېینەو مەغریبی ڕووەشدا  و قووەتەکەش ٦.٨ پلۍ ڕەختەری بیەن. زەرەرۍ فرەش بە مەنتیقە و گەشت و گېڵ و مەغریبی، شیشاوا،ئەزیلال، داربەیزا، حەوزی و چن مەنتیقېوە تەری یاۋنان.

دماو بوومەلەرزەکەی پۍ ماوەو ٣ ڕووا تەعزیە ئەرەیاۋیا. حەرپاسە جە ئاستی میان نەتەوەیچەنە پەیامی هامخەمی و پەشتیوانی ئاڕاسەو ۋڵاتوو مەغریبی کریا. یۊبیەی ئۊرووپای، یۊبیەی ئەفریقای، ئەمریکا و دەیان ۋڵاتۍ تەرۍ ئاماڎەیی ۋېشا پۍ هامکاری کەرڎەی ئا ۋڵاتیە بەربڕی.

جە ماوەو ٦٣ ساڵا ۋیەرڎەینە، بوومەلەرزەکەو ڕۊو جومعەی بەقوەتتەرین بومەلەرزەبیەن، کە چا ۋڵاتەنە ڕووەشدان. ساڵەو ١٩٦٠ی بوومەلەرزېوە بەقوەت مەنتیقەو ئاگادیری ئا ۋڵاتەیشە لەرناوە و جە ئاکامەنە لاو کەمیۊ ١٢ هەزار کەسۍ گیانشا جە دەسدا.